ಉಳಿತಾಯ ಖಾತೆ ಸುಲಭ ವಿಧಾನ

ಕೋವಿಡ್‌ ಪಿಡುಗಿನ ಕಾರಣಕ್ಕೆ ಸುರಕ್ಷತೆಗೆ ಆದ್ಯತೆ ನೀಡುತ್ತಿರುವ ಬ್ಯಾಂಕ್‌ಗಳು, ಗ್ರಾಹಕರ ಜತೆ ನಡೆಸುವ ಸಂವಹನದ ಸ್ವರೂಪವನ್ನೇ ಬದಲಿಸುತ್ತಿವೆ. ಹೊಸ ಡಿಜಿಟಲ್‌ ಸೌಲಭ್ಯ ನೀಡಲು ಆದ್ಯತೆ ನೀಡುತ್ತಿವೆ. ಉಳಿತಾಯ ಖಾತೆ ಆರಂಭಿಸಲೂ ಆನ್‌ಲೈನ್‌ ಸೌಲಭ್ಯ ಕಲ್ಪಿಸುತ್ತಿವೆ.

ಎಸ್‌ಬಿಐ; ಆಧಾರ್‌ ಬಳಸಿ ಉಳಿತಾಯ ಖಾತೆ: ಆಧಾರ್‌ ಬಳಸಿ ಬ್ಯಾಂಕ್‌ ಶಾಖೆಗಳಲ್ಲಿ ಉಳಿತಾಯ ಖಾತೆ ಆರಂಭಿಸುವ ಸೇವೆಗೆಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ (ಎಸ್‌ಬಿಐ) ಮರುಚಾಲನೆ ನೀಡಿದೆ. ಗ್ರಾಹಕರಿಗೆ ಡಿಜಿಟಲ್‌ ಬ್ಯಾಂಕಿಂಗ್‌ ಸೇವೆಯ ಸೌಲಭ್ಯ ವಿಸ್ತರಿಸಲು ಈ ಕ್ರಮ ಕೈಗೊಂಡಿದೆ. ಗ್ರಾಹಕರು ಬ್ಯಾಂಕ್‌ನ ಯೊನೊ ಸೌಲಭ್ಯ ಬಳಸಿಕೊಂಡು ಆಧಾರ್‌ ಆಧರಿಸಿ ತಕ್ಷಣಕ್ಕೆ ಉಳಿತಾಯ ಖಾತೆ ಆರಂಭಿಸುವ ಸೌಲಭ್ಯ ಇದಾಗಿದೆ.

ಈ ಪ್ರಕ್ರಿಯೆಯು ಸಂಪೂರ್ಣ ಕಾಗದರಹಿತವಾಗಿರುತ್ತದೆ. ಪ್ಯಾನ್‌ ಮತ್ತು ಆಧಾರ್ ಸಂಖ್ಯೆ ಬಳಸಿ ಗ್ರಾಹಕರು ಖಾತೆ ತೆರೆಯಬಹುದು. ಗ್ರಾಹಕರು ಬ್ಯಾಂಕ್‌ ಶಾಖೆಗೆ ತೆರಳದೆ ಉಳಿತಾಯ ಖಾತೆ ಆರಂಭಿಸಬಹುದು. ಗ್ರಾಹಕರಿಗೆ ರೂಪೆ ಎಟಿಎಂ – ಡೆಬಿಟ್‌ ಕಾರ್ಡ್‌ ನೀಡಲಾಗುವುದು.

ಗ್ರಾಹಕರು ಮೊದಲು ತಮ್ಮ ಮೊಬೈಲ್‌ನಲ್ಲಿ ಬ್ಯಾಂಕ್‌ನ ಯೊನೊ (Yono) ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಳ್ಳಬೇಕು. ಪ್ಯಾನ್‌ ಮತ್ತು ಆಧಾರ್‌ ವಿವರ ನೀಡಬೇಕು. ಮೊಬೈಲ್‌ಗೆ ಬರುವ ಒಟಿಪಿ ಸಲ್ಲಿಸಿ ಇತರ ವಿವರಗಳನ್ನು ಭರ್ತಿ ಮಾಡಬೇಕು. ಈ ಪ್ರಕ್ರಿಯೆ ಪೂರ್ಣಗೊಳ್ಳುತ್ತಿದ್ದಂತೆ ಉಳಿತಾಯ ಖಾತೆ ಕಾರ್ಯಾರಂಭ ಮಾಡಲಿದೆ. ತಕ್ಷಣದಿಂದಲೇ ವಹಿ ವಾಟು ಆರಂಭಿಸಬಹುದು. ಒಂದು ವರ್ಷದ ಒಳಗೆ ಗ್ರಾಹಕರು ತಮ್ಮ ಮನೆ ಸಮೀಪದ ಬ್ಯಾಂಕ್‌ ಶಾಖೆಗೆ ಭೇಟಿ ಕೊಟ್ಟು ‘ತಿಳಿಯಿರಿ ನಿಮ್ಮ ಗ್ರಾಹಕರು’ (ಕೆವೈಸಿ) ವಿವರಗಳನ್ನು ನೀಡಬೇಕು.

ಐಡಿಎಫ್‌ಸಿ ಫರ್ಸ್ಟ್ ಬ್ಯಾಂಕ್: ವಿಡಿಯೊ ಕೆವೈಸಿ

ಐಡಿಎಫ್‌ಸಿ ಫರ್ಸ್ಟ್ ಬ್ಯಾಂಕ್, ಆನ್‌ಲೈನ್ ಉಳಿತಾಯ ಖಾತೆ ತೆರೆಯಲು ವಿಡಿಯೊ ಕೆವೈಸಿ ವ್ಯವಸ್ಥೆ ಪರಿಚಯಿಸಿದೆ. ಡಿಜಿಟಲ್ ವಿಧಾನದಲ್ಲಿ ಉಳಿತಾಯ ಖಾತೆ ತೆರೆಯುವ ಸೌಲಭ್ಯದಿಂದಾಗಿ, 2 ನಿಮಿಷದಲ್ಲಿ ಕೆವೈಸಿ ಪ್ರಕ್ರಿಯೆ ಪೂರ್ಣಗೊಳ್ಳಲಿದೆ. ಡಿಜಿಟಲ್ ಸೌಲಭ್ಯವು ಗ್ರಾಹಕರಿಗೆ ಮನೆಯಲ್ಲೇ ಬ್ಯಾಂಕ್‌ ಶಾಖೆ ರೀತಿಯ ಅನುಭವ ಒದಗಿಸುತ್ತದೆ. ಸಂಪರ್ಕರಹಿತ ಸೌಲಭ್ಯದಿಂದಾಗಿ ಬ್ಯಾಂಕ್ ಮತ್ತು ಗ್ರಾಹಕರ ಮಧ್ಯೆ ಭೌತಿಕ ಸಂವಹನವೇ ಇಲ್ಲದೇ ಕೆವೈಸಿ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ.