‘ರಂಗಾಯಣಗಳ ನಾಟಕ ಉತ್ಸವ’ ನ.30ರಿಂದ ಜ.4ರವರೆಗೆ

ಮೈಸೂರು: ಇಲ್ಲಿನ ರಂಗಾಯಣದಲ್ಲಿ ಮುಂಬರುವ ಜನವರಿಯಲ್ಲಿ ಆಯೋಜಿಸಲು ಉದ್ದೇಶಿಸಿರುವ ‘ಬಹುರೂಪಿ ರಾಷ್ಟ್ರೀಯ ನಾಟಕೋತ್ಸವ’ದ ಮುನ್ನಡಿಯಾಗಿ ನ.30ರಿಂದ ಜ.4ರವರೆಗೆ ‘ರಂಗಾಯಣಗಳ ನಾಟಕ ಉತ್ಸವ–2025–26’ ಹಮ್ಮಿಕೊಳ್ಳಲಾಗಿದೆ.

‘ರಂಗಾಯಣದ ಭೂಮಿಗೀತ ರಂಗಮಂದಿರದಲ್ಲಿ ಪ್ರತಿ ಭಾನುವಾರ ಉತ್ಸವ ನಡೆಯಲಿದೆ. ನಾಡಿನ ಎಲ್ಲ ರಂಗಾಯಣ ರೆಪರ್ಟರಿಗಳ ನಾಟಕಗಳನ್ನು ಆಹ್ವಾನಿಸಿ ವಾರಾಂತ್ಯದಲ್ಲಿ ಪ್ರದರ್ಶಿಸಲಾಗುವುದು’ ಎಂದು ನಿರ್ದೇಶಕ ಸತೀಶ್‌ ತಿಪಟೂರು ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

‘ನಮ್ಮ ರಂಗಾಯಣದೊಂದಿಗೆ ಶಿವಮೊಗ್ಗ, ಧಾರವಾಡ, ಕಲಬುರಗಿ ರಂಗಾಯಣಗಳು, ಕಾರ್ಕಳದ ಯಕ್ಷ ರಂಗಾಯಣ, ದಾವಣಗೆರೆಯ ವೃತ್ತಿ ರಂಗಾಯಣದ ಕಲಾವಿದರು ಸಂಜೆ 6.30ಕ್ಕೆ ಅಭಿನಯಿಸಲಿದ್ದಾರೆ’ ಎಂದು ಮಾಹಿತಿ ನೀಡಿದರು.

‘ರಾಜ್ಯ ಸರ್ಕಾರದಿಂದ ರಂಗಾಯಣಕ್ಕೆ ಘೋಷಿಸಿರುವ ₹ 2 ಕೋಟಿಯಲ್ಲಿ ₹ 1 ಕೋಟಿ ಬಿಡುಗಡೆಯಾಗಿದೆ. ಅದರಲ್ಲಿ ಬಹುರೂ‍ಪಿ ನಾಟಕೋತ್ಸವದ ವೆಚ್ಚವನ್ನು ನಿರ್ವಹಿಸಲಾಗುವುದು’ ಎಂದು ಹೇಳಿದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ವಿಭಾಗೀಯ ಜಂಟಿ ನಿರ್ದೇಶಕ ವಿ.ಎನ್. ಮಲ್ಲಿಕಾರ್ಜುನ ಸ್ವಾಮಿ, ಸಹಾಯಕ ನಿರ್ದೇಶಕ ಎಂ.ಡಿ. ಸುದರ್ಶನ್‌, ಕಲಾವಿದೆಯರಾದ ನಂದಿನಿ ಕೆ.ಆರ್. ಹಾಗೂ ಶಶಿಕಲಾ ಬಿ.ಎನ್. ಪಾಲ್ಗೊಂಡಿದ್ದರು.

ಉತ್ಸವದ ವಿವರ

ದಿನಾಂಕ;ನಾಟಕ;ನಿರ್ದೇಶನ;ತಂಡ

ನ.30;ಗುಲಾಮನ ಸ್ವಾತಂತ್ರ್ಯ ಯಾತ್ರೆ;ಬಿ.ಆರ್‌.ವೆಂಕಟರಮಣ ಐತಾಳ;ಯಕ್ಷ ರಂಗಾಯಣ ಕಾರ್ಕಳ

ಡಿ.1;ಮಹಾತ್ಮರ ಬರವಿಗಾಗಿ;ಶ್ರೀಕಾಂತ್‌ ಎನ್.ವಿ;ಯಕ್ಷ ರಂಗಾಯಣ ಕಾರ್ಕಳ

ಡಿ.7;ಮೈ ಫ್ಯಾಮಿಲಿ;ಗಣೇಶ್ ಮಂದಾರ್ತಿ;ರಂಗಾಯಣ ಮೈಸೂರು

ಡಿ.14;ನಮ್ಮೊಳಗೊಬ್ಬ ಗಾಂಧಿ;ಚಿದಂಬರರಾವ್ ಜಂಬೆ;ರಂಗಾಯಣ ಶಿವಮೊಗ್ಗ

ಡಿ.21;ಪ್ರತಿ ಗಂಧರ್ವ;ಮಾಲತೇಶ್ ಬಡಿಗೇರ;ರಂಗಾಯಣ ದಾವಣಗೆರೆ

ಡಿ.28;ಕಂದಗಲ್ಲ ಭಾರತ;ಪ್ರಕಾಶ್ ಗುರುಡ;ರಂಗಾಯಣ ಧಾರವಾಡ 

ಜ.4;ಕಾಲಚಕ್ರ;ಹುಲುಗಪ್ಪ ಕಟ್ಟೀಮನಿ;ರಂಗಾಯಣ ಕಲಬುರಗಿ