ಮತ್ತೆ ಚಿನ್ನದ ದರ ಹೆಚ್ಚಳ; ಬೆಳ್ಳಿ ಧಾರಣೆಯೂ ಅಲ್ಪ ಏರಿಕೆ
ನವದೆಹಲಿ: ಇಲ್ಲಿನ ಚಿನಿವಾರ ಪೇಟೆಯಲ್ಲಿ ಮಂಗಳವಾರ ಚಿನ್ನ ಮತ್ತು ಬೆಳ್ಳಿ ದರ ಚೇತರಿಕೆ ಕಂಡಿದೆ. ಸೋಮವಾರದ ವಹಿವಾಟಿನಲ್ಲಿ ₹ 464ರಷ್ಟು ಇಳಿಕೆಯಾಗಿದ್ದ 10 ಗ್ರಾಂ ಚಿನ್ನದ ದರ, ಇಂದು ₹ 303ರಷ್ಟು ಗಳಿಕೆ ದಾಖಲಿಸಿದೆ.
ಪ್ರಸ್ತುತ 10 ಗ್ರಾಂ ಚಿನ್ನ ₹ 47,853 ತಲುಪಿದ್ದು, ಇದು ಜಾಗತಿಕವಾಗಿ ಚಿನ್ನದ ಬೆಲೆ ಏರಿಕೆಯ ಪರಿಣಾಮವಾಗಿದೆ ಎಂದು ಎಚ್‌ಡಿಎಫ್‌ಸಿ ಸೆಕ್ಯುರಿಟೀಸ್‌ ವಿಶ್ಲೇಷಿಸಿದೆ.
ಪ್ರತಿ ಕೆ.ಜಿ.ಗೆ ₹ 723ರಷ್ಟು ಕಡಿಮೆ ಆಗಿದ್ದ ಬೆಳ್ಳಿ ಧಾರಣೆ, ₹ 134ರಷ್ಟು ಏರಿಕೆಯಾಗಿ ಕೆ.ಜಿ.ಗೆ ₹ 70,261 ಆಗಿದೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಪ್ರತಿ ಔನ್ಸ್‌ ಚಿನ್ನ 1,864.50 ಅಮೆರಿಕನ್‌ ಡಾಲರ್‌ ಹಾಗೂ ಪ್ರತಿ ಔನ್ಸ್‌ ಬೆಳ್ಳಿ 27.65 ಅಮೆರಿಕನ್‌ ಡಾಲರ್‌ಗಳಲ್ಲಿ ವಹಿವಾಟು ನಡೆದಿದೆ.
ಅಮೆರಿಕದ ಫೆಡರಲ್‌ ರಿಸರ್ವ್ ಸಭೆಯತ್ತ ಹೂಡಿಕೆದಾರರ ಗಮನ ಹರಿದಿರುವುದರಿಂದ ಚಿನ್ನದ ದರದಲ್ಲಿ ಏರಿಳಿತವಾಗುತ್ತಿದೆ ಎಂದು ಎಚ್‌ಡಿಎಫ್‌ಸಿ ಸೆಕ್ಯುರಿಟೀಸ್‌ನ ಹಿರಿಯ ವಿಶ್ಲೇಷಕ (ಕಮಾಡಿಟೀಸ್‌) ತಪನ್‌ ಪಟೇಲ್‌ ಹೇಳಿದ್ದಾರೆ.
(1 ಔನ್ಸ್‌ 28.34 ಗ್ರಾಂ ಗಳಿಗೆ ಸಮ)
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.