ISRO: ಸಣ್ಣ ಉಪಗ್ರಹ ಉಡ್ಡಯನ ವಾಹನಗಳ ಮೂರನೇ ಹಂತದ ಪರೀಕ್ಷೆ ನಡೆಸಿದ ಇಸ್ರೊ

ಬೆಂಗಳೂರು: ತಾಂತ್ರಿಕವಾಗಿ ಸುಧಾರಿಸಲಾದ, ಸಣ್ಣ ಉಪಗ್ರಹಗಳ ಉಡ್ಡಯನಕ್ಕೆ ಬಳಸುವ ರಾಕೆಟ್‌ನ (ಎಸ್‌ಎಸ್‌ಎಲ್‌ವಿ) ಮೂರನೇ ಹಂತದ ಪರೀಕ್ಷೆಯನ್ನು ಶ್ರೀಹರಿಕೋಟದಲ್ಲಿರುವ ಸತೀಶ್‌ ಧವನ್ ಬಾಹ್ಯಾಕಾಶ ಕೇಂದ್ರದಲ್ಲಿ ಮಂಗಳವಾರ ಯಶಸ್ವಿಯಾಗಿ ನೆರವೇರಿಸಲಾಗಿದೆ ಎಂದು ಇಸ್ರೊ ತಿಳಿಸಿದೆ.

‘ಈ ಪರೀಕ್ಷೆ ಅವಧಿ ಒಟ್ಟು 108 ಸೆಕೆಂಡು ಕಾಲ ನಡೆಯಿತು. ಉಪಗ್ರಹಗಳ ಉಡ್ಡಯನಕ್ಕೆ ಬಳಸಲು ರಾಕೆಟ್‌ ಸನ್ನದ್ಧ ಎಂಬುದನ್ನು ಈ ಪರೀಕ್ಷೆ ದೃಢಪಡಿಸಿತು’ ಎಂದು ಇಸ್ರೊ ತಿಳಿಸಿದೆ. 

‘ಎಸ್‌ಎಸ್‌ಎಲ್‌ವಿಯನ್ನು ಇಸ್ರೊ ಅಭಿವೃದ್ಧಿಪಡಿಸಿದೆ. ಉದ್ದಿಮೆಗಳು ಕೂಡ ಇದನ್ನು ತಯಾರಿಸಬಹುದು ಹಾಗೂ ಇದರ ಮರುಬಳಕೆ ಕೂಡ ಸಾಧ್ಯ’ ಎಂದು ಇಸ್ರೊ ಪ್ರಕಟಣೆಯಲ್ಲಿ ತಿಳಿಸಿದೆ.