ಹೊನ್ನಾಳಿ: ಹಸಿದವರು ಕಿ.ಮೀ.ಗಟ್ಟಲೇ ನಡೆಯುವುದು ಅನಿವಾರ್ಯ!

ಹೊನ್ನಾಳಿ: ಜಾಗದ ಸಮಸ್ಯೆಯಿಂದಾಗಿ ಈವರೆಗೂ ಪಟ್ಟಣದಲ್ಲಿ ಆರಂಭಿಸಲು ಸಾಧ್ಯವಾಗದ ಇಂದಿರಾ ಕ್ಯಾಂಟೀನ್‌ನನ್ನು ತೆರೆಯಲು ಸಿದ್ಧತೆ ನಡೆಯುತ್ತಿದ್ದು, ಕ್ಯಾಂಟೀನ್‌ ಸ್ಥಳ ದೂರವಾಗುತ್ತದೆಂಬ ದೂರು ಸಾರ್ವಜನಿಕರಿಂದ ವ್ಯಕ್ತವಾಗಿದೆ.

ಶಾಸಕ ಡಿ.ಜಿ. ಶಾಂತನಗೌಡ ಅವರು ಶಾಸಕರಾಗಿ ಆಯ್ಕೆಯಾಗಿ ಒಂದೂವರೆ ವರ್ಷದ ನಂತರ ಈ ಕ್ಯಾಂಟೀನ್ ಭಾಗ್ಯ ಬಡಜನರ, ಮಧ್ಯಮ ವರ್ಗದ ಕಾರ್ಮಿಕರ ಹಸಿವು ನೀಗಿಸುವ ಪ್ರಯತ್ನಗಳು ನಡೆಯುತ್ತಿವೆ. ಪಟ್ಟಣದ ಖಾಸಗಿ ಬಸ್ ನಿಲ್ದಾಣದಿಂದ 1.5 ಕಿ.ಮೀ. ದೂರ ಇರುವ ಶ್ರೀ ಮೃತ್ಯುಂಜಯ ಶಿವಾಚಾರ್ಯ ಪ್ರಥಮದರ್ಜೆ ಕಾಲೇಜಿನ ಮುಂಭಾಗದಲ್ಲಿ ಈ ಕ್ಯಾಂಟೀನ್ ತೆರೆಯಲು ಸಿದ್ಧತೆ ನಡೆಸಲಾಗುತ್ತದೆ.

ಆದರೆ, ಹೊಟ್ಟೆ ಹಸಿದವರು, ಖಾಲಿ ಹೊಟ್ಟೆಯಲ್ಲೇ ಅಷ್ಟು ದೂರ ನಡೆಯುವುದು ಹೇಗೆ ಸಾಧ್ಯ? ಎಂಬ ಪ್ರಶ್ನೆಗಳನ್ನೂ ಹುಟ್ಟುಹಾಕಿದೆ.

ಪಟ್ಟಣದ ಮಧ್ಯಭಾಗದಲ್ಲೇ ಈ ಕ್ಯಾಂಟೀನ್ ಪ್ರಾರಂಭಿಸಿದ್ದರೆ ಜನತೆಗೆ ಅನುಕೂಲವಾಗುತ್ತಿತ್ತು. ಆದರೆ, ಜಾಗದ ಸಮಸ್ಯೆಯೇ ಊರು ಬಿಟ್ಟು ದೂರ ನಿರ್ಮಾಣ ಮಾಡಲು ಕಾರಣ ಎಂದು ಮೂಲಗಳು ಹೇಳಿವೆ.

ಪುರಸಭೆ ಆಡಳಿತ ವರ್ಗಕ್ಕೆ ಸಮರ್ಪಕ ಜಾಗವನ್ನು ಗುರುತಿಸಲು ಈವರೆಗೂ ಸಾಧ್ಯವಾಗಿಲ್ಲ. ಅಂತೆಯೆ ‘ಪುರಸಭೆ ವ್ಯಾಪ್ತಿಯಲ್ಲಿ ಇಂದಿರಾ ಕ್ಯಾಂಟೀನ್‌ಗೆ ಜಾಗ ನೀಡಲು ಸ್ಥಳದ ಕೊರತೆ ಇದೆ’ ಎಂದು ಅಧಿಕಾರಿ ವರ್ಗ ಕಾರಣ ನೀಡುತ್ತಿದೆ.

ಈಗಾಗಲೇ ಶಾಸಕ ಡಿ.ಜಿ. ಶಾಂತನಗೌಡ ಹಾಗೂ ಪುರಸಭೆಯ ಆಡಳಿತ ವರ್ಗ ಕಾಲೇಜು ಬಳಿ ಸ್ಥಳ ಪರಿಶೀಲನೆ ನಡೆಸಿದ್ದು, ಕಾಲೇಜು ಮುಂಭಾಗ ಬೆಳೆದು ನಿಂತಿದ್ದ ಮರ– ಗಿಡಗಳನ್ನು ತೆರವುಗೊಳಿಸುವ ಕಾರ್ಯ ಬುಧವಾರ ನಡೆದಿದೆ.

ಪಟ್ಟಣದ ಖಾಸಗಿ ಬಸ್‍ನಿಲ್ದಾಣ, ಸರ್ಕಾರಿ ಬಸ್ ನಿಲ್ದಾಣ, ಅಗಳ ಮೈದಾನ, ಸಂತೆ ಮೈದಾನ, ಹಳೇ ಸರ್ಕಾರಿ ಆಸ್ಪತ್ರೆ ಮುಂಭಾಗದಲ್ಲಿ ಇಂದಿರಾ ಕ್ಯಾಂಟೀನ್ ತೆರೆಯಬಹುದಾಗಿತ್ತು. ಇಂದಿರಾ ಕ್ಯಾಂಟೀನ್‌ನ ತಿಂಡಿ, ಊಟವನ್ನು ಕಡಿಮೆ ದರದಲ್ಲಿ ಸವಿಯಬೇಕಾದರೆ ಒಂದೂವರೆ ಕಿ.ಮೀ ದೂರಕ್ಕೆ ಹೋಗಬೇಕು. ಅಲ್ಲಿಗೆ ಅವರು ನಡೆದುಕೊಂಡು ಹೋಗಿ ಬರಬೇಕು ಎಂದರೆ ಕನಿಷ್ಠ 3 ಕಿ.ಮೀ ಹಾದಿಯನ್ನು ಸವೆಸಬೇಕಾಗುತ್ತದೆ ಎಂದು ಬಹುತೇಕ ಆಟೊ ಚಾಲಕರು ಹಾಗೂ ಹಮಾಲಿ ಕಾರ್ಮಿಕರು, ಶ್ರಮಿಕ ವರ್ಗದವರು ಬೇಸರ ವ್ಯಕ್ತಪಡಿಸಿದ್ದಾರೆ.

‘₹ 5ಕ್ಕೆ ತಿಂಡಿ ಹಾಗೂ ₹ 10ಕ್ಕೆ ಊಟ ಸಿಗುತ್ತದೆ ಎಂದರೆ ಎಷ್ಟೇ ದೂರವಿದ್ದರೂ ಅಲ್ಲಿಗೆ ಬಂದೇ ಬರುತ್ತಾರೆ’ ಎಂಬುದು ಪುರಸಭೆ ಅಧಿಕಾರಿಗಳ ಸಮಜಾಯಿಷಿಯಾಗಿದೆ.