₹2,000 ಮುಖಬೆಲೆಯ ನೋಟುಗಳು ಈಗಲೂ ಚಲಾವಣೆಯಲ್ಲಿವೆ: ಆರ್‌ಬಿಐ

ಮುಂಬೈ: ₹2,000 ಮುಖಬೆಲೆಯ ಒಟ್ಟು ₹5,956 ಕೋಟಿ ಮೌಲ್ಯದ ನೋಟುಗಳು ಈಗಲೂ ಜನರ ಕೈಯಲ್ಲಿ ಇವೆ ಎಂದು ಆರ್‌ಬಿಐ ಸೋಮವಾರ ಹೇಳಿದೆ.

ಆರ್‌ಬಿಐ ಈ ಮುಖಬೆಲೆಯ ನೋಟುಗಳನ್ನು 2023ರ ಮೇ 19ರಿಂದ ಚಲಾವಣೆಯಿಂದ ಹಿಂಪಡೆದಿದೆ. ಆದರೆ ಈ ನೋಟುಗಳು ಅಮಾನ್ಯ ಅಲ್ಲ.

2023ರ ಮೇ 19ರಂದು ಚಲಾವಣೆಯಲ್ಲಿ ಇದ್ದ ಈ ಮುಖಬೆಲೆಯ ನೋಟುಗಳ ಒಟ್ಟು ಮೊತ್ತವು ₹3.56 ಲಕ್ಷ ಕೋಟಿ ಆಗಿತ್ತು ಎಂದು ತಿಳಿಸಿದೆ. ಅಂದರೆ, ಈವರೆಗೆ ₹2,000 ಮುಖಬೆಲೆಯ ನೋಟುಗಳ ಪೈಕಿ ಶೇ 98.33ರಷ್ಟು ನೋಟುಗಳು ವಾಪಸ್ ಬಂದಿವೆ.

ಈ ಮುಖಬೆಲೆಯ ನೋಟುಗಳನ್ನು ಬೆಂಗಳೂರು ಸೇರಿದಂತೆ ಆರ್‌ಬಿಐನ 19 ಕಚೇರಿಗಳ ಮೂಲಕ ಬೇರೆ ನೋಟುಗಳಿಗೆ ವಿನಿಮಯ ಮಾಡಿಕೊಳ್ಳಲು ಅವಕಾಶ ಇದೆ. ಸಾರ್ವಜನಿಕರು ಅಂಚೆ ಮೂಲಕ ಈ ನೋಟುಗಳನ್ನು ಆರ್‌ಬಿಐ ಕಚೇರಿಗೆ ಕಳುಹಿಸಿ, ಅದನ್ನು ತಮ್ಮ ಖಾತೆಗೆ ಜಮಾ ಮಾಡುವಂತೆ ಹೇಳಬಹುದು.