ಮಾಹಿತಿ ಕಣಜ | ಸಣ್ಣ ಹೂಡಿಕೆದಾರರಿಗೆ ದೊಡ್ಡ ಅನುಕೂಲ

ಭಾರತದಲ್ಲಿ ಸರ್ಕಾರದ ಬಾಂಡ್‌ಗಳ ಮೇಲಿನ ಹೂಡಿಕೆಯಲ್ಲಿ ಸಣ್ಣ ಹೂಡಿಕೆದಾರರ ಪಾಲು ಹೆಚ್ಚಬೇಕು ಎಂಬ ಉದ್ದೇಶದಿಂದ ಆರ್‌ಬಿಐ ಆರಂಭಿಸಿರುವ ಯೋಜನೆ ‘ಆರ್‌ಬಿಐ ರಿಟೇಲ್‌ ಡೈರೆಕ್ಟ್‌’.

ಸಣ್ಣ ಹೂಡಿಕೆದಾರರಿಗೆ ನೆರವಾಗುವ ಉದ್ದೇಶದಿಂದ ಆರ್‌ಬಿಐ, ರಿಟೇಲ್‌ ಡೈರೆಕ್ಟ್‌ ಹೆಸರಿನಲ್ಲಿ ಪೋರ್ಟಲ್‌ ಒಂದನ್ನು ಕೂಡ ತೆರೆದಿದೆ. ಈ ಪೋರ್ಟಲ್‌ಗೆ ಭೇಟಿ ನೀಡಿ, ಅಗತ್ಯ ಮಾಹಿತಿ ಒದಗಿಸಿ ಹೂಡಿಕೆದಾರರು ಖಾತೆ ತೆರೆಯಬಹುದು. ನಂತರ ಸರ್ಕಾರಿ ಬಾಂಡ್‌ಗಳಲ್ಲಿ ಹಣ ತೊಡಗಿಸಬಹುದು. ವಿವಿಧ ರಾಜ್ಯ ಸರ್ಕಾರಗಳು ಹೊರಡಿಸುವ ಬಾಂಡ್‌ಗಳಲ್ಲಿಯೂ ಹಣ ಹೂಡಿಕೆ ಮಾಡಬಹುದು.

https://rbiretaildirect.org.in ವೆಬ್‌ಸೈಟ್‌ಗೆ ಭೇಟಿ ನೀಡಿ ಈ ಎಲ್ಲ ಕೆಲಸಗಳನ್ನು ಮಾಡಬಹುದು. ಅಲ್ಲದೆ, ಆ್ಯಂಡ್ರಾಯ್ಡ್‌ ಹಾಗೂ ಐಒಎಸ್‌ ಬಳಕೆದಾರರಿಗೆ ಅಗತ್ಯವಿರುವ ಆ್ಯಪ್‌ಗಳನ್ನು ಕೂಡ ಅಭಿವೃದ್ಧಿಪಡಿಸಲಾಗಿದೆ. ಆ್ಯಪ್‌ ಬಳಸಿಯೂ ಖಾತೆ ತೆರೆಯಬಹುದು.

ಈ ಪೋರ್ಟಲ್‌ನಲ್ಲಿ ಇರುವ ಮಾಹಿತಿ ಅನ್ವಯ, ಮೊಬೈಲ್‌ ದೂರವಾಣಿ ಸಂಖ್ಯೆ, ಪ್ಯಾನ್‌ ಕಾರ್ಡ್‌, ವಿಳಾಸದ ದಾಖಲೆ, ಇ–ಮೇಲ್‌ ವಿಳಾಸ ಮತ್ತು ಬ್ಯಾಂಕ್‌ ಖಾತೆ ಇದ್ದರೆ ಹೂಡಿಕೆಗೆ ಖಾತೆ ತೆರೆಯಲು ಸಾಧ್ಯ.