ಪ್ರತಿ ಸುಂಕ ಜಾರಿಗೆ 90 ದಿನಗಳ ವಿರಾಮ: ಅಮೆರಿಕದ ಷೇರುಪೇಟೆ ದಾಖಲೆ ಏರಿಕೆ

ನ್ಯೂಯಾರ್ಕ್‌: ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು, ಪ್ರತಿ ಸುಂಕ ಜಾರಿಗೆ 90 ದಿನಗಳವರೆಗೆ ವಿರಾಮ ಘೋಷಿಸಿರುವುದರಿಂದ ಅಮೆರಿಕದ ಷೇರುಪೇಟೆಗಳು ಭಾರಿ ಏರಿಕೆ ಕಂಡಿದ್ದು, ಹೊಸ ದಾಖಲೆ ಬರೆದಿವೆ.

ಎಸ್ ಆ್ಯಂಡ್‌ ಪಿ 500 ಸೂಚ್ಯಂಕವು ಶೇ 9.5ರಷ್ಟು ಹೆಚ್ಚಳ ಕಂಡಿದೆ. ಡೌನ್‌ ಜೋನ್ಸ್‌ ಸೂಚ್ಯಂಕವು ಶೇ 7.9 ಹಾಗೂ ನಾಸ್ಡಾಕ್ ಕಂಪೋಸಿಟ್‌ ಶೇ 12.2ರಷ್ಟು ಏರಿಕೆಯಾಗಿದೆ. 

ಟ್ರಂಪ್‌ ನಿರ್ಧಾರವು ಹೂಡಿಕೆದಾರರಲ್ಲಿ ಆತ್ಮವಿಶ್ವಾಸ ಹೆಚ್ಚಿಸಿದೆ. ಇದರಿಂದ ಸಕಾರಾತ್ಮಕ ವಹಿವಾಟು ನಡೆದಿದೆ ಎಂದು ಮಾರುಕಟ್ಟೆ ತಜ್ಞರು ತಿಳಿಸಿದ್ದಾರೆ. 

ಸುಂಕ ನೀತಿ ಘೋಷಣೆಯಿಂದಾಗಿ ಮಾರುಕಟ್ಟೆಗಳಲ್ಲಿ ಅನಿಶ್ಚಿತ ಸ್ಥಿತಿ ತಲೆದೋರಿತ್ತು. ಇದು ಭಾರತ ಸೇರಿ ಜಾಗತಿಕ ಷೇರುಪೇಟೆಗಳ ಮೇಲೂ ಪರಿಣಾಮ ಬೀರಿತ್ತು. ಟ್ರಂಪ್‌ ಆಡಳಿತ ಕೈಗೊಂಡಿರುವ ನಿರ್ಧಾರದಿಂದ ಅಮೆರಿಕದ ಷೇರು ಸೂಚ್ಯಂಕಗಳು ಚೇತರಿಕೆಯ ಹಳಿಗೆ ಮರಳಿವೆ ಎಂದು ಹೇಳಿದ್ದಾರೆ.