ಏಷ್ಯಾದಲ್ಲೇ ಎರಡನೇ ಅತೀದೊಡ್ಡ ಕಚೇರಿ ಉದ್ಘಾಟಿಸಿದ ‌ಅಮೆಜಾನ್‌

ವಿಶ್ವದ ದೈತ್ಯ ಕಂಪನಿಗಳಲ್ಲಿ ಒಂದಾಗಿರುವ ‘ಅಮೆಜಾನ್’ ಬೆಂಗಳೂರಿನಲ್ಲಿ ತನ್ನ ಕಚೇರಿ ಒಂದನ್ನು ಅಧಿಕೃತವಾಗಿ ಉದ್ಟಾಟಿಸಿದೆ. ಇದು ಏಷ್ಯಾದಲ್ಲೇ ಅದರ ಎರಡನೇ ಅತೀ ದೊಡ್ಡ ಕಚೇರಿಯಾಗಿದೆ.

ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಸುಮಾರು 15‌ ಕಿ.ಮೀ ದೂರದಲ್ಲಿ 5 ಎಕರೆ ಪ್ರದೇಶದಲ್ಲಿ ಈ ಕಚೇರಿಯನ್ನು ನಿರ್ಮಿಸಲಾಗಿದೆ. 12 ಅಂತಸ್ತಿನ ಕಟ್ಟದಲ್ಲಿ ಇ-ಕಾಮರ್ಸ್, ಪಾವತಿ, ತಂತ್ರಜ್ಞಾನ ಮತ್ತು ಮಾರಾಟಗಾರರ ಸೇವೆ ಇರಲಿದೆ. ಅಲ್ಲದೆ ಕಂನಿಯಲ್ಲಿ 7,000ಕ್ಕೂ ಅಧಿಕ ಉದ್ಯೋಗಿಗಳು ಕಾರ್ಯನಿರ್ವಹಿಸಲಿದ್ದಾರೆ ಎಂದು ವರದಿಯಾಗಿದೆ.  

ಈ ಕಾರ್ಪೋರೇಟ್‌ ಕ್ಯಾಂಪಸ್‌ನಲ್ಲಿ ಮೀಟಿಂಗ್ ಹಾಲ್‌ಗಳು, 200 ಕ್ಕೂ ಹೆಚ್ಚು ಜನರಿಗೆ ಆತಿಥ್ಯ ವಹಿಸುವ ಬೃಹತ್‌ ಹಾಲ್‌ಗಳು. ಉದ್ಯೋಗಿಗಳಿಗೆ ಆಟವಾಡಲು ಬ್ಯಾಸ್ಕೆಟ್‌ಬಾಲ್ ಸೇರಿದಂತೆ ಇತರೆ ಆಟದ ಮೈದಾನಗಳು ಇದೆ ಜೊತೆಗೆ ಜಾಗತಿಕ ಅಡುಗೆಗಳನ್ನು ಪೂರೈಸುವ ವಿಶೇಷ ಕೆಫಿಟೇರಿಯಾ ಇದೆ ಎಂದು ವರದಿಯಾಗಿದೆ. 

ಈ ಹೊಸ ಕ್ಯಾಂಪಸ್ ಭಾರತದಲ್ಲಿ ಅಮೆಜಾನ್‌ನ ವಿಸ್ತರಣೆಯ ಭಾಗವಾಗಿದೆ. ಕಂಪನಿಯು ಈಗಾಗಲೇ ದೇಶದಲ್ಲಿ ₹3.64 ಲಕ್ಷ ಕೋಟಿಗೂ ಅಧಿಕ ಹೂಡಿಕೆ ಮಾಡಿದೆ ಮತ್ತು 2030ರ ವೇಳೆಗೆ ಹೆಚ್ಚುವರಿಯಾಗಿ ₹3.18 ಲಕ್ಷ ಕೋಟಿ ಹೂಡಿಕೆಗೆ ಮಾಡಲಿದೆ ಎಂದು ವರದಿಯಾಗಿದೆ. 

ಕರ್ನಾಟಕದಲ್ಲಿ ಅಮೆಜಾನ್‌ನ ಹೆಜ್ಜೆಗುರುತು

ಕರ್ನಾಟಕದಲ್ಲಿ ಅಮೇಜಾನ್ ಸಂಸ್ಥೆಯ 10 ಕಾರ್ಪೊರೇಟ್ ಕಚೇರಿಗಳಿವೆ. 7 ಪೂರೈಕೆ ಕೇಂದ್ರಗಳು, 3 ವಿಭಾಗೀಯ ಕೇಂದ್ರಗಳು, 130ಕ್ಕೂ ಅಧಿಕ ವಿತರಣಾ ಕೇಂದ್ರಗಳಿವೆ. ಕರ್ನಾಟಕದಲ್ಲಿ ಒಟ್ಟು 80,000ಕ್ಕೂ ಅಧಿಕ ಡೆಲಿವರಿ ಬಾಯ್‌ಗಳು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.