ಅಮೆರಿಕದಿಂದ ಔಷಧ ಉತ್ಪನ್ನಗಳ ಮೇಲೆ ಶೇ 100ರಷ್ಟು ಸುಂಕ: ಷೇರುಪೇಟೆ ಕುಸಿತ

ಮುಂಬೈ: ಔಷಧ ಉತ್ಪನ್ನಗಳ ಮೇಲೆ ಅಮೆರಿಕದಿಂದ ಶೇ 100ರಷ್ಟು ಸುಂಕ ಸೇರಿದಂತೆ ವಿವಿಧ ಆಮದು ವಸ್ತುಗಳ ಮೇಲೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸುಂಕ ಹೇರಿಕೆ ಕ್ರಮದಿಂದಾಗಿ ಭಾರತೀಯ ಷೇರು ಮಾರುಕಟ್ಟೆ ಶುಕ್ರವಾರ ಕುಸಿತದೊಂದಿಗೆ ವಹಿವಾಟು ಆರಂಭಿಸಿದೆ.

ಸುಂಕ ಹೇರಿಕೆಯ ಜತೆಗೆ ಎಚ್‌1ಬಿ ವೀಸಾ ಶುಲ್ಕ ಕುರಿತಾದ ಕಳವಳ ಮುಂದುವರಿದಿರುವುದರಿಂದ ವಿದೇಶಿ ಬಂಡವಾಳದ ಹೊರಹರಿವು ಹೆಚ್ಚಳವಾಗಿೆುವುದೂ ಮಾರುಕಟ್ಟೆ ಮೇಲೆ ಪರಿಣಾಮ ಬೀರಿದೆ.

‘ಅಕ್ಟೋಬರ್ 1ರಿಂದ ಜಾರಿಗೆ ಬರುವಂತೆ ಬ್ರಾಂಡೆಡ್ ಅಥವಾ ಪೇಟೆಂಟ್ ಪಡೆದ ಔಷಧ ಉತ್ಪನ್ನಗಳ ಆಮದಿನ ಮೇಲೆ ಶೇ 100ರಷ್ಟು ಸುಂಕ ವಿಧಿಸುವುದಾಗಿ ಟ್ರಂಪ್ ಆಡಳಿತ ಘೋಷಿಸಿದ ನಂತರ ದೇಶೀಯ ಔಷಧ ಕ್ಷೇತ್ರದ ಮೇಲೆ ಹೂಡಿಕೆದಾರರ ಕಳವಳ ಹೆಚ್ಚಾಗಿದೆ. H-1B ವೀಸಾ ಶುಲ್ಕದಲ್ಲಿನ ಭಾರಿ ಏರಿಕೆಯ ಬೆನ್ನಲ್ಲೇ ಐಟಿ ಷೇರುಗಳು ಕುಸಿತ ಕಂಡಿದ್ದವು. ಇದರ ಬೆನ್ನಲ್ಲೇ ಈಗ ಫಾರ್ಮಾ ಷೇರುಗಳ ಮೇಲೆ ಕಳವಳ ಉಂಟಾಗಿದೆ’ಎಂದು ಆನ್‌ಲೈನ್ ವ್ಯಾಪಾರ ಮತ್ತು ಸಂಪತ್ತು ತಂತ್ರಜ್ಞಾನ ಸಂಸ್ಥೆಯಾದ ಎನ್‌ರಿಚ್ ಮನಿ ಸಿಇಒ ಪೊನ್ಮುಡಿ. ಆರ್ ಹೇಳಿದ್ದಾರೆ.

30 ಷೇರುಗಳ ಬಿಎಸ್‌ಇ ಸೆನ್ಸೆಕ್ಸ್ ಆರಂಭಿಕ ವಹಿವಾಟಿನಲ್ಲಿ 329.66 ಅಂಕಗಳು ಕುಸಿದು 80,830.02ಕ್ಕೆ ತಲುಪಿತ್ತು. 50 ಷೇರುಗಳ ಎನ್‌ಎಸ್‌ಇ ನಿಫ್ಟಿ 105.7 ಅಂಶಗಳು=ಷ್ಟು ಕುಸಿದು 24,785.15ಕ್ಕೆ ತಲುಪಿತ್ತು.

ಸೆನ್ಸೆಕ್ಸ್ ಸಂಸ್ಥೆಗಳ ಪೈಕಿ, ಸನ್ ಫಾರ್ಮಾ ಶೇ 3ಕ್ಕಿಂತ ಹೆಚ್ಚು ಕುಸಿದಿದೆ. ಏಷ್ಯನ್ ಪೇಂಟ್ಸ್, ಟೆಕ್ ಮಹೀಂದ್ರ, ಇನ್ಫೊಸಿಸ್, ಪವರ್ ಗ್ರಿಡ್, ಎಚ್‌ಸಿಎಲ್ ಟೆಕ್ ಮತ್ತು ಟಾಟಾ ಸ್ಟೀಲ್ ಕೂಡ ನಷ್ಟ ಕಂಡಿವೆ.

ಆದರೂ ಲಾರ್ಸೆನ್ ಅಂಡ್ ಟೊರ್ಬೊ, ಟಾಟಾ ಮೋಟಾರ್ಸ್, ಐಟಿಸಿ ಮತ್ತು ಟ್ರೆಂಟ್ ಲಾಭ ಗಳಿಸಿವೆ.

ಏಷ್ಯಾ ಷೇರುಪೇಟೆಗಳ ಪೈಕಿ ದಕ್ಷಿಣ ಕೊರಿಯಾದ ಕಾಸ್ಪಿ, ಜಪಾನ್‌ನ ನಿಕ್ಕಿ 225 ಸೂಚ್ಯಂಕ, ಶಾಂಘೈನ ಎಸ್‌ಎಸ್‌ಇ ಕಾಂಪೊಸಿಟ್ ಸೂಚ್ಯಂಕ ಮತ್ತು ಹಾಂಗ್‌ಕಾಂಗ್‌ನ ಹ್ಯಾಂಗ್ ಸೆಂಗ್ ಿಳಿಕೆ ಕಂಡಿವೆ.

ವಿನಿಮಯ ಕೇಂದ್ರದ ಮಾಹಿತಿ ಪ್ರಕಾರ, ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಗುರುವಾರ ₹4,995.42 ಕೋಟಿ ಮೌಲ್ಯದ ಷೇರುಗಳ ಮಾರಾಟ ಮಾಡಿದ್ದಾರೆ.