ಬೆಂಗಳೂರಿನಲ್ಲಿ ಕಚೇರಿ ಸ್ಥಳದ ಗುತ್ತಿಗೆ ಶೇ 28ರಷ್ಟು ಇಳಿಕೆ: ವೆಸ್ಟಿಯನ್‌ ವರದಿ

ನವದೆಹಲಿ: ಬೆಂಗಳೂರಿನಲ್ಲಿ ಕಚೇರಿ ಸ್ಥಳವನ್ನು ಗುತ್ತಿಗೆ ಆಧಾರದಲ್ಲಿ ನೀಡುವುದು ಜುಲೈ–ಸೆಪ್ಟೆಂಬರ್ ಅವಧಿಯಲ್ಲಿ ಶೇ 28ರಷ್ಟು ಇಳಿಕೆ ಕಂಡಿದೆ. ಹೊಸ ಕಚೇರಿ ಸ್ಥಳಕ್ಕೆ ಬೇಡಿಕೆಯೂ ಶೇ 25ರಷ್ಟು ಕಡಿಮೆ ಆಗಿದೆ ಎಂದು ರಿಯಲ್‌ ಎಸ್ಟೇಟ್‌ ಸಲಹಾ ಸಂಸ್ಥೆ ವೆಸ್ಟಿಯನ್‌ ಹೇಳಿದೆ.

ಬೆಂಗಳೂರಿನಲ್ಲಿ 2023ರ ಜುಲೈ–ಸೆಪ್ಟೆಂಬರ್ ಅವಧಿಯಲ್ಲಿ 36 ಲಕ್ಷ ಚದರ ಅಡಿಯಷ್ಟು ಕಚೇರಿ ಸ್ಥಳವನ್ನು ಗುತ್ತಿಗೆ ನೀಡಲಾಗಿದೆ. 2022ರ ಜುಲೈ–ಸೆಪ್ಟೆಂಬರ್ ಅವಧಿಯಲ್ಲಿ 50 ಲಕ್ಷ ಚದರ ಅಡಿ ಗುತ್ತಿಗೆ ನೀಡಲಾಗಿತ್ತು. ಕಂಪನಿಗಳಿಂದ ಬೇಡಿಕೆ ಬರದೇ ಇರುವುದೇ ಕಚೇರಿ ಸ್ಥಳದ ಗುತ್ತಿಗೆ ಇಳಿಕೆ ಕಾಣಲು ಕಾರಣ ಎಂದು ತಿಳಿಸಿದೆ.

ಬೆಂಗಳೂರು ಸೇರಿದಂತೆ ಒಟ್ಟು 7 ನಗರಗಳಲ್ಲಿ 2023ರ ಜುಲೈ–ಸೆಪ್ಟೆಂಬರ್ ಅವಧಿಯಲ್ಲಿ ಕಚೇರಿ ಸ್ಥಳದ ಗುತ್ತಿಗೆ ನೀಡುವ ವರದಿಯನ್ನು ಕಂಪನಿಯು ಮಂಗಳವಾರ ಬಿಡುಗಡೆ ಮಾಡಿದೆ. ಅದರಂತೆ, ಈ ನಗರಗಳಲ್ಲಿ ಕಚೇರಿ ಸ್ಥಳದ ಗುತ್ತಿಗೆಯು ಶೇ 21ರಷ್ಟು ಹೆಚ್ಚಾಗಿ 1.59 ಕೋಟಿ ಚದರ ಅಡಿಗೆ ತಲುಪಿದೆ. 2022ರ ಇದೇ ಅವಧಿಯಲ್ಲಿ 1.31 ಕೋಟಿ ಚದರ ಅಡಿಗೆ ಬೇಡಿಕೆ ಬಂದಿತ್ತು. ದೆಹಲಿ–ಎನ್‌ಸಿಆರ್‌‌ನಲ್ಲಿ ಶೇ 14ರಷ್ಟು ಇಳಿಕೆ ಆಗಿದೆ. ಉಳಿದಂತೆ ಚೆನ್ನೈ, ಹೈದರಾಬಾದ್, ಮುಂಬೈ, ಪುಣೆ ಮತ್ತು ಕೋಲ್ಕತ್ತದಲ್ಲಿ ಬೇಡಿಕೆ ಹೆಚ್ಚಾಗಿದೆ ಎಂದು ಅದು ಮಾಹಿತಿ ನೀಡಿದೆ.