ಗುರುಗುಂಟಾ: ಬಿಳಿ ಜೋಳಕ್ಕೆ ಕೆಂಪುಹುಳು ಕಾಟ

ಹಟ್ಟಿ ಚಿನ್ನದ ಗಣಿ: ಗುರುಗುಂಟಾ ಹೋಬಳಿ ವ್ಯಾಪ್ತಿಯಲ್ಲಿ ಬೆಳೆದ ಜೋಳದ ಬೆಳೆಗೆ ಹುಳುಗಳ ಕಾಟ ಹೆಚ್ಚಾಗಿದ್ದು, ರೈತರಲ್ಲಿ ಆತಂಕ ಉಂಟಾಗಿದೆ.

ಯಲಗಟ್ಟಾ, ಮಾಚನೂರು, ಕೋಠಾ, ಮೇಧಿನಾಪೂರ, ಗೆಜ್ಜಲ ಗಟ್ಟಾ, ಆನ್ವರಿ, ನಿಲೋಗಲ್, ವೀರಾಪೂರ, ಮೇದಿನಾಪೂರ, ಕಡ್ಡೊಣಿ, ಗೌಡೂರು, ಪೈದೊಡ್ಡಿ, ಯರಜಂತಿ, ಬಂಡೆಭಾವಿ ಗ್ರಾಮದ ರೈತರು ನೀರಾವರಿ ಪ್ರದೇಶದಲ್ಲಿ 267 ಹೆಕ್ಟೇರ್, ಒಣಭೂಮಿಯಲ್ಲಿ 500 ಹೆಕ್ಟೇರ್ ಪ್ರದೇಶದಲ್ಲಿ ಜೋಳ ಬಿತ್ತನೆ
ಮಾಡಿದ್ದಾರೆ.

‘ಹೈನುಗಾರಿಕೆ ಮಾಡಿ ಆರ್ಥಿಕತೆ ಸುಧಾರಿಸಿಕೊಳ್ಳಬೇಕು ಎಂದುಕೊಂಡರೆ ಜಾನುವಾರಗಳಿಗೆ ಬೇಸಿಗೆ ಕಾಲದಲ್ಲಿ ಮೇವು ಬೇಕು. ಆದರೆ, ಹುಳು ಕಾಟದಿಂದ ಜೋಳದ‌ ಕಣಿಕೆ ಸಿಗದಂತೆ ಆಗಬಹುದು’ ಎನ್ನುತ್ತಾರೆ ರೈತ ದುರುಗಪ್ಪ.

ಜೋಳದ ಬೆಳೆಯ ಸುಳಿಯಲ್ಲಿರುವ ಹುಳುಗಳನ್ನು ಕೊಲ್ಲುವುದು ರೈತರಿಗೆ ಸವಾಲಾಗಿದೆ. ‌ಎಲೆಗಳು ಕೆಂಪು‌ ಬಣ್ಣಕ್ಕೆ ತಿರುಗಿ ಒಣಗುತ್ತಿವೆ. ಇದರಿಂದ ಸಾಲ ಮಾಡಿ ಬಿತ್ತನೆ ಮಾಡಿದರೂ ಫಲ ಕೈಗೆ ಬರುವುದಿಲ್ಲ ಎಂಬ ಬೇಸರ ರೈತರದ್ದು. 

ಮಳೆಯಿಂದ ಅನೇಕ ಬೆಳೆಗಳು ಹಾಳಾಗಿವೆ. ಜೋಳಕ್ಕೆ ಕೆಂಪು ಸುಳಿ ರೋಗದ ಕಾಟ ಹೆಚ್ಚಾಗಿದ್ದು, ಈ ಭಾಗದ ರೈತರು ಕಂಗಾಲಾಗಿದ್ದಾರೆ.

ಜೋಳಕ್ಕೆ ಯಾವುದೇ ಕೀಟನಾಶಕ ಸಿಂಪಡಣೆ ಮಾಡುತ್ತಿದ್ದಿಲ್ಲ. ಕೆಲವು ವರ್ಷದಿಂದ ಜೋಳಕ್ಕೆ ರೋಗ ತಗುಲುತ್ತಿದ್ದು, ರೈತರನ್ನು ಚಿಂತೆಗೆ ತಳ್ಳಿದೆ ಎನ್ನುತ್ತಾರೆ ಅಂಬಣ್ಣ.

ರೈತರ ನೆರವಿಗೆ ಆಗಮಿಸಬೇಕಾದ ಅಧಿಕಾರಿಗಳು ಸಮಸ್ಯೆಗಳನ್ನು ಆಲಿಸುವಲ್ಲಿ ವಿಫಲವಾಗಿದ್ದಾರೆ. ರೈತ ಸಂಪರ್ಕ ಕೇಂದ್ರದ ಕೃಷಿ ಅಧಿಕಾರಿಗಳು ನೆರವಿಗೆ ಬರಬೇಕು ಎನ್ನುವುದು ಅನ್ನದಾತರ ಆಗ್ರಹ.