ಚನ್ನಪ‍ಟ್ಟಣ ಕ್ರಾಫ್ಟ್ ಪಾರ್ಕ್‌ಗೆ ಫ್ರಾನ್ಸ್ ವಿದ್ಯಾರ್ಥಿಗಳ ತಂಡ ಭೇಟಿ

ಚನ್ನಪಟ್ಟಣ: ಫ್ರಾನ್ಸ್ ದೇಶದ ಲಿಸಾ ಸ್ಕೂಲ್ ಆಫ್ ಡಿಸೈನಿಂಗ್ ವಿದ್ಯಾರ್ಥಿಗಳು ಶುಕ್ರವಾರ ಚನ್ನಪಟ್ಟಣ ಕ್ರಾಫ್ಟ್ ಪಾರ್ಕ್‌ಗೆ ಭೇಟಿ ನೀಡಿ ಬೊಂಬೆ ತಯಾರಿಕಾ ಸಾಂಪ್ರದಾಯಿಕ ಕಲೆ ಬಗ್ಗೆ ತಿಳಿದುಕೊಂಡರು. ಕರ್ನಾಟಕ ಪ್ರವಾಸದ ಭಾಗವಾಗಿ ಭೇಟಿ ನೀಡಿದ್ದರು.

ಬೊಂಬೆ ತಯಾರಿಕಾ ಕುಶಲಕರ್ಮಿಗಳೊಂದಿಗೆ ಸಂವಾದ ನಡೆಸಿದರು. ಬೊಂಬೆಗಳಿಗೆ ಬಳಸುವ ಮರ, ಬೊಂಬೆ ಮಾಡುವ ಮೊದಲು ಮಾಡಿಕೊಳ್ಳುವ ತಯಾರಿಕೆ, ಬೊಂಬೆಗಳಿಗೆ ಬಣ್ಣ ಹಾಕುವ ವಿಧಾನ ಸೇರಿದಂತೆ ಹಲವು ವಿಚಾರಗಳ ಬಗ್ಗೆ ಮಾಹಿತಿ ಪಡೆದರು.

ತಲೆಮಾರುಗಳಿಂದ ಬಂದಿರುವ ಸಾಂಪ್ರದಾಯಿಕ ಕಲೆಯ ಹಿನ್ನೆಲೆ ಕುರಿತು ಪ್ರಶ್ನಿಸಿದರು. ಕುಶಲಕರ್ಮಿಗಳ ವಾಸ್ತುಶೈಲಿ ಪರಂಪರೆ, ಕಾರ್ಯಕ್ಷಮತೆ ಹಾಗೂ ಕಲೆ ಗೌರವಿಸುವ ವಿಧಾನಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು. ಬೊಂಬೆ ತಯಾರಿಕೆ, ವಿನ್ಯಾಸಗಳನ್ನು ವಿಡಿಯೊ  ಚಿತ್ರೀಕರಣ ಮಾಡಿಕೊಂಡರು.