ಬೀದರ್‌: ಜಿಲ್ಲಾಧಿಕಾರಿಯಿಂದ ಬ್ರಿಮ್ಸ್‌ ಒತ್ತುವರಿ ಜಾಗ ತೆರವು

ಬೀದರ್‌: ಬೀದರ್‌ ವೈದ್ಯಕೀಯ ವಿಜ್ಞಾನ ಸಂಸ್ಥೆಗೆ(ಬ್ರಿಮ್ಸ್‌) ಸೇರಿದ ಜಾಗದ ಅತಿಕ್ರಮಣವನ್ನು ಜಿಲ್ಲಾಧಿಕಾರಿ ಶಿಲ್ಪಾ ಶರ್ಮಾ ಅವರು ಸೋಮವಾರ ತೆರವುಗೊಳಿಸಿದರು.

ಕೆಲ ಅಪರಿಚಿತರು ಭಾನುವಾರ ರಾತ್ರಿ ಬ್ರಿಮ್ಸ್‌ ವಸತಿ ಗೃಹಗಳ ನಿರ್ಮಾಣಕ್ಕೆ ಮೀಸಲಿಟ್ಟ ಜಾಗವನ್ನು ಅತಿಕ್ರಮಿಸಿ ಮೂರು ಅಡಿ ಎತ್ತರದ ಗೋಡೆ ನಿರ್ಮಿಸಿದ್ದರು. ಟಿನ್‌ ಶೆಡ್‌ ಕೂಡ ಹಾಕಿದ್ದರು. ಬ್ರಿಮ್ಸ್‌ ನಿರ್ದೇಶಕ ಡಾ.ಶಿವಕುಮಾರ ಶೆಟಕಾರ್‌ ಅವರು ಈ ಸಂಬಂಧ ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗೆ ಪತ್ರ ಬರೆದಿದ್ದರು. ಜಿಲ್ಲಾಧಿಕಾರಿ ಶಿಲ್ಪಾ ಶರ್ಮಾ ಅವರು ಸ್ಥಳಕ್ಕೆ ತೆರಳಿ, ಪರಿಶೀಲಿಸಿ ಖುದ್ದು ಜಾಗದಲ್ಲೇ ನಿಂತು ಅತಿಕ್ರಮಣ ತೆರವುಗೊಳಿಸಿದರು. ಉಪವಿಭಾಗಾಧಿಕಾರಿ ಮುಹಮ್ಮದ್‌ ಶಕೀಲ್ ಹಾಜರಿದ್ದರು.