ಬಸವಕಲ್ಯಾಣ: ದುರವಸ್ಥೆಯಲ್ಲಿ ಶರಣರ ಉಬ್ಬುಚಿತ್ರಗಳು

ಬಸವಕಲ್ಯಾಣ: ರಾಷ್ಟ್ರೀಯ ಹೆದ್ದಾರಿಯಿಂದ ನಗರ ಪ್ರವೇಶಿಸುವಲ್ಲಿನ ಮಹಾದ್ವಾರದ ಬಳಿಯ ಜಾಗದಲ್ಲಿ ಅನೇಕ ಡಬ್ಬಾ ಅಂಗಡಿಗಳು ತಲೆಎತ್ತಿದ್ದು, ಇದರಿಂದ ಶರಣರ ಉಬ್ಬು ಚಿತ್ರಗಳು ಕಾಣದಂತಾಗಿವೆ.

12ನೇ ಶತಮಾನದಲ್ಲಿ ಬಸವಾದಿ ಶರಣರು ಕಾರ್ಯಗೈದ ಸ್ಥಳ ಇದಾಗಿದೆ. ಅಂದಿನ ಗತವೈಭವ ಮರುಕಳಿಸುವಂತಾಗಲು ಸರ್ಕಾರದಿಂದ ನಗರದಲ್ಲಿ ₹742 ಕೋಟಿ ವೆಚ್ಚದ ಅನುಭವ ಮಂಟಪ ನಿರ್ಮಿಸಲಾಗುತ್ತಿದೆ. ಅದಕ್ಕೂ ಮೊದಲು ವಿವಿಧ ಶರಣರ 19 ಸ್ಮಾರಕಗಳ ಜೀರ್ಣೋದ್ಧಾರ ನಡೆದಿದೆ. ಬಸವಕಲ್ಯಾಣ ಅಭಿವೃದ್ಧಿ ಮಂಡಳಿಯಿಂದ ಈ ಎಲ್ಲ ಸ್ಥಳಗಳಲ್ಲಿ ಅಭಿವೃದ್ಧಿ ಕೈಗೊಳ್ಳಲಾಗಿದ್ದು, ಮಂಡಳಿ ವೆಚ್ಚದಲ್ಲೇ ಸಿಮೆಂಟ್‌ನಿಂದ ಉಬ್ಬು ಚಿತ್ರಗಳನ್ನು ನಿರ್ಮಿಸಲಾಗಿದೆ.

ನಗರ ಪ್ರವೇಶದ ಸ್ಥಳ ಆಕರ್ಷಕವಾಗಿರಲಿ ಎಂಬ ಉದ್ದೇಶದಿಂದ 107 ಅಡಿ ಎತ್ತರದ ಬೃಹತ್ ಮಹಾದ್ವಾರ ಕಟ್ಟಲಾಗಿದೆ. ದ್ವಾರದ ಮಧ್ಯದಲ್ಲಿ ಬಸವೇಶ್ವರರ ಅಶ್ವಾರೂಢ ಪ್ರತಿಮೆ ಇದೆ. ಅದರ ಆಚೆ ಈಚೆ ಹೋಗುವುದಕ್ಕೆ ಮತ್ತು ಬರುವುದಕ್ಕಾಗಿ ಪ್ರತ್ಯೇಕ ರಸ್ತೆಗಳಿವೆ. ಇದರ ಎದುರಿಗೆ ದಕ್ಷಿಣದಲ್ಲಿರುವ ರಾಷ್ಟ್ರೀಯ ಹೆದ್ದಾರಿಯಿಂದ ಬರುವಾಗ ರಸ್ತೆಯ ಎರಡೂ ಕಡೆಗಳಲ್ಲಿ ಎತ್ತರದ ಆವರಣಗೋಡೆ ಕಟ್ಟಿ ಒಳಗೆ ಯಾರಿಗೂ ಅಂಗಡಿ ಹಾಕಲು ಬಾರದಂತೆ ಹಾಗೂ ಇತರೆ ವ್ಯಾಪಾರ ನಡೆಯದಂತೆ ವ್ಯವಸ್ಥೆ ಮಾಡಲಾಗಿದೆ.

ಎರಡೂ ಕಡೆಯ ಕಾಂಪೌಂಡ್‌ಗೆ ಬಸವಣ್ಣ, ಚನ್ನಬಸವಣ್ಣ, ಅಕ್ಕನಾಗಮ್ಮ, ಸಮಗಾರ ಹರಳಯ್ಯ, ಅಂಬಿಗರ ಚೌಡಯ್ಯ, ನುಲಿ ಚಂದಯ್ಯ, ಮಡಿವಾಳ ಮಾಚಿದೇವ ಮುಂತಾದ ಶರಣರ ಹಾಗೂ ಅವರು ಕೈಗೊಂಡಿದ್ದ ಕಾಯಕ ಪ್ರದರ್ಶಿಸುವ ಉಬ್ಬು ಚಿತ್ರಗಳಿವೆ. ಆದರೆ, ಈಚೆಗೆ ಆವರಣಗೋಡೆ ಪಕ್ಕದ ಪಾದಚಾರಿ ಮಾರ್ಗದಲ್ಲಿ ಡಬ್ಬಾ ಹಾಗೂ ಚಿಕ್ಕ ಚಿಕ್ಕ ಅಂಗಡಿ ತೆರೆದು ವ್ಯಾಪಾರ ಆರಂಭಿಸಿದ್ದರಿಂದ ಈ ಚಿತ್ರಗಳು ಮರೆಯಾಗಿವೆ.

ದೂರದೂರದ ಪ್ರವಾಸಿಗರು ಬಂದು ಇಲ್ಲಿ ಇಳಿದಾಗ ಪ್ರಥಮವಾಗಿ ಅವರಿಗೆ ಉಬ್ಬುಚಿತ್ರಗಳ ಮೂಲಕ ಶರಣರ ದರ್ಶನ ಆಗಲಿ ಎಂಬ ಸದುದ್ದೇಶದಿಂದ ಈ ಕಾರ್ಯ ನಡೆದಿತ್ತು. ಆದರೆ, ಈಗ ಬರೀ ಅಂಗಡಿಗಳೇ ಕಾಣುತ್ತಿವೆ. ಕೆಲ ತಿಂಗಳಲ್ಲಿ ಮಹಾದ್ವಾರದವರೆಗೂ ಅಂಗಡಿಗಳು ವ್ಯಾಪಿಸುವ ಸಾಧ್ಯತೆ ಇದೆ. ಹೀಗಾದರೆ ಒಂದೂ ಉಬ್ಬು ಚಿತ್ರ ಯಾರಿಗೂ ಗೋಚರಿಸುವುದಿಲ್ಲ. ಮಹಾದ್ವಾರದ ಅಂದವೂ ಹಾಳಾಗಲಿದೆ. ವಾಹನಗಳ ಸಂಚಾರಕ್ಕೂ ತೊಂದರೆಯಾಗಲಿದೆ ಎಂಬುದು ಸ್ಥಳೀಯರ ಅಭಿಮತ.

‘ಸಂಬಂಧಿಸಿದ ಅಧಿಕಾರಿಗಳು ತಕ್ಷಣವೇ ಇಲ್ಲಿನ ಅತಿಕ್ರಮಣ ತೆರವುಗೊಳಿಸಬೇಕು. ಪಾದಚಾರಿ ಮಾರ್ಗದಲ್ಲಿ ಯಾವುದೇ ಚಟುವಟಿಕೆಗಳು ನಡೆಯದಂತೆ ಕ್ರಮಹಿಸಬೇಕು’ ಎಂಬುದು ಜನರ ಆಗ್ರಹವಾಗಿದೆ.