ಬೆಂಗಳೂರು: ಉದ್ಯಮಿಗೆ ₹1.80 ಕೋಟಿ ವಂಚನೆ

ಬೆಂಗಳೂರು: ಬೇರೊಬ್ಬರಿಗೆ ಸೇರಬೇಕಾದ ಸಾಲದ ಹಣವನ್ನು ತನ್ನ ಖಾತೆಗೆ ವರ್ಗಾವಣೆ ಮಾಡಿಸಿಕೊಂಡು ವಂಚಿಸಿದ ಆರೋಪಿಯನ್ನು ಕೇಂದ್ರ ಅಪರಾಧ ವಿಭಾಗದ ಪೊಲೀಸರು ಬಂಧಿಸಿದ್ದಾರೆ.

ಮುರುಗೇಶ್ ಪಾಳ್ಯ ನಿವಾಸಿ ಸುರೇಂದ್ರ ರೆಡ್ಡಿ ಅವರ ದೂರಿನ ಮೇರೆಗೆ ನಾಗರಬಾವಿ ನಿವಾಸಿ ವೆಂಕಟೇಶ್‌ ಎಂಬುವವರನ್ನು ಬಂಧಿಸಲಾಗಿದೆ.

ಬ್ಯಾಂಕ್ ಸಾಲ ತೀರಿಸದ್ದರಿಂದ ಉದ್ಯಮಿ ಸುರೇಂದ್ರ ರೆಡ್ಡಿ ಅವರ ಮನೆ ಹರಾಜಿಗೆ ಬಂದಿತ್ತು. ಸ್ನೇಹಿತರ ಮೂಲಕ ಪರಿಚಯವಾಗಿದ್ದ ವೆಂಕಟೇಶ್ ಅವರು, ರೋಹಿತ್ ಪಟೇಲ್ ಎಂಬುವರ ಮೂಲಕ 2024ರ ಜನವರಿಯಲ್ಲಿ ಸುರೇಂದ್ರ ಅವರಿಗೆ ₹1.6 ಕೋಟಿ ಸಾಲ ಕೊಡಿಸಿದ್ದರು. ಈ ಹಣಕ್ಕೆ ಹೆಚ್ಚುವರಿಯಾಗಿ ₹21 ಲಕ್ಷ ನೀಡುವಂತೆ ಆರೋಪಿ ಬೇಡಿಕೆ ಇಟ್ಟಿದ್ದರು ಎಂದು ಪೊಲೀಸರು ತಿಳಿಸಿದರು.

ಜನವರಿಯ ಕೊನೆಯಲ್ಲಿ ಸುರೇಂದ್ರ ರೆಡ್ಡಿ ಅವರು ತಮ್ಮ ಮನೆಯ ದಾಖಲೆಗಳನ್ನು ಖಾಸಗಿ ಬ್ಯಾಂಕ್‌ನಲ್ಲಿ ಅಡವಿಟ್ಟು ₹2 ಕೋಟಿ ಸಾಲ ಪಡೆದುಕೊಂಡಿದ್ದರು. ಈ ಹಣದಲ್ಲಿ ರೋಹಿತ್ ಅವರ ಸಾಲ ಮರುಪಾವತಿಸಲು ಮುಂದಾಗಿದ್ದಾರೆ. ಆದರೆ, ರೋಹಿತ್ ವಿದೇಶಕ್ಕೆ ಹೋಗಿರುವ ಕಾರಣ ₹1.60 ಕೋಟಿ ಅನ್ನು ವೆಂಕಟೇಶ್ ತಮ್ಮ ಖಾತೆಗೆ ವರ್ಗಾವಣೆ ಮಾಡಿಸಿಕೊಂಡಿದ್ದರು. ಅಲ್ಲದೇ ಹೆಚ್ಚುವರಿಯಾಗಿ ನೀಡಬೇಕಿದ್ದ ₹21 ಲಕ್ಷವನ್ನು ನಗದು ರೂಪದಲ್ಲಿ ಪಡೆದುಕೊಂಡಿದ್ದರು ಎಂದು ಪೊಲೀಸರು ತಿಳಿಸಿದರು.

‘ರೋಹಿತ್ ಅವರು ಸಾಲದ ಹಣ ವಾಪಸ್ ನೀಡುವಂತೆ ಕೇಳಿದಾಗ, ವೆಂಕಟೇಶ್ ಸೂಚಿಸಿದ ಖಾತೆಗೆ ಹಣ ವರ್ಗಾವಣೆ ಮಾಡಿರುವುದಾಗಿ ಸುರೇಂದ್ರ ತಿಳಿಸಿದ್ದಾರೆ. ಹಣ ತಲುಪದ ವಿಚಾರ ಗೊತ್ತಾಗಿ, ಈ ಬಗ್ಗೆ ಆರೋಪಿಯನ್ನು ವಿಚಾರಿಸಿದಾಗ, ಹಣವನ್ನು ಸ್ವಂತಕ್ಕೆ ಬಳಸಿಕೊಂಡಿದ್ದು, ರೋಹಿತ್‌ಗೆ ನಾನೇ ಹಣ ನೀಡುವುದಾಗಿ ಹೇಳಿದ್ದಾರೆ. ಮತ್ತೆ ಒತ್ತಡ ಹಾಕಿದಾಗ ನನ್ನ ವಿಚಾರಕ್ಕೆ ಬಂದರೆ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ವೆಂಕಟೇಶ್ ಹೆದರಿಸಿದ್ದಾರೆ’ ಎಂದು ಸುರೇಂದ್ರ ರೆಡ್ಡಿ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.