500 ದುರಸ್ತಿ ಸೇವೆ ಕೇಂದ್ರ ಆರಂಭಿಸುವ ಗುರಿ: ಮಾರುತಿ ಸುಜುಕಿ

ನವದೆಹಲಿ: ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ವಾಹನಗಳಿಗೆ ದುರಸ್ತಿ ಸೇವೆ ಒದಗಿಸುವ (ಸರ್ವಿಸ್ ವರ್ಕ್‌ಶಾ‍ಪ್) 500 ಕೇಂದ್ರಗಳನ್ನು ಆರಂಭಿಸಲು ಯೋಜಿಸಿರುವುದಾಗಿ ವಾಹನ ತಯಾರಿಕಾ ಕಂಪನಿ ಮಾರುತಿ ಸುಜುಕಿ ಇಂಡಿಯಾ ಬುಧವಾರ ಹೇಳಿದೆ. 

ತಮಿಳುನಾಡಿನ ಕೊಯಮತ್ತೂರಿನಲ್ಲಿ ತನ್ನ 5 ಸಾವಿರದ ಅರೆನಾ ಸೇವಾ ಕೇಂದ್ರ ಸ್ಥಾಪಿಸುವುದಾಗಿ ಘೋಷಿಸಿದೆ. 

ಕಳೆದ ಆರ್ಥಿಕ ವರ್ಷದಲ್ಲಿ ವಾಹನಗಳಿಗೆ ದುರಸ್ತಿ ಸೇವೆ ಒದಗಿಸುವ 460 ಕೇಂದ್ರಗಳನ್ನು ಆರಂಭಿಸಲಾಗಿತ್ತು. ಪ್ರಸಕ್ತ ಆರ್ಥಿಕ ವರ್ಷದಲ್ಲಿ 500 ಕೇಂದ್ರಗಳನ್ನು ಆರಂಭಿಸಲು ಉದ್ದೇಶಿಲಾಗಿದೆ ಎಂದು ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಹಿಸಾಶಿ ತಕೆಯುಚಿ ಹೇಳಿದ್ದಾರೆ. 

ಈ ಹೊಸ ಕೇಂದ್ರಗಳನ್ನು ಸೇರ್ಪಡೆ ಮಾಡಿಕೊಳ್ಳುವುದರಿಂದ ಕಂಪನಿಯ ಒಟ್ಟು ಕೇಂದ್ರಗಳ ಸಂಖ್ಯೆ 5,640ಕ್ಕೂ ಹೆಚ್ಚು ಆಗಲಿದೆ. ದೇಶದ 2,818 ನಗರಗಳಲ್ಲಿ ಈ ಕೇಂದ್ರಗಳು ಇವೆ ಎಂದು ಹೇಳಿದ್ದಾರೆ. 

ಪ್ರಸಕ್ತ ವರ್ಷದ ಏಪ್ರಿಲ್‌–ಸೆಪ್ಟೆಂಬರ್ ಅವಧಿಯಲ್ಲಿ ದೇಶದಾದ್ಯಂತ 1.4 ಕೋಟಿಗೂ ಹೆಚ್ಚು ವಾಹನಗಳಿಗೆ ಕಂಪನಿಯು ಸೇವೆ ಒದಗಿಸಿದೆ. ಕಳೆದ ಪೂರ್ಣ ಆರ್ಥಿಕ ವರ್ಷದಲ್ಲಿ 2.7 ಕೋಟಿಗೂ ಹೆಚ್ಚು ವಾಹನಗಳಿಗೆ ದುರಸ್ತಿ ಸೇವೆ ನೀಡಿತ್ತು.