ಎಲ್ಆ್ಯಂಡ್ಟಿ ರಿಯಾಲ್ಟಿಯಿಂದ ಕಚೇರಿ ಸ್ಥಳ ನಿರ್ಮಾಣ
ಬೆಂಗಳೂರು: ಎಲ್ಆ್ಯಂಡ್ಟಿ ಕಂಪನಿಯ ಅಂಗಸಂಸ್ಥೆಯಾಗಿರುವ ಎಲ್ಆ್ಯಂಡ್ಟಿ ರಿಯಾಲ್ಟಿ ಮತ್ತು ಸಿಂಗಪುರದ ಕ್ಯಾಪಿಟಾಲ್ಯಾಂಡ್ ಇಂಡಿಯಾ ಟ್ರಸ್ಟ್ ಮ್ಯಾನೇಜ್‌ಮೆಂಟ್‌ ಪ್ರೈವೇಟ್ ಲಿಮಿಟೆಡ್ ಒಟ್ಟಾಗಿ ದೇಶದಲ್ಲಿ 60 ಲಕ್ಷ ಚದರ ಅಡಿ ವೀಸ್ತೀರ್ಣದ ಕಚೇರಿ ಸ್ಥಳಗಳನ್ನು ಅಭಿವೃದ್ಧಿಪಡಿಸಲಿವೆ. ಈ ವಿಚಾರವಾಗಿ ಎರಡೂ ಕಂಪನಿಗಳ ನಡುವೆ ಒಪ್ಪಂದ ಆಗಿದೆ.
ಬೆಂಗಳೂರು, ಚೆನ್ನೈ ಮತ್ತು ಮುಂಬೈ ಮಹಾನಗರಗಳಲ್ಲಿ ಒಟ್ಟು 60 ಲಕ್ಷ ಚದರ ಅಡಿ ವಿಸ್ತೀರ್ಣದ ಕಚೇರಿ ಸ್ಥಳಗಳನ್ನು ಈ ಎರಡು ಕಂಪನಿಗಳು ನಿರ್ಮಾಣ ಮಾಡಲಿವೆ.
ನಿರ್ಮಾಣ ಯೋಜನೆಯು 2024ರ ದ್ವಿತೀಯಾರ್ಧದಲ್ಲಿ ಆರಂಭವಾಗಲಿದ್ದು,ಕ್ಯಾಪಿಟಾಲ್ಯಾಂಡ್ ಇಂಡಿಯಾ ಟ್ರಸ್ಟ್ (ಕ್ಲಿಂಟ್) ಇದರಲ್ಲಿ ಹೆಚ್ಚಿನ ಹೂಡಿಕೆ ಮಾಡುವ ನಿರೀಕ್ಷೆ ಇದೆ ಎಂದು ಪ್ರಕಟಣೆ ತಿಳಿಸಿದೆ. ಎಲ್ಆ್ಯಂಡ್ಟಿ ರಿಯಾಲ್ಟಿ ಅಭಿವೃದ್ಧಿಪಡಿಸುವ ಈ ಕಚೇರಿ ಸ್ಥಳಗಳ ಮಾಲಿಕತ್ವವನ್ನು ಕ್ಲಿಂಟ್ ಹಂತ ಹಂತವಾಗಿ ಸ್ವಾಧೀನಕ್ಕೆ ಪಡೆಯಲಿದೆ.
‘ಭಾರತದಲ್ಲಿ ಕಚೇರಿ ಸ್ಥಳಗಳ ಗುತ್ತಿಗೆ ಮಾರುಕಟ್ಟೆ ಬೆಳೆಯುತ್ತಿದೆ. 2022ರ ಜನವರಿ–ಸೆಪ್ಟೆಂಬರ್ ಅವಧಿಯಲ್ಲಿ 3 ಕೋಟಿ ಚದರ ಅಡಿ ವಿಸ್ತೀರ್ಣದ ಕಚೇರಿ ಸ್ಥಳ ಮಾರಾಟವಾಗಿದೆ. ಇದು ಕಳೆದ ಮೂರು ವರ್ಷಗಳ ಅತ್ಯಧಿಕ ಮಟ್ಟ’ ಎಂದುಎಲ್ಆ್ಯಂಡ್‌ಟಿ ರಿಯಾಲ್ಟಿ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ (ಸಿಇಒ) ಮತ್ತು ವ್ಯವಸ್ಥಾಪಕ ನಿರ್ದೇಶಕ ಶ್ರೀಕಾಂತ್ ಜೋಷಿ ತಿಳಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.