ಮಾಯಕೊಂಡ | ಹಿಂಗಾರು ರಾಗಿಯತ್ತ ಒಲವು: ಉತ್ತಮ ಫಸಲು ನಿರೀಕ್ಷೆ

ಮಾಯಕೊಂಡ: ಉತ್ತಮ ಮಳೆಗಾಲ, ಅಂತರ್ಜಲ ವೃದ್ಧಿಯಾದ ಕಾರಣ, ಈ ಭಾಗದ ರೈತರ ಚಿತ್ತ ರಾಗಿ ಬೆಳೆಯತ್ತ ಹೊರಳಿದೆ. ಕೊಳವೆ ಬಾವಿಗಳ ಮೂಲಕ ನೀರುಣಿಸಿ ರಾಗಿ ಬೆಳೆದಿದ್ದು, ಪೈರು ನಳನಳಿಸುತ್ತಿವೆ.

ಮಾಯಕೊಂಡ, ಆನಗೋಡು, ಅಣಜಿ ಹೋಬಳಿಗಳು ಸೇರಿದಂತೆ ದಾವಣಗೆರೆ ತಾಲ್ಲೂಕಿನ ರೈತರು‌ ಸಾಮಾನ್ಯವಾಗಿ ತರಕಾರಿ ಬೆಳೆ ಬೆಳೆಯುತ್ತಿದ್ದರು. ಆದರೆ ಈ ಬಾರಿ ‘ಗ್ಯಾರಂಟಿ’ ಬೆಳೆಯಾದ ರಾಗಿ ಬೆಳೆಯಲು ಆಸಕ್ತಿ ತೋರಿದ್ದಾರೆ. ದಾವಣಗೆರೆ ತಾಲ್ಲೂಕಿನಲ್ಲಿ ಹಿಂಗಾರಿನಲ್ಲಿ ಪ್ರತೀ ವರ್ಷ 500 ಹೆಕ್ಟೇರ್‌ನಲ್ಲಿ ಬಿತ್ತನೆಯಾಗುತ್ತಿದ್ದ ರಾಗಿ, ಈ ವರ್ಷ ದಾಖಲೆಯ 2,702 ಹೆಕ್ಟೇರ್ ಪ್ರದೇಶಕ್ಕೆ ವಿಸ್ತರಣೆಯಾಗಿದೆ. ಮಾಯಕೊಂಡ ಹೋಬಳಿಯೊಂದರಲ್ಲೇ 350 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ನಡೆದಿದೆ.

ಪ್ರತಿ ಎಕರೆಗೆ ಹತ್ತರಿಂದ ಹನ್ನೆರಡು ಕ್ವಿಂಟಲ್ ಇಳುವರಿ ನಿರೀಕ್ಷೆ, ಇದ್ದು ದಾವಣಗೆರೆ ತಾಲ್ಲೂಕಿನಲ್ಲಿ‌ ಕನಿಷ್ಟ ಬೆಂಬಲ ಬೆಲೆ ಯೋಜನೆಯಡಿ ರಾಗಿ ಖರೀದಿ ಕೇಂದ್ರ ತೆರೆಯಬೇಕು ಎಂಬುದು ರೈತರ ಆಗ್ರಹವಾಗಿದೆ. 

‘ಯಂತ್ರಗಳಿಂದ ಸುಲಭವಾದ ರಾಗಿ ಬೇಸಾಯ: ರಾಗಿ ಬೆಳೆಯ ಬೇಸಾಯಕ್ಕೆ ಈ ಹಿಂದೆ ತೀವ್ರ ಖರ್ಚು ಹಾಗೂ ಕೂಲಿ ಕಾರ್ಮಿಕರ ಸಮಸ್ಯೆ ಇತ್ತು. ಒಕ್ಕಲು ಮಾಡಲು ಕಣಗಳನ್ನ ಸಜ್ಜುಗೊಳಿಸಿ, ಹಲವು ದಿನಗಳ ಕಾಲ ಹತ್ತಾರು ಜನ ಶ್ರಮಪಡುವ ಸ್ಥಿತಿ ಇತ್ತು. ಆದರೆ ಈಗ ಬಿತ್ತನೆಯಿಂದ ಕಟಾವಿನವರೆಗೂ ಆಧುನಿಕ ಯಂತ್ರಗಳು ಬಂದಿದ್ದು, ರೈತರ ಭಾರ ತಗ್ಗಿಸಿವೆ.

ಜಮೀನು ಉಳುಮೆ, ಬಿತ್ತನೆ, ಕಟಾವು ಸೇರಿದಂತೆ ಹುಲ್ಲು ಪೆಂಡಿ ಕಟ್ಟಲು ಯಂತ್ರಗಳು ಬಂದಿವೆ. ಕೃಷಿ ಇಲಾಖೆಯಿಂದ ರಾಗಿ ಹುಲ್ಲು ಪೆಂಡಿ ಕಟ್ಟುವ ಯಂತ್ರಕ್ಕೆ ₹1 ಲಕ್ಷದವರೆಗೂ ಸಹಾಯಧನದ ಮೂಲಕ ವರ್ಷದಲ್ಲಿ 15 ಯಂತ್ರಗಳನ್ನ ರೈತರಿಗೆ ನೀಡಲಾಗಿದೆ’ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.