ಅಮೆರಿಕ ಡಾಲರ್ ಎದುರು 35 ಪೈಸೆ ಏರಿಕೆ ಕಂಡ ಭಾರತದ ರೂಪಾಯಿ ಮೌಲ್ಯ

ಮುಂಬೈ: ಸತತ ಎರಡನೇ ದಿನವೂ ಅಮೆರಿಕ ಡಾಲರ್ ಎದುರು ಭಾರತದ ರೂಪಾಯಿ ಮೌಲ್ಯ ಏರಿಕೆ ದಾಖಲಿಸಿದೆ. ದಿನದ ವಹಿವಾಟು ಅಂತ್ಯಕ್ಕೆ ಅಮೆರಿಕ ಡಾಲರ್ ಎದುರು ಭಾರತದ ರೂಪಾಯಿ ಮೌಲ್ಯ 35 ಪೈಸೆಯಷ್ಟು ಏರಿಕೆ ಕಂಡು ₹85.10ಕ್ಕೆ ಸ್ಥಿರಗೊಂಡಿತು.

ದೇಶೀಯ ಷೇರುಪೇಟೆಗಳಲ್ಲಿ ಸಕಾರಾತ್ಮಕ ಪ್ರವೃತ್ತಿ ಮತ್ತು ವಿದೇಶಿ ವಿನಿಮಯದಲ್ಲಿ ದುರ್ಬಲಗೊಂಡ ಅಮೆರಿಕ ಕರೆನ್ಸಿ ಈ ಬೆಳವಣಿಗೆಗೆ ಕಾರಣವಾಗಿದೆ.

ವಿದೇಶಿ ವಿನಿಮಯ ವ್ಯಾಪಾರಿಗಳ ಪ್ರಕಾರ, ವಿದೇಶಿ ನಿಧಿಗಳ ಒಳಹರಿವು ಮತ್ತು 2025ರ ಹಣಕಾಸು ವರ್ಷದಲ್ಲಿ ಸರ್ಕಾರಕ್ಕೆ ₹2.69 ಲಕ್ಷ ಕೋಟಿ ದಾಖಲೆಯ ಲಾಭಾಂಶವನ್ನು ನೀಡುವ ಆರ್‌ಬಿಐ ಘೋಷಣೆಯು ಸ್ಥಳೀಯ ಕರೆನ್ಸಿಗೆ ಬಲ ನೀಡಿದೆ. ಕಚ್ಚಾ ತೈಲ ಬೆಲೆಗಳಲ್ಲಿ ಸ್ವಲ್ಪ ಚೇತರಿಕೆಯು ಸಹ ಪರಿಣಾಮ ಬೀರಿದೆ.

ಅಂತರಬ್ಯಾಂಕ್ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ರೂಪಾಯಿ ₹85.02ಕ್ಕೆ ಆರಂಭವಾಗಿತ್ತು. ದಿನದ ವಹಿವಾಟಿನಲ್ಲಿ ಡಾಲರ್ ಎದುರು ಗರಿಷ್ಠ ₹84.78 ಮತ್ತು ₹85.18ರ ಕನಿಷ್ಠ ಮಟ್ಟಗಳ ನಡುವೆ ವ್ಯವಹಾರ ನಡೆಸಿತು. ಅಂತಿಮವಾಗಿ, ಹಿಂದಿನ ಮುಕ್ತಾಯಕ್ಕಿಂತ 35 ಪೈಸೆ ಏರಿಕೆ ಕಂಡಿತು.

ಶುಕ್ರವಾರ, ಅಮೆರಿಕ ಡಾಲರ್ ವಿರುದ್ಧ ರೂಪಾಯಿ ಮೌಲ್ಯ 50 ಪೈಸೆ ಏರಿಕೆಯಾಗಿ ₹85.45ಕ್ಕೆ ಮುಕ್ತಾಯವಾಗಿತ್ತು.

ಏಪ್ರಿಲ್‌ ತಿಂಗಳ ಕೈಗಾರಿಕಾ ಮತ್ತು ಉತ್ಪಾದನಾ ಉತ್ಪಾದನಾ ದತ್ತಾಂಶ, ತ್ರೈಮಾಸಿಕದ ಜಿಡಿಪಿ ಬೆಳವಣಿಗೆಯ ವರದಿ ಈ ವಾರ ಬಿಡುಗಡೆಯಾಗಲಿರುವುದು ಕರೆನ್ಸಿ ಮೇಲೆ ಪರಿಣಾಮ ಬೀರಿದೆ.

ದೇಶೀಯ ಮಾರುಕಟ್ಟೆಗಳ ಸಕಾರಾತ್ಮಕ ಬೆಳವಣಿಗೆ ಮತ್ತು ದುರ್ಬಲ ಅಮೆರಿಕ ಡಾಲರ್ ಸೂಚ್ಯಂಕದ ಪರಿಣಾಮವಾಗಿ ರೂಪಾಯಿ ಮೌಲ್ಯ ಏರಿಕೆಯಾಗಿದೆ ಎಂದು ಮಿರೇ ಅಸೆಟ್ ಶೇರ್‌ಖಾನ್‌ನ ಸಂಶೋಧನಾ ವಿಶ್ಲೇಷಕ ಅನುಜ್ ಚೌಧರಿ ಹೇಳಿದ್ದಾರೆ.