ಸಾನ್ಯಾ, ರೇತಿನ್‌ಗೆ ಪ್ರಶಸ್ತಿ ಗರಿ

ಬೆಂಗಳೂರು: ಕರ್ನಾಟಕದ ಸಾನ್ಯಾ ಮಸಂದ್ ಹಾಗೂ ತಮಿಳುನಾಡಿನ ರೇತಿನ್ ಪ್ರಣಯ್ ಅವರು ಎಐಟಿಎ 18 ವರ್ಷದೊಳಗಿನವರ ರಾಷ್ಟ್ರೀಯ ರ‍್ಯಾಂಕಿಂಗ್‌ ಟೆನಿಸ್ ಚಾಂಪಿಯನ್‌ಷಿಪ್‌ನಲ್ಲಿ ಕ್ರಮವಾಗಿ ಬಾಲಕಿ ಹಾಗೂ ಬಾಲಕರ ವಿಭಾಗದಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡರು.

ಇಲ್ಲಿಯ ಟಾಪ್‌ಸ್ಪಿನ್ ಟೆನಿಸ್ ಅಕಾಡೆಮಿಯಲ್ಲಿ ಶನಿವಾರ ಕೊನೆಗೊಂಡ ಟೂರ್ನಿಯ ಬಾಲಕಿಯರ ಸಿಂಗಲ್ಸ್ ಫೈನಲ್‌ನಲ್ಲಿ ಸಾನ್ಯಾ 4-6, 6-2, 6-2ರಿಂದ ಎರಡನೇ ಶ್ರೇಯಾಂಕದ ಆಟಗಾರ್ತಿ, ದೆಹಲಿಯ ಸಮೀಕ್ಷಾ ದಾಬಸ್‌ಗೆ ಸೋಲುಣಿಸಿದರು. ಮೊದಲ ಸೆಟ್‌ನಲ್ಲಿ ನಿರಾಸೆ ಅನುಭವಿಸಿದರೂ ಪುಟಿದೆದ್ದ ಸಾನ್ಯಾ ಗೆಲುವಿನ ಸಂಭ್ರಮದಲ್ಲಿ ಮಿಂದೆದ್ದರು.

ಬಾಲಕರ ಸಿಂಗಲ್ಸ್ ಪ್ರಶಸ್ತಿ ಸುತ್ತಿನ ಹಣಾಹಣಿ ಸಂಪೂರ್ಣ ಏಕಪಕ್ಷೀಯವಾದಂತೆ ಕಂಡುಬಂದಿತು. ರೇತಿನ್ ಪ್ರಣವ್‌ 6-1, 6-1ರಿಂದ ಸುಲಭವಾಗಿ ಕರ್ನಾಟಕದ ತಂಡದ ಆಕರ್ಷ್‌ ಗಾಂವಕರ್ ಅವರನ್ನು ಮಣಿಸಿದರು.