ಮಾಯಕೊಂಡ | ಹಿಂಗಾರು ಕಟಾವು ಆರಂಭ: ರೈತರ ಕೈ ಹಿಡಿದ ರಾಗಿ

ಮಾಯಕೊಂಡ: ಸಮೃದ್ಧವಾಗಿ ಬೆಳೆದು ನಿಂತಿರುವ ರಾಗಿ ಬೆಳೆ ಒಣಗಿ ಕಟಾವಿಗೆ ಬಂದಿದ್ದು, ಯಂತ್ರಗಳ‌ ಮೂಲಕ ಕಟಾವು ಕಾರ್ಯದಲ್ಲಿ ರೈತರು ನಿರತರಾಗಿದ್ದಾರೆ. 

ಮಾಯಕೊಂಡ, ಆನಗೋಡು, ಅಣಜಿ ಹೋಬಳಿಗಳ ಬಹುತೇಕ ಹಳ್ಳಿಗಳ ರೈತರು ಈ ಬಾರಿ ಮೆಕ್ಕೆಜೋಳ ಬೆಳೆ ಬೆಳೆದ ನಂತರ ರಾಗಿ ಬಿತ್ತನೆ ಮಡಿದ್ದರು. ಕಡಿಮೆ ಖರ್ಚಿನ, ನಿರೀಕ್ಷಿತ ಆದಾಯ‌ ತರುತ್ತಿರುವ ರಾಗಿ ಬೆಳೆ ರೈತರ ಕೈ ಹಿಡಿದಿದೆ. ಈಗಾಗಲೇ ಕಟಾವು ಯಂತ್ರಗಳು ರಾಗಿ ಜಮೀನುಗಳಲ್ಲಿ ಸದ್ದು ಮಾಡುತ್ತಿದ್ದು, ರೈತರಿಗೆ ರಾಗಿ ಕೊಯ್ಲು, ಸಾಗಣೆ, ಒಕ್ಕಣೆ, ತೂರುವ ಕಷ್ಟ ಇಲ್ಲದಂತಾಗಿದೆ.

ದಾವಣಗೆರೆ ತಾಲ್ಲೂಕಿನಲ್ಲಿ ಈ ವರ್ಷ ಹಿಂಗಾರು ಹಂಗಾಮಿನಲ್ಲಿ 1,457 ಹೆಕ್ಟೇರ್ ಪ್ರದೇಶದಲ್ಲಿ ರಾಗಿ ಬಿತ್ತನೆಯಾಗಿದ್ದು, ಮೂರು ತಿಂಗಳ ಹಿಂದೆ ಬಿತ್ತನೆ ಮಾಡಿದ್ದ ರೈತರಿಗೆ ಬೆಳೆ ಕೈಸೇರುತ್ತಿದೆ. ಮೊದಲೆಲ್ಲ ರಾಗಿ ಬಿತ್ತನೆಗೆ ಭೂಮಿ ಸಿದ್ಧತೆ, ಬಿತ್ತನೆ, ಎಡೆಕುಂಟೆ, ಕಳೆ, ಗೊಬ್ಬರ, ಕಟಾವು, ಒಕ್ಕಣೆ ಸೇರಿ ಸಂಪೂರ್ಣ ಬೆಳೆ ಮುಗಿಯುವ ವೇಳೆಗೆ ಒಂದು ಎಕರೆ ರಾಗಿ ಬೆಳೆಯಲು ₹ 20,000ಕ್ಕೂ ಹೆಚ್ಚು ಖರ್ಚು ಬರುತ್ತಿತ್ತು. ಈಗ ಸಂಪೂರ್ಣ ಯಾಂತ್ರೀಕರಣದಿಂದ ಬೆಳೆ ಬೆಳೆಯಲು ₹ 15,000 ಖರ್ಚು ತಗಲುತ್ತದೆ. ರಾಗಿ ಪ್ರತಿ ಕ್ವಿಂಟಲ್‌ಗೆ ₹ 3,500ರಿಂದ ₹ 3,800 ದರ ಇದ್ದು, ರೈತರಿಗೆ ಲಾಭ ತರುತ್ತಿದೆ.

ಜೊತೆಗೆ ರಾಗಿ ಹುಲ್ಲಿಗೆ ಬೇಡಿಕೆ ಹೆಚ್ಚುತ್ತಿದ್ದು, ಪೆಂಡಿ ಕಟ್ಟಿದ್ದ ಹುಲ್ಲಿಗೆ ಅಂದಾಜು ₹ 250ರಿಂದ ₹ 300ರಂತೆ ಖರೀದಿಸುತ್ತಿದ್ದು, ಬೆಳೆ ಬೆಳೆದ ಖರ್ಚೆಲ್ಲ ಹುಲ್ಲಿನಲ್ಲಿಯೇ ಬರುತ್ತದೆ. ಆದ್ದರಿಂದ ಈಗ ರಾಗಿ ಬೆಳೆ ಸುಲಭವಾಗಿದೆ ಎಂಬುದು ರೈತರ ಅಭಿಪ್ರಾಯ.