ಹುಬ್ಬಳ್ಳಿ | ಚರ್ಮ ವಾದ್ಯ ಮರೆಸಿದ ಫೈಬರ್ ಹಲಗೆ: ಸಂಕಷ್ಟದಲ್ಲಿ ಚರ್ಮಕಾರರ ಬದುಕು

ಹುಬ್ಬಳ್ಳಿ: ಹೋಳಿ ಹಬ್ಬದಲ್ಲಿ ಎರಚುವ ಬಣ್ಣಕ್ಕೆ ಇರುವಷ್ಟೇ ಮಹತ್ವ ಹಲಗೆ, ಜಗ್ಗಲಗಿ, ಕಣಿಯಂಥ ವಾದ್ಯಗಳಿಗೂ ಇವೆ. ಹಿಂದೆಲ್ಲ ಚರ್ಮದಿಂದ ಸಿದ್ಧವಾಗುತ್ತಿದ್ದ ಈ ವಾದ್ಯಗಳು ಇಂದು ಫೈಬರ್ ರೂಪ ತಾಳಿವೆ.

ಕೆಲವು ವರ್ಷಗಳಿಂದ ಹೋಳಿ ದಿನ ಎಲ್ಲಿ ನೋಡಿದರಲ್ಲಿ ಫೈಬರ್ ಹಲಗೆಯ ಸದ್ದು ಸಾಮಾನ್ಯವಾಗಿದೆ, ಮೋಜಿನ ಭಾಗವಾಗಿದೆ. ಆದರೆ ಚರ್ಮ ವಾದ್ಯ ತಯಾರಿಸಿ ಹಬ್ಬದ ಮೆರುಗು ಹೆಚ್ಚಿಸುವ ಜತೆಗೆ ಹೊಟ್ಟೆಪಾಡಿಗೆ ನಾಲ್ಕು ಕಾಸು ಸಂಪಾದಿಸುತ್ತಿದ್ದ ಚರ್ಮಕಾರರ ಬದುಕಿನ ಸಂಭ್ರಮವನ್ನು ದೂರವಾಗಿಸಿದೆ.

ನಗರದ ಹಳೆಯ ಕೋರ್ಟ್ ವೃತ್ತದಲ್ಲಿ ಭಾರಿ ಪ್ರಮಾಣದಲ್ಲಿ ಫೈಬರ್ ಹಲಗೆ ಮಾರಾಟಕ್ಕಿಡಲಾಗಿದೆ. ಹಾವೇರಿ ಜಿಲ್ಲೆಯ ಶಿಗ್ಗಾವಿ, ಗದಗ ಜಿಲ್ಲೆಯ ಮುಂಡರಗಿ, ನರಗುಂದ ಹಾಗೂ ಮಹಾರಾಷ್ಟ್ರದ ಮಿರಜ್‌ನಿಂದ ಬಂದು ಇಲ್ಲಿ ವ್ಯಾಪಾರ ಮಾಡುತ್ತಾರೆ.

ಮೂಲತಃ ಈ ಕುಟುಂಬದವರು ಚರ್ಮ ವಾದ್ಯ ತಯಾರಕರು. ಹಾರ್ಮೋನಿಯಂ, ತಬಲಾ ಮತ್ತಿತರ ವಾದ್ಯಗಳನ್ನು ಸಿದ್ಧಪಡಿಸುವುದು ಹಾಗೂ ದುರಸ್ತಿ ಮಾಡುವುದು ಇವರ ಕುಲಕಸುಬು. ಬದಲಾದ ಕಾಲಕ್ಕೆ ತಕ್ಕಂತೆ ಅವರೂ ಫೈಬರ್ ವಾದ್ಯ ಮಾರಾಟ ಮಾಡುವ ಅನಿವಾರ್ಯತೆಗೆ ಸಿಲುಕಿದ್ದಾರೆ. ಮರಳಿ ಊರಿಗೆ ಹೋದ ಬಳಿಕ ತಮ್ಮ ಕುಲಕಸುಬನ್ನೇ ಮುಂದುವರಿಸುತ್ತಾರೆ.

ಚರ್ಮ ವಾದ್ಯ ಸಿದ್ಧಪಡಿಸಲು ಹೆಚ್ಚಿನ ಶ್ರಮ, ಸಮಯ, ಕೌಶಲ ಬೇಡುತ್ತದೆ. ವಾದ್ಯ ತಯಾರಿಸುವ ಗುಣಮಟ್ಟದ ಚರ್ಮ ದೊರೆಯುವುದೂ ವಿರಳವಾಗಿದೆ. ಫೈಬರ್ ಹಲಗೆಯು ಕಾರ್ಖಾನೆಗಳಲ್ಲಿ ಭಾರಿ ಪ್ರಮಾಣದಲ್ಲಿ ಸಿದ್ಧವಾಗುತ್ತವೆ. ಪರಿಣಾಮವಾಗಿ ಉತ್ಪಾದನಾ ವೆಚ್ಚವೂ ಕಡಿಮೆ. ಈ ಎಲ್ಲ ಕಾರಣಗಳಿಂದ ಫೈಬರ್ ಹಲಗೆಗೆ ಹೋಲಿಸಿದರೆ ಚರ್ಮ ವಾದ್ಯಗಳ ಬೆಲೆಯೂ ಹೆಚ್ಚು.

‘ಫೈಬರ್ ಹಲಗೆಗಳನ್ನು ಕಾರ್ಖಾನೆಗಳಲ್ಲಿ ಸಿದ್ಧಪಡಿಸುತ್ತಾರೆ. ನಾವು ಮಾರಾಟ ಮಾಡಿ ಹೊಟ್ಟೆ ಹೊರೆದುಕೊಂಡರೂ ಹೆಚ್ಚಿನ ಲಾಭ ಕಾರ್ಖಾನೆಯವರಿಗೆ ಆಗುತ್ತದೆ. ಚರ್ಮ ವಾದ್ಯವನ್ನೇ ಜನರು ಬಳಸಿದರೆ ಅವುಗಳ ತಯಾರಿಸುವ ಕೈಗಳಿಗೆ ಕೆಲಸ, ನಾಲ್ಕು ಕಾಸು ಸಿಗುತ್ತಿತ್ತು. ಕಾಲ ಬದಲಾಗಿದೆ. ಕಲಾವಿದರ ಬದುಕು ಕಷ್ಟದಲ್ಲಿದೆ’ ಎಂದು ಮಂಜುನಾಥ ಹನುಮಂತಪ್ಪ ಬಗರಿಕಾರ ಬೇಸರ ವ್ಯಕ್ತಪಡಿಸಿದರು.

ಹಲಗೆಯ ಹಲವು ಮುಖಗಳು...

ಗ್ರಾಹಕರ ಅಭಿರುಚಿಗೆ ತಕ್ಕಂತೆ ಭಿನ್ನ ಗಾತ್ರ ಚಿತ್ರ ಬಣ್ಣಗಳಲ್ಲಿ ಫೈಬರ್ ಹಲಗೆ ಲಭ್ಯವಿದೆ. ₹80ರಿಂದ ₹1200ರ ವರೆಗೂ ಹಲಗೆ ಮಾರಾಟವಾಗುತ್ತಿವೆ. ವಿರಾಟ್ ಕೊಹ್ಲಿ ರೋಹಿತ್ ಶರ್ಮಾ ಶಿವಾಜಿ ಮಹಾರಾಜ ಹುಲಿ ಸಿಂಹ ತಬಲಾ ಸ್ಯಾಕ್ಸೊಫೋನ್ ವೀಣೆ ಮಕ್ಕಳ ನೆಚ್ಚಿನ ಮೋಟು– ಪತ್ಲು ಸ್ಪೈಡರ್ ಮ್ಯಾನ್ ಕಾರ್ಟೂನ್ ಹೀಗೆ ಹಲವು ಬಗೆಯ ಆಕರ್ಷಕ ಚಿತ್ರಗಳಿರುವ ಹಲಗೆಗಳು ಗ್ರಾಹಕರಿಗಾಗಿ ಎದುರುನೋಡುತ್ತಿವೆ.