ಮೆಟ್ರೊ ಪ್ರಯಾಣಿಕರಿಗೆ ಸಿಹಿಸುದ್ದಿ; ಇನ್ಮುಂದೆ ಪಾಸ್ ಪಡೆದು ಪ್ರಯಾಣಿಸಬಹುದು

ಬೆಂಗಳೂರು: ‘ನಮ್ಮ ಮೆಟ್ರೊ’ ಪ್ರಯಾಣಿಕರ ಅನುಕೂಲಕ್ಕಾಗಿ ಒಂದು ದಿನದ ಮತ್ತು ಮೂರು ದಿನದ ಪಾಸ್‌ಗಳನ್ನು ಬೆಂಗಳೂರು ಮೆಟ್ರೊ ರೈಲು ನಿಗಮ (ಬಿಎಂಆರ್‌ಸಿಎಲ್) ಪರಿಚಯಿಸಿದೆ.

ಏ.2ರಿಂದ ಈ ಯೋಜನೆಗೆ ಚಾಲನೆ ದೊರಯಲಿದೆ. ₹200 ದರದ ಒಂದು ದಿನದ ಪಾಸ್‌ ಖರೀದಿಸಿದವರು ಆ ದಿನ ಮೆಟ್ರೊ ರೈಲಿನಲ್ಲಿ ಅನಿಯಮಿತವಾಗಿ ಪ್ರಯಾನಿಸಬಹುದು. ₹400 ಮೊತ್ತದ ಪಾಸ್ ಖರೀದಿಸಿದವರು ಮೂರು ದಿನ ಅನಿಯಮಿತವಾಗಿ ಪ್ರಯಾಣಿಸಲು ಅವಕಾಶ ಇದೆ. ಎರಡೂ ಪಾಸ್‌ಗಳಲ್ಲಿ ಮರುಪಾವತಿಸಬಹುದಾದ ₹50 ಭದ್ರತಾ ಠೇವಣಿ ಒಳಗೊಂಡಿರುತ್ತದೆ.

ಪಾಸ್‌ಗಳು ನಿಲ್ದಾಣದ ಟಿಕೆಟ್ ಕೌಂಟರ್‌ಗಳಲ್ಲಿ ಲಭ್ಯವಿರುತ್ತದೆ. ಪ್ರಯಾಣ ಪೂರ್ಣಗೊಳಿಸಿದ ನಂತರ ಉತ್ತಮ ಸ್ಥಿತಿಯಲ್ಲಿರುವ ಸ್ಮಾರ್ಟ್‌ ಕಾರ್ಡ್‌ಗಳನ್ನು (ಪಾಸ್‌) ಗ್ರಾಹಕ ಸಂಪರ್ಕ ಕೇಂದ್ರಗಳಲ್ಲಿ ಹಿಂದಿರುಗಿಸಿದರೆ ಭದ್ರತಾ ಠೇವಣಿ ₹50 ಹಿಂಪಡೆಯಬಹುದು ಎಂದು ಬಿಎಂಆರ್‌ಸಿಎಲ್ ತಿಳಿಸಿದೆ.

ಸ್ಮಾರ್ಟ್‌ ಕಾರ್ಡ್‌ಗೆ ರೀಚಾರ್ಜ್ ಮಾಡಿಕೊಂಡು 15 ದಿನಗಳಲ್ಲಿ ಬಳಕೆ ಮಾಡಲು ಸಾಧ್ಯವಾಗದಿದ್ದರೆ ವಾಪಸ್‌ ಪಡೆದುಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ. 30 ದಿನಗಳ ಶೇ 2.5ರಷ್ಟು ರದ್ದತಿ ಶುಲ್ಕ ಕಡಿತಗೊಳಿಸಿ ಬಾಕಿ ಮೊತ್ತ ಪಾವತಿ ಮಾಡಲಾಗುವುದು ಎಂದು ಸ್ಪಷ್ಟಪಡಿಸಿದೆ.