ಒಡನಾಟಗಳ ವಿಟಮಿನ್‌ ‘ಡಿ’: ಡಾ.ನಾ. ಮೊಗಸಾಲೆ ಅವರ ಪುಸ್ತಕದ ಮೊದಲ ಓದು
ಸುದೀರ್ಘ ಬದುಕಿನಲ್ಲಿ ತಮ್ಮ ಒಡನಾಟಕ್ಕೆ ಬಂದ ಹಿರಿಕಿರಿಯ ಮಿತ್ರರ ವ್ಯಕ್ತಿತ್ವಗಳ ದಾಖಲೆ ಈ ಕೃತಿಯಲ್ಲಿದೆ. ಅವಿಭಜಿತ ದಕ್ಷಿಣ ಕನ್ನಡ ಹಾಗೂ ರಾಜ್ಯದ ವಿವಿಧ ಭಾಗಗಳ ಆಯ್ದ ವ್ಯಕ್ತಿಗಳ ವ್ಯಕ್ತಿತ್ವವನ್ನು ಹಾಗೂ ವೈಯಕ್ತಿಕ ಸ್ನೇಹವನ್ನು ದಾಖಲಿಸಿಕೊಟ್ಟಿದ್ದಾರೆ ಲೇಖಕ ಡಾ.ನಾ.ಮೊಗಸಾಲೆ. ಲೇಖಕರೊಂದಿಗಿನ ಒಡನಾಟ ಅನ್ನುವುದಕ್ಕಿಂತಲೂ ಆಯಾ ವ್ಯಕ್ತಿಗಳ ಬಗ್ಗೆ ತಿಳಿದುಕೊಳ್ಳುವ ಕುತೂಹಲ ಇರುವವರು ಓದಬಹುದಾದ ಕೃತಿ. ಈಗ ಇರುವವರು, ಆಗಿ ಹೋದವರು, ಅಪರೂಪದ ವ್ಯಕ್ತಿಗಳು, ಅಷ್ಟಾಗಿ ಪರಿಚಯಗೊಳ್ಳದವರು, ಸತ್ಕಾರ್ಯಗಳ ಹಿಂದಿದ್ದ ಉದ್ಯಮಿ ದಾನಿಗಳು... ಹೀಗೆ ಹಲವು ವ್ಯಕ್ತಿತ್ವಗಳ ಪರಿಚಯ ಇಲ್ಲಿದೆ.
ವಿವಿಧ ಅಭಿನಂದನಾ ಗ್ರಂಥ ಅಥವಾ ಸಂಸ್ಮರಣಾ ಗ್ರಂಥಗಳಿಗೆ ಬರೆದ ಲೇಖನಗಳನ್ನು ಒಟ್ಟಾಗಿಸಿ ‘ಹೂ ಬಿಸಿಲಿನ ಕೆಳಗೆ’ ಇಟ್ಟಿದ್ದಾರೆ. ಬರಹಗಳಲ್ಲಿ ಮೊಗಸಾಲೆಯವರ ಎಂದಿನ ಲವಲವಿಕೆ, ತಾಜಾತನ ಇದೆ. ಲೇಖಕರ ಹಿರಿ ಕಿರಿಯ ಮಿತ್ರದ ಒಡನಾಟದ ಹೂಬಿಸಿಲಿನಿಂದ ವಿಟಮಿನ್‌ ‘ಡಿ’ ಸಿಕ್ಕಿದೆ. ಆ ಬೆಚ್ಚನೆಯ ಸುಖದ ಅನುಭವವನ್ನು ಮತ್ತೆ ಮನಸ್ಸಿನ ಅಂಗಳಕ್ಕೆ ತಂದುಕೊಳ್ಳುವ ಪ್ರಯತ್ನವಿದು ಎಂದು ಅವರೇ ಹೇಳಿಕೊಂಡಿದ್ದಾರೆ. ಒಟ್ಟು 49 ವ್ಯಕ್ತಿಗಳ ವ್ಯಕ್ತಿ ಸಂಸ್ಕೃತಿ ಪರಿಚಯವಿದೆ.
ಕೃತಿ: ಹೂ ಬಿಸಿಲಿನ ಕೆಳಗೆ
ಲೇ: ಡಾ.ನಾ. ಮೊಗಸಾಲೆ
ಪ್ರ: ಸ್ನೇಹಾ ಎಂಟರ್‌ಪ್ರೈಸಸ್‌, ಬೆಂಗಳೂರು
ಸಂ: 98450 62549
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.