ಸಂಭ್ರಮದ ಶರಣ ವೀರಭದ್ರಪ್ಪ ಜಾತ್ರೆ

ಜನವಾಡ: ಶರಣ ವೀರಭದ್ರಪ್ಪ ಅವರ 75ನೇ ಜಾತ್ರಾ ಮಹೋತ್ಸವ ಬೀದರ್ ತಾಲ್ಲೂಕಿನ ಅಲಿಯಂಬರ್ ಗ್ರಾಮದಲ್ಲಿ ಸಂಭ್ರಮ, ಸಡಗರದಿಂದ ನಡೆಯಿತು.

ವೀರಭದ್ರಪ್ಪ ಅವರ ಭಾವಚಿತ್ರದ ಮೆರವಣಿಗೆ, ಗದ್ಗುಗೆಗೆ ಮಹಾ ರುದ್ರಾಭಿಷೇಕ, ಧೂನಿ ಪೂಜೆ ಜರುಗಿತು.

ವಿವಿಧೆಡೆಯಿಂದ ಬಂದಿದ್ದ ನೂರಾರು ಭಕ್ತರು ಗದ್ದುಗೆಯ ದರ್ಶನ ಪಡೆದು, ಪ್ರಸಾದ ಸ್ವೀಕರಿಸಿದರು.

ವೀರಭದ್ರಪ್ಪ ಮಂದಿರ ಪರಿಸರದಲ್ಲಿ ಮಕ್ಕಳ ಆಟಿಕೆ, ಬೆಂಡು, ಬತಾಸು, ಅಳ್ಳು, ಕಾಯಿ, ಕರ್ಪೂರ, ಅಲಂಕಾರಿಕ ವಸ್ತುಗಳು ಸೇರಿ ವಿವಿಧ ಅಂಗಡಿಗಳು ತೆರೆದುಕೊಂಡಿದ್ದವು.

ಮಧ್ಯರಾತ್ರಿ ಶ್ರದ್ಧಾ ಭಕ್ತಿಯ ಪಲ್ಲಕ್ಕಿ ಮೆರವಣಿಗೆ ನಡೆಯಿತು.

ಜಾತ್ರೆ ಅಂಗವಾಗಿ ಕುಸ್ತಿ ಸ್ಪರ್ಧೆಗಳನ್ನು ಆಯೋಜಿಸಲಾಗಿತ್ತು. ಕೊನೆಯ ಕುಸ್ತಿ ವಿಜೇತಗೆ ಬೆಳ್ಳಿ ಕಡಗ ನೀಡಲಾಯಿತು.