GST ಸಂಗ್ರಹ: ಕರ್ನಾಟಕದಲ್ಲಿ ಹೆಚ್ಚಳ; ಗುಜರಾತ್‌ನಲ್ಲಿ ಕುಸಿತ ಎಂದ ತಜ್ಞರು

ನವದೆಹಲಿ: ಒಟ್ಟು ಜಿಎಸ್‌ಟಿ ಸಂಗ್ರಹವು ಶೇ 9.1ಕ್ಕೆ ಹೆಚ್ಚಳವಾಗಿದ್ದು, ಫೆಬ್ರುವರಿಯಲ್ಲಿ ₹1.84 ಲಕ್ಷ ಕೋಟಿ ಸಂಗ್ರಹವಾಗಿದೆ. ಇದರಿಂದ ದೇಶೀಯ ಬಳಕೆ ಹೆಚ್ಚಳವಾಗಿದ್ದು, ಆರ್ಥಿಕ ಪುನಶ್ಚೇತನದ ಮುನ್ಸೂಚನೆಯಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಈ ಕುರಿತು ಜಿಎಸ್‌ಟಿ ಸಮಿತಿ ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿದ್ದು, ‘ಕೇಂದ್ರ ಜಿಎಸ್‌ಟಿ ₹35,204 ಕೋಟಿಗೆ ಹೆಚ್ಚಳವಾಗಿದೆ. ರಾಜ್ಯ ಜಿಎಸ್‌ಟಿ ₹43,704 ಕೋಟಿಗೆ ಏರಿಕೆಯಾಗಿದೆ. ಒಟ್ಟು ₹90,870 ಕೋಟಿ ಜಿಎಸ್‌ಟಿ ಸಂಗ್ರಹವಾಗಿದ್ದು, ಸೆಸ್‌ ರೂಪದಲ್ಲಿ ₹13,868 ಕೋಟಿ ಸಂಗ್ರಹವಾಗಿದೆ ಎಂದೆನ್ನಲಾಗಿದೆ.

‘ದೇಶೀಯ ವಹಿವಾಟಿನಲ್ಲಿ ಜಿಎಸ್‌ಟಿ ಆದಾಯವು ಶೇ 10.2ರಷ್ಟು ಹೆಚ್ಚಳವಾಗಿದ್ದು, ಇದರಿಂದ ₹1.42 ಲಕ್ಷ ಕೋಟಿ ಸಂಗ್ರಹವಾಗಿದೆ. ಆಮದು ಪ್ರಮಾಣವೂ ಶೇ 5.4ರಷ್ಟು ಹೆಚ್ಚಳವಾಗಿದ್ದು, ₹41,702 ಕೋಟಿ ಮೊತ್ತ ಫೆಬ್ರುವರಿಯಲ್ಲಿ ಸಂಗ್ರಹವಾಗಿದೆ’ ಎಂದು ಹೇಳಲಾಗಿದೆ.

‘ಮರುಪಾವತಿಯು ಫೆಬ್ರುವರಿಯಲ್ಲಿ ₹20,889 ಕೋಟಿಯಷ್ಟಿದ್ದು, ಇದು 2024ರ ಫೆಬ್ರುವರಿಗೆ ಹೋಲಿಸಿದರೆ ಶೇ 17.3ರಷ್ಟು ಹೆಚ್ಚಳವಾಗಿದೆ. 2025ರ ಒಟ್ಟು ಜಿಎಸ್‌ಟಿ ಸಂಗ್ರಹವು ಶೇ 8.1ರ ಬೆಳವಣಿಗೆ ದರದಲ್ಲಿ ₹1.63 ಲಕ್ಷ ಕೋಟಿ ಸಂಗ್ರಹವಾಗಿದೆ. ಇದರಿಂದ ಒಟ್ಟು ಹಾಗೂ ನಿವ್ವಳ ಜಿಎಸ್‌ಟಿ ಆದಾಯವು 2024ರ ಫೆಬ್ರುವರಿಯಲ್ಲಿ ಕ್ರಮವಾಗಿ ₹1.68 ಲಕ್ಷ ಕೋಟಿ ಹಾಗೂ ₹1.50 ಲಕ್ಷ ಕೋಟಿ ಇತ್ತು. 2025ರ ಫೆಬ್ರುವರಿಯಲ್ಲಿ ಇದು ₹1.84ಲಕ್ಷ ಕೋಟಿಯಷ್ಟು ಸಂಗ್ರಹವಾಗಿದೆ. ಆದರೆ ಜನವರಿಗೆ (₹1.96ಲಕ್ಷ ಕೋಟಿ) ಹೋಲಿಸಿದಲ್ಲಿ ತುಸು ಕಡಿಮೆಯಾಗಿದೆ.

ಡೆಲಾಯ್ಟ್‌ ಇಂಡಿಯಾ ಪಾಲುದಾರ ಕಂಪನಿಯ ಎಂ.ಎಸ್. ಮಣಿ ಅವರು ಈ ಕುರಿತು ಪ್ರತಿಕ್ರಿಯಿಸಿ, ‘ಹರಿಯಾಣ, ಉತ್ತರ ಪ್ರದೇಶ, ಮಹಾರಾಷ್ಟ್ರ, ತಮಿಳುನಾಡು, ಮಧ್ಯಪ್ರದೇಶ ಹಾಗೂ ಕರ್ನಾಟಕದಲ್ಲಿ ಜಿಎಸ್‌ಟಿ ಸಂಗ್ರಹ ಶೇ 10ರಿಂದ 20ರಷ್ಟು ಹೆಚ್ಚಳವಾಗಿದೆ. ತೆಲಂಗಾಣ, ಗುಜರಾತ್‌, ಅಸ್ಸಾಂ, ಆಂಧ್ರಪ್ರದೇಶ, ಒಡಿಶಾದಲ್ಲಿ ಜಿಎಸ್‌ಟಿ ಸಂಗ್ರಹ ಶೇ 1ರಿಂದ 4ರಷ್ಟು ಕುಸಿತ ಕಂಡಿದೆ’ ಎಂದು ಹೇಳಿದೆ.