ದುರ್ಬಲ ವರ್ಗದವರ ಬದುಕಿನ ಸಾಹಿತ್ಯ ರಚಿಸಿ: ದಾಮೋದರ ಮಾವುಜೊ

ಧಾರವಾಡ: ‘ದುರ್ಬಲ ವರ್ಗಗಳ (ಅಂಚಿನ ಸಮುದಾಯಗಳು) ಕುರಿತ ಸಾಹಿತ್ಯ ರಚನೆಯನ್ನು ಪ್ರೋತ್ಸಾಹಿಸಬೇಕು. ಓದುಗರ ಹೃದಯ ತಟ್ಟುವಂಥ ಸಾಹಿತ್ಯ ರಚಿಸಬೇಕು’ ಎಂದು ಗೋವಾದ ಸಾಹಿತಿ ದಾಮೋದರ ಮಾವುಜೊ ಹೇಳಿದರು.

ಪ್ರೊಗ್ರೆಸಿವ್ ಕಲ್ಚರಲ್‌ ಅಸೊಸಿಯೇಷನ್‌ ಆಫ್‌ ಇಂಡಿಯಾ (ಪಿಸಿಎಐ) ವತಿಯಿಂದ ನಗರದ ಆಲೂರು ವೆಂಕಟರಾವ್‌ ಸಭಾಂಗಣದಲ್ಲಿ ಭಾನುವಾರ ಆಯೋಜಿಸಿದ್ದ ಸಾಹಿತಿ ಸಿದ್ಧಲಿಂಗ ಪಟ್ಟಣಶೆಟ್ಟಿ ಅವರ ಅಭಿನಂದನಾ ಸಮಾರಂಭದಲ್ಲಿ ಅವರು ಮಾತನಾಡಿದರು.

‘ವಿಚಾರಗಳ (ಅಸಮ್ಮತಿ, ಖಂಡನೆ...) ಅಭಿವ್ಯಕ್ತಿ ಬರೆವಣಿಗೆಯ ಉದ್ದೇಶವಾಗಿದೆ. ಸಾಹಿತ್ಯ ಕ್ಷೇತ್ರದಲ್ಲಿ ಕೇರಳ ಮತ್ತು ಪಶ್ಚಿಮ ಬಂಗಾಳದವರು ಮುಂಚೂಣಿಯಲಿದ್ದಾರೆ. ಈ ರಾಜ್ಯಗಳವರು ದುರ್ಬಲ ವರ್ಗಗಳ ಜನರ ಬಗ್ಗೆ ಕಾಳಜಿ ತೋರುತ್ತಾರೆ. ಆ ಜನರ ವಿಷಯಗಳ ಕುರಿತು ಸಾಹಿತ್ಯ ರಚಿಸುತ್ತಾರೆ’ ಎಂದು ಹೇಳಿದರು.

‘ಭಾರತವು ವಿವಿಧತೆಯ ದೇಶ. ವಿವಿಧ ಭಾಷೆಗಳ ಜನರು ಇದ್ಧಾರೆ. ಸಿದ್ದಲಿಂಗ ಪಟ್ಟಣಶೆಟ್ಟಿ ಅವರು ಕನ್ನಡ ಮತ್ತು ಹಿಂದಿ ಸಾಹಿತ್ಯಕ್ಕೆ ಅಪಾರ ಕೊಡುಗೆ ನೀಡಿದ್ಧಾರೆ. ಕಾವ್ಯ, ಗದ್ಯ, ನಾಟಕಗಳನ್ನು ಬರೆದಿದ್ದಾರೆ. ಅನುವಾದ ಮಾಡಿದ್ದಾರೆ. ಭಾಷೆಗಳ ನಡುವಿನ ಬಾಂಧವ್ಯವನ್ನು ಗಟ್ಟಿಗೊಳಿಸಿದ್ದಾರೆ. ಓದುಗರನ್ನು ತಲುಪಿದ್ಧಾರೆ. ಇಂಥ ಸಾಹಿತಿಗಳ ಪರಂಪರೆ ಮುಂದುವರಿಯಬೇಕು’ ಎಂದರು.

‘ದಕ್ಷಿಣ ಭಾರತದವರು ಹಿಂದಿ ಭಾಷೆಯನ್ನು ಇಷ್ಟಪಡುವುದಿಲ್ಲ ಎಂಬ ಭಾವನೆ ಉತ್ತರ ಭಾರತದವರಲ್ಲಿ ಇದೆ. ನಾವು ಹಿಂದಿಯನ್ನು ಪ್ರೀತಿಸುತ್ತೇವೆ. ಆದರೆ, ಕೇಂದ್ರ ಸರ್ಕಾರವು ಆ ಭಾಷೆಯನ್ನು ಹೇರುವುದನ್ನು ಒಪ್ಪುವುದಿಲ್ಲ. ಮಾತೃಭಾಷೆ ಮತ್ತು ದೇಶದ ಇತರ ಭಾಷೆಗಳನ್ನು ಪ್ರೀತಿಸುತ್ತೇವೆ’ ಎಂದು ಹೇಳಿದರು.