Whatsapp: ಫೇಸ್‌ಬುಕ್ ಜತೆ ಮಾಹಿತಿ ಹಂಚಿಕೆ ಬಗ್ಗೆ ವಾಟ್ಸ್‌ಅ್ಯಪ್ ಸ್ಪಷ್ಟನೆ
ಜಾಗತಿಕವಾಗಿ ಅತಿಹೆಚ್ಚಿನ ಬಳಕೆದಾರರನ್ನು ಹೊಂದಿರುವ ಮೆಸೇಜಿಂಗ್ ಅ್ಯಪ್ ವಾಟ್ಸ್‌ಅ್ಯಪ್ ಇತ್ತೀಚೆಗೆ ಹೊಸ ಅಪ್‌ಡೇಟ್ ಬಿಡುಗಡೆ ಮಾಡಿದೆ. ಅದರಲ್ಲಿ ಬಳಕೆದಾರರ ವಿವರವನ್ನು ಫೇಸ್‌ಬುಕ್ ಜತೆ ಹಂಚಿಕೊಳ್ಳುವುದಾಗಿ ಹೇಳಿದ್ದು, ಜನರ ಆಕ್ರೋಶಕ್ಕೆ ಗುರಿಯಾಗಿದೆ. ಈ ಮಧ್ಯೆ ಹೊಸದಾಗಿ ಹೇಳಿಕೆ ಬಿಡುಗಡೆ ಮಾಡಿದ್ದು, ದತ್ತಾಂಶ ಹಂಚಿಕೆ ವಿಚಾರದಲ್ಲಿ ಯಾವುದೇ ಬದಲಾವಣೆ ಮಾಡುವುದಿಲ್ಲ ಎಂದಿದೆ. ಫೇಸ್‌ಬುಕ್ ಒಡೆತನದ ವಾಟ್ಸ್‌ಅ್ಯಪ್ ಈಗಾಗಲೇ ಬಳಕೆದಾರರಿಗೆ ಹೊಸ ಅಪ್‌ಡೇಟ್ ಬಗ್ಗೆ ನೋಟಿಫಿಕೇಶನ್ ಕಳುಹಿಸಲಾರಂಭಿಸಿದೆ.
ವಾಟ್ಸ್‌ಅ್ಯಪ್ ಬ್ಯುಸಿನೆಸ್ ಆವೃತ್ತಿ ಕೂಡ ಪರಿಚಯಿಸಿದ್ದು, ಅದನ್ನು ಬಳಸುತ್ತಿರುವವರಿಗೆ ಉದ್ಯಮ ನಿರ್ವಹಣೆ ಮತ್ತು ಗ್ರಾಹಕರನ್ನು ಸೆಳೆಯಲು ಈ ಕ್ರಮ ಅನುಕೂಲವಾಗಲಿದೆ ಎಂದು ಫೇಸ್‌ಬುಕ್ ಹೇಳಿತ್ತು. ಫೆ. 8, 2021ರಿಂದ ಹೊಸ ನಿಯಮ ಜಾರಿಗೆ ಬರಲಿದೆ ಎಂದು ಹೇಳಿತ್ತು. ಆದರೆ ಫೇಸ್‌ಬುಕ್ ಈ ಕ್ರಮಕ್ಕೆ ವಿರೋಧ ಕೇಳಿಬಂದಿದ್ದರಿಂದ, ಬಳಕೆದಾರರ ವೈಯಕ್ತಿಕ ಮಾಹಿತಿ ಹಂಚಿಕೆ ಇರುವುದಿಲ್ಲ, ಗ್ರಾಹಕರ ದತ್ತಾಂಶ ಸುರಕ್ಷಿತವಾಗಿರಲಿದೆ ಎಂದು ಹೇಳಿದೆ.
ಟೆಲಿಗ್ರಾಂ ಅ್ಯಪ್ ಡೌನ್‌ಲೋಡ್ ಹೆಚ್ಚಳ
ವಾಟ್ಸ್‌ಅ್ಯಪ್ ಹೊಸ ಅಪ್‌ಡೇಟ್ ಜನರಲ್ಲಿ ಗೊಂದಲ ಮೂಡಿಸಿರುವುದು ಮತ್ತು ಅಸಮಾಧಾನಕ್ಕೆ ಕಾರಣವಾಗಿರುವಂತೆಯೇ, ಟೆಲಿಗ್ರಾಂ ಮತ್ತು ಸಿಗ್ನಲ್ ಅ್ಯಪ್ ಬಳಕೆದಾರರ ಸಂಖ್ಯೆ ಏರಿಕೆಯಾಗಿದೆ. ಸಾಮಾಜಿಕ ತಾಣಗಳಲ್ಲೂ ವಾಟ್ಸ್‌ಅ್ಯಪ್ ಅಪ್‌ಡೇಟ್ ಬಗ್ಗೆ ಟ್ರೋಲ್ ಹರಿದಾಡುತ್ತಿದೆ. ಜತೆಗೆ ಟೆಸ್ಲಾ ಮುಖ್ಯಸ್ಥ ಎಲೊನ್ ಮಸ್ಕ್ ಕೂಡ ಜನರಿಗೆ ವಾಟ್ಸ್‌ಅ್ಯಪ್ ಬಿಟ್ಟುಬಿಡುವಂತೆ ಸೂಚಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.