ಬಂಗಾರಪೇಟೆ: ಆನೆ ದಾಳಿಗೆ ಬೆಳೆ ನಾಶ

ಬಂಗಾರಪೇಟೆ: ತಾಲ್ಲೂಕಿನ ಕದಿರಿನತ್ತ ಗ್ರಾಮದಲ್ಲಿ ಸೋಮವಾರ ರಾತ್ರಿ ಕಾಡಾನೆ ಗದ್ದೆಯಲ್ಲಿ ಓಡಾಡಿ ಭತ್ತವನ್ನು ತಿಂದು, ತುಳಿದು ನಾಶ ಮಾಡಿದೆ. ಇದರಿಂದ ರೈತರಿಗೆ ಅಪಾರ ನಷ್ಟವುಂಟಾಗಿದೆ.

ಗ್ರಾಮದ ಸಂತೋಷ ರಾವ್ ಮತ್ತು ಈಶ್ವರ ರಾವ್ ಅವರ ಗದ್ದೆ ತುಳಿದು ಸುಮಾರು ₹50 ಸಾವಿರ ಮೌಲ್ಯದ ಬೆಳೆ ನಾಶವಾಗಿದೆ. ಹಾಗಾಗಿ ಉಳಿದ ರೈತರು ಕಷ್ಟಪಟ್ಟು ಬೆಳೆದ ರಾಗಿ, ತೆಂಗು, ಬಾಳೆ, ಭತ್ತ, ರಾಗಿ ಸೇರಿದಂತೆ ವಿವಿಧ ಬೆಳೆಗಳನ್ನು ನಾಶಪಡಿಸುತ್ತವೆ ಎಂಬ ಭಯದಲ್ಲಿದ್ದಾರೆ.

ಆನೆ ದಾಳಿ ನಿರಂತರವಾಗಿದೆ. ಬೆಳೆದ ಬೆಳೆ ಕೈಸೇರದೆ ರೈತರು ಆರ್ಥಿಕ ಸಂಕಷ್ಟಕ್ಕೆ ಗುರಿಯಾಗುತ್ತಿದ್ದಾರೆ. ಈ ಬಗ್ಗೆ ಅಧಿಕಾರಿಗಳ ಗಮನಕ್ಕೂ ತಂದರೂ ಪ್ರಯೋಜನವಾಗಿಲ್ಲ ಎಂಬುದು ರೈತರ ಅಳಲಾಗಿದೆ.