ದಾವಣಗೆರೆ | ಭತ್ತ ಖರೀದಿ ನೋಂದಣಿ ಪ್ರಕ್ರಿಯೆ ಆರಂಭಿಸಲು ಒತ್ತಾಯ

ದಾವಣಗೆರೆ: ‘ಭತ್ತ ಖರೀದಿ ನೋಂದಣಿ ಪ್ರಕ್ರಿಯೆಯನ್ನು ಕೂಡಲೇ ಆರಂಭಿಸಬೇಕು. ಜಿಲ್ಲೆಯಲ್ಲಿ ನವೆಂಬರ್ ತಿಂಗಳಲ್ಲಿ ಭತ್ತ, ರಾಗಿಯ ಕೊಯ್ಲು ಆರಂಭವಾಗುವುದರಿಂದ ಆ ಅವಧಿಯವರೆಗೂ ನೋಂದಣಿ ಪ್ರಕ್ರಿಯೆಯನ್ನು ಮುಂದುವರಿಸಬೇಕು’ ಎಂದು ಒತ್ತಾಯಿಸಿ ‘ಜಿಲ್ಲಾ ರೈತರ ಒಕ್ಕೂಟ’ದ ಮುಖಂಡರು ಶುಕ್ರವಾರ ಪ್ರತಿಭಟನೆ ನಡೆಸಿದರು. 

ಇಲ್ಲಿನ ಎಪಿಎಂಸಿಯಲ್ಲಿನ ಖರೀದಿ ನೋಂದಣಿ ಕೇಂದ್ರದ ಮುಂಭಾಗ ಸೇರಿದ ರೈತ ಮುಖಂಡರು ಜಿಲ್ಲಾಡಳಿತದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. 

‘ಕನಿಷ್ಠ ಬೆಂಬಲ ಬೆಲೆ ಯೋಜನೆಯಡಿ ಭತ್ತ, ರಾಗಿ ಖರೀದಿ ಕೇಂದ್ರ ಪ್ರಾರಂಭಿಸುವುದಾಗಿ ಜಿಲ್ಲಾಡಳಿತ ತಿಳಿಸಿ 25 ದಿನಗಳಾಗಿವೆ. ಆದರೂ, ಖರೀದಿ ನೋಂದಣಿ ಪ್ರಕ್ರಿಯೆ ನಡೆಯುತ್ತಿಲ್ಲ. ಖರೀದಿ ನೋಂದಣಿ ಕೇಂದ್ರಕ್ಕೆ ಯಾವಾಗಲೂ ಬೀಗ ಹಾಕಿರುತ್ತದೆ. ಅಧಿಕಾರಿಗಳು ತಾತ್ಸಾರ ಮನೋಭಾವದಿಂದ  ನಡೆದುಕೊಳ್ಳುತ್ತಿದ್ದಾರೆ. ರೈತರಿಗೆ ಏನಾದಾರೊಂದು ಕಾರಣ ಹೇಳಿ ವಾಪಸ್ ಕಳುಹಿಸುತ್ತಿದ್ದಾರೆ’ ಎಂದು ಪ್ರತಿಭಟನಕಾರರು ದೂರಿದರು. 

‘ಮೊದಲು ಸಾಫ್ಟವೇರ್ ಸಿದ್ಧಪಡಿಸಿಲ್ಲ ಎಂದರು. ಸಾಫ್ಟವೇರ್ ಸಿದ್ಧಗೊಂಡ ಮೇಲೂ ಸರಿಯಾಗಿ ನೋಂದಣಿ ಆಗುತ್ತಿಲ್ಲ. ರೈತರ ಬಗ್ಗೆ ಜಿಲ್ಲಾಡಳಿತ ನಿರ್ಲಕ್ಷ್ಯ ಧೋರಣೆ ತಾಳಿದೆ. ಖರೀದಿ ಕೇಂದ್ರ ಆರಂಭಿಸುವಲ್ಲಿ ಜಿಲ್ಲಾಡಳಿತಕ್ಕೆ ಇಚ್ಛಾಶಕ್ತಿ ಇಲ್ಲ. ಕೇವಲ ಕಾಲಹರಣ ಮಾಡಿ ಕೈ ತೊಳೆದುಕೊಳ್ಳುವ ಕುತಂತ್ರ ನಡೆದಿದೆ’ ಎಂದು ಆರೋಪಿಸಿದರು. 

‘ಖರೀದಿ ನೋಂದಣಿಗಾಗಿ ರೈತರು ಫ್ರೂಟ್ಸ್‌ ಐಡಿ ಸಂಖ್ಯೆ ತಂದರೆ ಸಾಕು. ಬೇರೆ ದಾಖಲೆಗಳನ್ನು ತರುವ ಅಗತ್ಯವಿಲ್ಲ. ರೈತರ ಹೆಸರು, ಜಮೀನಿನ ವಿವರ, ಬೆಳೆದಿರುವ ಬೆಳೆ ಸೇರಿದಂತೆ ಅಗತ್ಯ ಮಾಹಿತಿ ಫ್ರೂಟ್ಸ್‌ ದತ್ತಾಂಶದಲ್ಲಿರುತ್ತದೆ ಎಂದು ಜಿಲ್ಲಾ ಟಾಸ್ಕ್ ಫೋರ್ಸ್ ಸಭೆಯಲ್ಲಿ ಚರ್ಚಿಸಲಾಗಿತ್ತು. ಆದರೆ, ಖರೀದಿ ಕೇಂದ್ರದ ಅಧಿಕಾರಿಗಳು ಅನಗತ್ಯ ದಾಖಲೆ ಕೇಳುತ್ತಿರುವುದು ಸರಿಯಲ್ಲ’ ಎಂದು ‘ಜಿಲ್ಲಾ ರೈತರ ಒಕ್ಕೂಟ’ದ ಅಧ್ಯಕ್ಷ ಕೊಳೇನಹಳ್ಳಿ ಬಿ.ಎಂ. ಸತೀಶ್ ಹೇಳಿದರು. 

ಆಹಾರ ಮತ್ತು ನಾಗರಿಕ ಸರಬರಾಜು ನಿಗಮದ ಜಿಲ್ಲಾ ವ್ಯವಸ್ಥಾಪಕ ನಾಗರಾಜ್ ಮನವಿ ಪತ್ರ ಸ್ವೀಕರಿಸಿದರು.  

ಮುಖಂಡರಾದ ಲೋಕಿಕೆರೆ ನಾಗರಾಜ್, ಅಣಬೇರು ಜೀವನಮೂರ್ತಿ, ಧನಂಜಯ ಕಡ್ಲೆಬಾಳ್, ಬೆಳವನೂರು ನಾಗೇಶ್ವರರಾವ್, ಗೋಣಿವಾಡ ಮಂಜುನಾಥ, ತಾರೇಶನಾಯ್ಕ, ಆರನೇಕಲ್ಲು ವಿಜಯಕುಮಾರ್, ಆವರಗೆರೆ ಅಜ್ಜನಗೌಡ್ರು, ಕಲ್ಪನಹಳ್ಳಿ ಸತೀಶ್, ಉಜ್ಜಪ್ಪ, ರೇವಣಸಿದ್ದಪ್ಪ, ಕಾಡಜ್ಜಿ ಬಿ.ವಿ. ಬಸವರಾಜು, ಕುರ್ಕಿ ರೇವಣಸಿದ್ದಪ್ಪ, ಬಾತಿ ಶಿವಕುಮಾರ್, ಕುಂದುವಾಡ ಜಿಮ್ಮಿ ಹನುಮಂತಪ್ಪ, ಮಹೇಶಪ್ಪ, ಹಾಲೇಶ ನಾಯಕ, ವಾಟರ್ ಮಂಜುನಾಥ, ಬಾತಿ ಶಂಕರಮೂರ್ತಿ, ರೇವಣಸಿದ್ದಪ್ಪ, ರವಿಕುಮಾರ, ಶಿರಮನಳ್ಳಿ ಮಂಜುನಾಥ ಮುಂತಾದವರು ಉಪಸ್ಥಿತರಿದ್ದರು. 

ನವೆಂಬರ್‌ವರೆಗೂ ನೋಂದಣಿ ಪ್ರಕ್ರಿಯೆ ಮುಂದುವರಿಸಲು ಒತ್ತಾಯ ಕಾಲಹರಣ ಮಾಡಿ ಕೈ ತೊಳೆದುಕೊಳ್ಳುವ ಕುತಂತ್ರ: ಆರೋಪ ಜಿಲ್ಲಾಡಳಿತದ ವಿರುದ್ಧ ರೈತ ಮುಖಂಡರ ಆಕ್ರೋಶ