ವಿ.ವಿ. ಪುರ ಒಳಾಂಗಣ ಕ್ರಿಡಾಂಗಣ ಉದ್ಘಾಟನೆ

ಬೆಂಗಳೂರು: ಬಿಬಿಎಂಪಿಯು ವಿಶ್ವೇಶ್ವರಪುರ ವಾರ್ಡ್‌ನ ಚಿಕ್ಕಮಾವಳ್ಳಿಯಲ್ಲಿ ಕೃಂಬಿಗಲ್‍ ರಸ್ತೆಯ ಬಳಿ ನಿರ್ಮಿಸಿರುವ ಒಳಾಂಗಣ ಕ್ರೀಡಾಂಗಣವನ್ನು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಬುಧವಾರ ಉದ್ಘಾಟಿಸಿದರು.

ಬಿಬಿಎಂಪಿಯು ₹ 1.35 ಕೋಟಿ ವೆಚ್ಚದಲ್ಲಿ ಈ ಒಳಾಂಗಣ ಕ್ರೀಡಾಂಗಣವನ್ನು ನಿರ್ಮಿಸಿದೆ. ಒಟ್ಟು 4,800 ಚದರ ಅಡಿ ವಿಸ್ತೀರ್ಣದ ಈ ಕ್ರೀಡಾಂಗಣದಲ್ಲಿ ಷಟಲ್ ಬ್ಯಾಡ್ಮಿಂಟನ್, ಟೇಬಲ್ ಟೆನಿಸ್, ಯೋಗ ಕೇಂದ್ರಗಳಿವೆ.

ಲೆಗಸಿ ಸ್ಪೋರ್ಟ್ಸ್‌ ಅಕಾಡೆಮಿಗೆ ಈ ಕ್ರೀಡಾಂಗಣ ನಿರ್ವಹಣೆಯ ಉಸ್ತುವಾರಿಯನ್ನು ಬಿಬಿಎಂಪಿ ವಹಿಸಿದೆ. ತಿಂಗಳಿಗೆ ₹ 30 ಸಾವಿರ ಬಾಡಿಗೆ ಆಧಾರದ ಮೇಲೆ 5 ವರ್ಷಗಳ ಅವಧಿಗೆ ಈ ಸಂಸ್ಥೆಯು ಕ್ರೀಡಾಂಗಣವನ್ನು ನೋಡಿಕೊಳ್ಳಲಿದೆ. ಈ ಕ್ರೀಡಾಂಗಣದ ನಿರ್ವಹಣಾ ದೃಷ್ಟಿಯಿಂದ ಇದನ್ನು ಬಳಸುವ ಪ್ರತಿ ಆಟಗಾರರಿಂದ 2,500 ಠೇವಣಿ ಹಾಗೂ ತಿಂಗಳಿಗೆ ₹ 500 ಸಂಗ್ರಹಿಸಲು ಅನುಮತಿ ನೀಡಲಾಗಿದೆ.