ಮಲೇಬೆನ್ನೂರು | ಕುಸಿದ ಅಂತರ್ಜಲ ಮಟ್ಟ: ರೈತರ ಸಂಕಷ್ಟ

ಮಲೇಬೆನ್ನೂರು: ಬೇಸಿಗೆಯ ಬಿಸಿಲಿನ ಪ್ರಖರತೆ ಹೆಚ್ಚುತ್ತಿದ್ದು, ಹೋಬಳಿ ವ್ಯಾಪ್ತಿಯ ಜಲಮೂಲಗಳಾದ ಕೆರೆ, ಹೊಂಡ, ತೆರೆದ ಬಾವಿ, ಕೊಳವೆಬಾವಿ ಬತ್ತುತ್ತಿದ್ದು, ತೋಟಗಳ ರಕ್ಷಣೆಗೆ ಕೃಷಿಕರು ಹರಸಾಹಸ ಪಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಭದ್ರಾ ನಾಲೆಯಿಂದ ವರ್ಷಪೂರ್ತಿ ಬೆಳೆಗಳಿಗೆ ನೀರು ಲಭ್ಯವಾಗುತ್ತಿತ್ತು. ಪ್ರಸಕ್ತ ವರ್ಷ ಮಳೆ ಕೊರತೆಯಿಂದಾಗಿ ಭದ್ರಾ ಜಲಾಶಯ ಭರ್ತಿಯಾಗಲಿಲ್ಲ. ಮಳೆಗಾಲದಲ್ಲಿ ರೈತರು ಹಾಗೂಹೀಗೂ ಸಂಭಾಳಿಸಿದರು. ಆದರೆ, ಶಿವರಾತ್ರಿಗೂ ಮುನ್ನವೇ ಜಲಕ್ಷಾಮದ ಬಿಸಿ ತಟ್ಟಿದೆ.

ದೇವರ ಬೆಳೆಕೆರೆ ಪಿಕಪ್‌ ಜಲಾಶಯದ ಹೊರಹರಿವು ಸ್ಥಗಿತವಾಗಿ ಸೂಳೆಕೆರೆ ಹಳ್ಳ ಸಂಪೂರ್ಣ ಒಣಗಿದೆ. ಹಳ್ಳದ ಸಾಲಿನ ವೀಳ್ಯದೆಲೆ ಹಾಗೂ ಅಡಿಕೆ ತೋಟಗಳು ನೀರಿನ ಕೊರತೆ ಎದುರಿಸುತ್ತಿವೆ. ಆದರೆ ಹೊಳೆ ಸಾಲಿನ ಭತ್ತದ ಗದ್ದೆ,  ತೋಟಗಳಿಗೆ ಅಷ್ಟಾಗಿ ನೀರಿನ ಸಮಸ್ಯೆ ಕಾಣಿಸಿಕೊಂಡಿಲ್ಲ. ಕೊಮಾರನಹಳ್ಳಿ, ಹೆಳವನಕಟ್ಟೆ ಕೆರೆ ಮಧ್ಯೆದಲ್ಲಿ ನಿಂತಿರುವ ಅ‌ಲ್ಪಸ್ವಲ್ಪ ನೀರು ಕಾಡುಪ್ರಾಣಿಗಳು ಹಾಗೂ ಜಾನುವಾರುಗಳ ಬಾಯಾರಿಕೆ ನೀಗಿಸುತ್ತಿದೆ. ಈ ನಡುವೆ, ಬತ್ತಿರುವ ಕೆರೆಯಲ್ಲಿ ಕೆರೆಹೂಳೆತ್ತುವ ಕೆಲಸ ಭರದಿಂದ ಸಾಗಿದೆ.

ಹೋಬಳಿ ವ್ಯಾಪ್ತಿಯಲ್ಲಿ 12,000 ಹೆಕ್ಟರ್‌ ಭತ್ತ ಬೆಳೆಯುವ ಪ್ರದೇಶವಿದೆ. ಈ ಪೈಕಿ, ಕೊಳವೆಬಾವಿ ಆಶ್ರಿತ ಹಾಗೂ ನೀರಿನ ಆಸರೆಯಿರುವ ಹಡ್ಲು, ಹೊಳೆಸಾಲು, ಡಿ.ಬಿ. ಕೆರೆ ಪಿಕಪ್‌ ಪ್ರದೇಶದ ಅಂದಾಜು 1,000 ಹೆಕ್ಟೇರ್‌ನಲ್ಲಿ ಮಾತ್ರ ಈ ಬಾರಿ ಭತ್ತ ನಾಟಿ ಮಾಡಲಾಗಿದೆ. ಅಂದಾಜು 5,000 ಹೆಕ್ಟೇರ್‌ನಲ್ಲಿ ತೋಟದ ಬೆಳೆಗಳನ್ನು ಬೆಳೆಯಲಾಗುತ್ತಿದೆ ಎಂದು ಕೃಷಿ ಹಾಗೂ ತೋಟಗಾರಿಕೆ ಇಲಾಖೆಯ ಮೂಲಗಳು ತಿಳಿಸಿವೆ.

ತೋಟ ಉಳಿಸಿಕೊಳ್ಳಲು ಹೆಚ್ಚು ಆಳದ ಕೊಳವೆ ಬಾವಿ ಕೊರೆಸುವುದು, ಪೈಪ್‌ಲೈನ್ ನಿರ್ಮಾಣ, ಹನಿ ನೀರಾವರಿ ವ್ಯವಸ್ಥೆ ಅಳವಡಿಸಿಕೊಳ್ಳುವ ಚಿತ್ರಣ ಈ ಭಾಗದಲ್ಲಿ ಸಾಮಾನ್ಯ ಎಂಬಂತಾಗಿದೆ. 500 ರಿಂದ 600 ಅಡಿ ಕೊರೆಸಿದರೂ ಕೊಳವೆಬಾವಿಗಳಲ್ಲಿ ನೀರು ಲಭ್ಯವಾಗುತ್ತಿಲ್ಲ. ಬೋರ್‌ವೆಲ್ ವೈಫಲ್ಯ ಪ್ರಮಾಣವೇ ಹೆಚ್ಚಾಗಿರುವುದು ಕೃಷಿಕರನ್ನು ಚಿಂತೆಗೀಡು ಮಾಡಿದೆ. ಮಲೆನಾಡಿನ ಸೆರಗಿನ ಪ್ರದೇಶದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉದ್ಭವವಾಗುವ ದಿನಗಳು ದೂರವಿಲ್ಲ ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸುತ್ತಾರೆ.