ಈಕ್ವಿಟಿ ಮ್ಯೂಚುವಲ್ ಫಂಡ್: ₹29,911 ಕೋಟಿ ಒಳಹರಿವು

ನವದೆಹಲಿ: ನವೆಂಬರ್‌ ತಿಂಗಳಿನಲ್ಲಿ ದೇಶದ ಈಕ್ವಿಟಿ ಆಧಾರಿತ ಮ್ಯೂಚುವಲ್ ಫಂಡ್‌ನಲ್ಲಿ (ಎಂ.ಎಫ್‌) ₹29,911 ಕೋಟಿಯಷ್ಟು ಒಳಹರಿವು ಆಗಿದೆ. ಇದು ಅಕ್ಟೋಬರ್ ತಿಂಗಳಿಗೆ ಹೋಲಿಸಿದರೆ ಶೇ 21ರಷ್ಟು ಹೆಚ್ಚಳ ಎಂದು ಭಾರತೀಯ ಮ್ಯೂಚುವಲ್ ಫಂಡ್‌ ಕಂಪನಿಗಳ ಒಕ್ಕೂಟವು (ಎಎಂಎಫ್‌ಐ) ಗುರುವಾರ ತಿಳಿಸಿದೆ. 

ಸತತ ಮೂರು ತಿಂಗಳ ಕುಸಿತದ ನಂತರ ಒಳಹರಿವಿನಲ್ಲಿ ಈ ಏರಿಕೆ ಕಂಡು ಬಂದಿದ್ದು, ಹೂಡಿಕೆದಾರರ ಭಾವನೆಯಲ್ಲಿ ಸುಧಾರಣೆಯಾಗಿದೆ. ಅಕ್ಟೋಬರ್‌ನಲ್ಲಿ ₹24,690 ಕೋಟಿ, ಸೆಪ್ಟೆಂಬರ್‌ನಲ್ಲಿ ₹30,421 ಕೋಟಿ ಮತ್ತು ಆಗಸ್ಟ್‌ನಲ್ಲಿ ₹33,430 ಕೋಟಿಯಷ್ಟು ಒಳಹರಿವಾಗಿತ್ತು. 

ಈಕ್ವಿಟಿ ಒಳಹರಿವು ಹೆಚ್ಚಳದಿಂದ ಉದ್ಯಮದ ಒಟ್ಟು ಸಂಪತ್ತಿನ ನಿರ್ವಹಣಾ ಮೌಲ್ಯವು (ಎಯುಎಂ) ನವೆಂಬರ್‌ನಲ್ಲಿ ₹80.80 ಲಕ್ಷ ಕೋಟಿಯಷ್ಟಾಗಿದೆ. ಅಕ್ಟೋಬರ್‌ನಲ್ಲಿ ₹79.87 ಲಕ್ಷ ಕೋಟಿಯಷ್ಟಿತ್ತು. 

ವ್ಯವಸ್ಥಿತ ಹೂಡಿಕೆ ಯೋಜನೆಗಳಲ್ಲಿ (ಎಸ್‌ಐಪಿ) ಒಳಹರಿವು ಅಕ್ಟೋಬರ್‌ನಲ್ಲಿ ₹29,631 ಕೋಟಿಯಷ್ಟಿತ್ತು. ಆದರೆ, ನವೆಂಬರ್‌ನಲ್ಲಿ ₹29,445 ಕೋಟಿಗೆ ಇಳಿದಿದೆ.

ಫ್ಲೆಕ್ಸಿ ಕ್ಯಾಪ್ ಫಂಡ್‌ನಲ್ಲಿ ಒಳಹರಿವು ₹8,135 ಕೋಟಿಯಾಗಿದೆ. ಡೆಟ್‌ ಮ್ಯೂಚುವಲ್ ಫಂಡ್‌ ಹೊರಹರಿವು ₹25,692 ಕೋಟಿಯಷ್ಟಾಗಿದೆ. ಅಕ್ಟೋಬರ್‌ನಲ್ಲಿ ಚಿನ್ನದ ಇಟಿಎಫ್‌ನಲ್ಲಿ ಒಳಹರಿವು ₹7,743 ಕೋಟಿಯಷ್ಟಿತ್ತು. ಇದು ನವೆಂಬರ್‌ಬಲ್ಲಿ ₹3,742 ಕೋಟಿಗೆ ಇಳಿದಿದೆ ಎಂದು ತಿಳಿಸಿದೆ.