ಬನ್ನೇರುಘಟ್ಟ ಆನೆ ಕುಟುಂಬಕ್ಕೆ ಮತ್ತೊಬ್ಬ ಅತಿಥಿ; ಗಂಡು ಮರಿಗೆ ಜನ್ಮನೀಡಿದ ‘ವೇದಾ’

ಆನೇಕಲ್: ತಾಲ್ಲೂಕಿನ ಬನ್ನೇರುಘಟ್ಟ ಜೈವಿಕ ಉದ್ಯಾನದ ಎಲ್ಲರ ಅಚ್ಚುಮೆಚ್ಚಿನ ಆನೆ ವೇದಾ ಶುಕ್ರವಾರ ಗಂಡು ಮರಿಗೆ ಜನ್ಮ ನೀಡಿದ್ದಾಳೆ. ಹೊಸ ಅತಿಥಿಯ ಆಗಮನ ಮತ್ತು ಮರಿ ಆನೆಯು ತುಂಟಾತ ಬನ್ನೇರುಘಟ್ಟ ಜೈವಿಕ ಉದ್ಯಾನದಲ್ಲಿ ಸಂತಸ ತಂದಿದೆ.

ಒಂದು ತಿಂಗಳಿನಲ್ಲಿ ಎರಡು ಮರಿಗಳು ಆನೆಗಳ ಕುಟುಂಬಕ್ಕೆ ಸೇರ್ಪಡೆಯಾಗಿವೆ. ನೂತನ ಅತಿಥಿಯ ಆಗಮನದಿಂದ ಬನ್ನೇರುಘಟ್ಟದ ಆನೆ ಕುಟುಂಬದ ಸಂಖ್ಯೆ 26ಕ್ಕೆ ಏರಿದೆ. 

ವೇದಾ ಜನ್ಮ ನೀಡುತ್ತಿರುವ ಐದನೇ ಮರಿ ಇದಾಗಿದೆ. ಚಂಪಾ, ಐರಾವತ, ಶ್ರುತಿ, ಐಹಿಲ್ಯ ಎಂಬ ನಾಲ್ಕು ಮರಿಗಳಿಗೆ ವೇದಾ ಜನ್ಮ ನೀಡಿದ್ದಾಳೆ ಎಂದು ಉದ್ಯಾನದ ಕಾರ್ಯನಿರ್ವಾಹಕ ನಿರ್ದೇಶಕ ಸೂರ್ಯಸೇನ್‌ ತಿಳಿಸಿದರು.

ಆನೆ ಮರಿ ಅಂದಾಜು 120 -130 ಕೆ.ಜಿಗೂ ಹೆಚ್ಚು ತೂಕವಿದ್ದು, ಆರೋಗ್ಯವಾಗಿದೆ. ಉದ್ಯಾನದ ಇತರ ಸಿಬ್ಬಂದಿಯೂ ತಾಯಿ ಮತ್ತು ಮರಿಯಾನೆಯನ್ನು ಅತ್ಯಂತ ಜತನದಿಂದ ನೋಡಿಕೊಳ್ಳುತ್ತಿದ್ದಾರೆ. ವೇದಾಳ ಮಾವುತ ಮಣಿಕಂಠ ಮತ್ತು ದ್ಯಾವಪ್ಪ ಆನೆ ಮತ್ತು ಮರಿಯ ಆರೈಕೆಯಲ್ಲಿ ತೊಡಗಿದ್ದಾರೆ. ತಾಯಿಗೆ ವಿಶೇಷ ಆರೈಕೆ ಮಾಡಲಾಗುತ್ತಿದೆ. ಉದ್ದು, ಅವಲಕ್ಕಿ, ಕಡಲೆಕಾಳು, ಹೆಸರಕಾಳು, ತೆಂಗಿನಕಾಯಿ ಸೇರಿದಂತೆ ವಿಶೇಷ ಆಹಾರವನ್ನು ನೀಡಲಾಗುತ್ತಿದೆ. 

ಮರಿಯು ತಾಯಿಯ ಹಾಲನ್ನೇ ಅವಲಂಬಿಸಿರುವುದರಿಂದ ತಾಯಿ ಹೆಚ್ಚು ಹಾಲು ನೀಡಲು ಅನುಕೂಲವಾಗುವಂತೆ ಪೌಷ್ಟಿಕ ಆಹಾರ ನೀಡಲಾಗುತ್ತಿದೆ ಎಂದು ಉದ್ಯಾನದ ಆನೆ ಮೇಲ್ವಿಚಾರಕ ಸುರೇಶ್‌ ತಿಳಿಸಿದರು.