₹2,000 ಮೀರಿದ UPI ವಹಿವಾಟುಗಳಿಗೆ ಇನ್ಮುಂದೆ ಜಿಎಸ್‌ಟಿ ವಿಧಿಸಲಾಗುತ್ತದೆಯೇ?

ಬೆಂಗಳೂರು: ₹2,000 ಮೀರಿದ ಯುಪಿಐ ವಹಿವಾಟುಗಳಿಗೆ ಇನ್ಮುಂದೆ ಜಿಎಸ್‌ಟಿ ವಿಧಿಸಲಾಗುತ್ತದೆ ಎಂದು ಕೆಲ ವರದಿಗಳು ಅನೇಕ ಕಡೆ ಪ್ರಸಾರವಾಗಿದ್ದವು.

ಆದರೆ, ಈ ವರದಿಗಳನ್ನು ಕೇಂದ್ರ ಹಣಕಾಸು ಇಲಾಖೆ ತಳ್ಳಿಹಾಕಿದೆ. ಅಂತಹ ಯಾವುದೇ ಪ್ರಸ್ತಾವನೆಗಳು ನಮ್ಮ ಮುಂದೆ ಇಲ್ಲ ಎಂದು ಹೇಳಿದೆ.

ಈ ಕುರಿತು ಕೇಂದ್ರ ಹಣಕಾಸು ಇಲಾಖೆ ಪಿಐಬಿ ಮೂಲಕ ಮಾಹಿತಿ ಹಂಚಿಕೊಂಡಿದ್ದು, ‘ಕೇಂದ್ರ ಸರ್ಕಾರ ಇನ್ಮುಂದೆ ₹2000 ಮೀರಿದ ಯುಪಿಐ ವಹಿವಾಟುಗಳಿಗೆ ಜಿಎಸ್‌ಟಿ ವಿಧಿಸುತ್ತದೆ ಎಂದು ಕೆಲ ವರದಿಗಳು ಹೇಳಿವೆ. ಇದು ಸಂಪೂರ್ಣ ಸುಳ್ಳು. ಸದ್ಯಕ್ಕೆ ಅಂತಹ ಯಾವುದೇ ಪ್ರಸ್ತಾವಗಳು ಇಲಾಖೆಯ ಮುಂದೆ ಇಲ್ಲ‘ ಎಂದು ತಿಳಿಸಿದೆ.

‘ಈ ಮೊದಲು ಯುಪಿಐ ಮೂಲಕ ವ್ಯಾಪಾರಿಗಳು ಎಂಡಿಆರ್ (Merchant Discount Rate) ನೀಡುವಾಗ ಅದಕ್ಕೆ ಜಿಎಸ್‌ಟಿ ವಿಧಿಸಲಾಗುತ್ತಿತ್ತು. 2020 ರಲ್ಲಿ ಅದನ್ನೂ ತೆಗೆದುಹಾಕಲಾಗಿದೆ. ಹೀಗಾಗಿ ಯುಪಿಐ ವಹಿವಾಟುಗಳಿಗೆ ಯಾವುದೇ ಜಿಎಸ್‌ಟಿ ಇರುವುದಿಲ್ಲ’ ಎಂದು ಹೇಳಿದೆ.

‘ಯುಪಿಐ ವಹಿವಾಟುಗಳಿಗೆ ಉತ್ತೇಜನ ನೀಡುವ ಮೂಲಕ ಡಿಜಿಟಲ್ ಇಂಡಿಯಾ ಯೋಜನೆಯನ್ನು ಸಾಕಾರಗೊಳಿಸುವುದೇ ಆಗಿದೆ. ಗಾಳಿಸುದ್ದಿಗಳಿಗೆ ಕಿವಿಗೊಡಬೇಡಿ’ ಎಂದು ಎಚ್ಚರಿಸಿದೆ.