ಹುಣಸೂರು | ಸೌರ ವಿದ್ಯುತ್‌ ನಿಂದ ಉಳಿಕೆ, ಗಳಿಕೆ

ಹುಣಸೂರು: ಬಿಳಿಕೆರೆ ಗ್ರಾಮ ವಿದ್ಯುತ್ ಸ್ವಾವಲಂಬಿಯಾಗುವ ದಿಕ್ಕಿನಲ್ಲಿ ಕೇಂದ್ರ ಸರ್ಕಾರ ಜಾರಿಗೊಳಿಸಿರುವ ‘ಪ್ರಧಾನಮಂತ್ರಿ ಸೂರ್ಯಘರ್‌ ಮುಫ್ತ್‌ ಬಿಜಿಲಿ ಯೋಜನೆ’ ಅನುಷ್ಠಾನಕ್ಕೆ ಸ್ಥಳೀಯ ಆಡಳಿತ ಸಕಲ ಸಿದ್ಧತೆ ನಡೆಸಿದೆ.

2024-25ನೇ ಸಾಲಿನಲ್ಲಿ ‘ಪಿ.ಎಂ. ಸೂರ್ಯಘರ್‌ ಯೋಜನೆ’ಗೆ 5 ಸಾವಿರ ಜನಸಂಖ್ಯೆ ಹೊಂದಿರುವ ಗ್ರಾಮಗಳನ್ನು ಕೇಂದ್ರ ಸರ್ಕಾರ ಆಯ್ಕೆ ಮಾಡಿದೆ. ಹುಣಸೂರು ತಾಲ್ಲೂಕಿನ ಬಿಳಿಕೆರೆ ಈ ಪಟ್ಟಿಯಲ್ಲಿದ್ದು, ಸೌರ ಶಕ್ತಿ ಬಳಸಿ ಮಾದರಿ ಗ್ರಾಮವಾಗಿಸುವ ದಿಕ್ಕಿನಲ್ಲಿ ಸೆಸ್ಕ್‌ ಮತ್ತು ಗ್ರಾಮ ಪಂಚಾಯಿತಿ ಕಾರ್ಯೋನ್ಮುಖವಾಗಿವೆ.

‘ಪ್ರಸಕ್ತ ದಿನದಲ್ಲಿ ವಿದ್ಯುತ್‌ ಬಳಕೆ ಹೊರೆಯಾಗುತ್ತಿದ್ದು, ಮುಕ್ತಗೊಳಿಸುವ ಉದ್ದೇಶದಿಂದ ಪಿ.ಎಂ. ಸೂರ್ಯಘರ್‌ ಯೋಜನೆಯನ್ನು ಕೇಂದ್ರ ಸರ್ಕಾರ ಜಾರಿಗೊಳಿಸಿದೆ. ಈ ಯೋಜನೆ ಯಶಸ್ವಿಗೊಳಿಸಲು ಸೆಸ್ಕ್‌ ಸ್ಥಳೀಯ ಆಡಳಿತದೊಂದಿಗೆ ಕೈ ಜೋಡಿಸಿ ತಾಂತ್ರಿಕ ಸಹಾಯ ನೀಡುತ್ತಿದೆ. ಇಲಾಖೆ  ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುತ್ತಿದೆ’ ಎಂದು  ಬಿಳಿಕೆರೆ ಸೆಸ್ಕ್‌ ಎಇಇ ಅನಿಲ್ ಸಿ.‌ ತಿಳಿಸಿದರು.

₹1 ಕೋಟಿ: ‘ಯೋಜನೆ ಅನುಷ್ಠಾನಗೊಳಿಸಲು ಕೇಂದ್ರ ಸರ್ಕಾರ  ಅನುದಾನ ನೀಡುತ್ತಿಲ್ಲ. ಬದಲಿಗೆ ಮುಂದಿನ 6 ತಿಂಗಳೊಳಗಾಗಿ ಅತಿ ಹೆಚ್ಚು ಸೌರಶಕ್ತಿ ಅಳವಡಿಸಿದ ಗ್ರಾಮಕ್ಕೆ ₹ 1 ಕೋಟಿ ಸಹಾಯ ಧನ ನೀಡಲಿದೆ. ಈ ಅನುದಾನ ಬಳಸಿಕೊಳ್ಳುವ ಸಂಪೂರ್ಣ ಸ್ವಾತಂತ್ರ್ಯ ಪಂಚಾಯಿತಿಗೆ ನೀಡಿದೆ. ಪ್ರತಿ ಪಂಚಾಯಿತಿಯ ವಾರ್ಷಿಕ ವಿದ್ಯುತ್‌ ಬಳಕೆ ಬಿಲ್‌ ಪಾವತಿಸುವುದು  ಬೊಕ್ಕಸಕ್ಕೆ ಹೊರೆ ಆಗುತ್ತಿದ್ದು, ಸೌರ ಶಕ್ತಿ ಬಳಸುವುದರಿಂದ ವಿದ್ಯುತ್‌ ಬಿಲ್‌ ಹೊರೆ ತಗ್ಗಲಿದೆ. ಪಂಚಾಯಿತಿ ಉತ್ಪಾದಿಸುವ ವಿದ್ಯುತ್‌ ಸೆಸ್ಕ್‌ ಪವರ್‌ ಗ್ರಿಡ್‌ ಪ್ರತಿ ಯುನಿಟ್‌ಗೆ ₹ 3.08 ರಂತೆ ಖರೀದಿಸುವುದರಿಂದ ಲಾಭ ಸಿಗಲಿದೆ’ ಎಂದರು .

‘ಬಿಳಿಕೆರೆ ಗ್ರಾಮ ಪಂಚಾಯಿತಿ ಕೇಂದ್ರದಲ್ಲಿ ಸೋಲಾರ್‌ ವಿದ್ಯುತ್‌ 3 ಕಿ.ವ್ಯಾಟ್‌ ಉತ್ಪತ್ತಿ ಮಾಡುತ್ತಿದ್ದೇವೆ.  ಗ್ರಾಮದ ಪ್ರಮುಖ ರಸ್ತೆಗಳಲ್ಲಿ ಸೋಲಾರ್‌ ದೀಪ ಬಳಸುತ್ತಿದ್ದು ಸರ್ಕಾರಿ ಕಚೇರಿಯಲ್ಲಿ ಪ್ಯಾನೆಲ್‌ ಅಳವಡಿಸಲು ಮುಂದಿನ ವಾರ ನಡೆಯುವ ಸಾಮಾನ್ಯ ಸಭೆಯಲ್ಲಿ ಚರ್ಚಿಸಿ ಅನುಷ್ಠಾನ ಮಾಡುತ್ತೇವೆ  ಎಂದು ಬಿಳಿಕೆರೆ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಮಹದೇವಸ್ವಾಮಿ ತಿಳಿಸಿದರು.