ಕನಕಪುರ | ಅವೈಜ್ಞಾನಿಕ ರಸ್ತೆ ಉಬ್ಬು: ಅಪಘಾತದ ಹಾಟ್‌ಸ್ಪಾಟ್ ತುಂಗಣಿ ಬೈಪಾಸ್

ಕನಕಪುರ: ನಿರಂತರವಾಗಿ ಆಗುತ್ತಿದ್ದ ಅಪಘಾತಗಳನ್ನು ತಡೆಗಟ್ಟಲು ಹೆದ್ದಾರಿಗೆ ಅಳವಡಿಸಿರುವ ರಸ್ತೆ ಉಬ್ಬುಗಳೇ ಇಂದು ವಾಹನ ಸವಾರರ ಪಾಲಿಗೆ ಮೃತ್ಯುವಾಗಿ ಜೀವಕ್ಕೆ ಕುತ್ತು ತರುವಂತಾಗಿವೆ.

ತಾಲ್ಲೂಕಿನ ತುಂಗಣಿ ಬೈಪಾಸ್ ಸೇರುವ ಬೆಂಗಳೂರು 948 ಹೆದ್ದಾರಿಗೆ ಅವೈಜ್ಞಾನಿಕವಾಗಿ ರಸ್ತೆ ಉಬ್ಬುಗಳನ್ನು ಅಳವಡಿಸಿದ್ದು ಈ ಜಾಗದಲ್ಲಿ ನಿರಂತರ ಅಪಘಾತ ಸಂಭವಿಸುತ್ತಿದೆ.

ಕನಕಪುರ ನಗರದ ಮಾರ್ಗವಾಗಿ ಹಾದು ಹೋಗಿದ್ದ ಹೆದ್ದಾರಿ 948ನ್ನು ನಗರದ ಹೊರವಲಯದಲ್ಲಿ ಬೈಪಾಸ್ ಮಾಡಿದ ಮೇಲೆ ತುಂಗಣಿ ಗೇಟ್ ಬಳಿ ನಿರಂತರವಾಗಿ ಅಪಘಾತ ಪ್ರಾರಂಭವಾಯಿತು.

ಹೆದ್ದಾರಿಯಲ್ಲಿ ಹೋಗುವ ವಾಹನಗಳು ಮತ್ತು ಕನಕಪುರದ ಕಡೆಗೆ ಮಾರ್ಗ ಬದಲಿಸುವ ವಾಹನಗಳ ನಡುವೆ ಅಪಘಾತಗಳು ನಡೆಯುತ್ತಿದ್ದವು. ಆ ಜಾಗದಲ್ಲಿ ಅಂಡರ್‌ಪಾಸ್ ಮಾಡದಿರುವುದೆ ಅಪಘಾತಕ್ಕೆ ಕಾರಣವಾಗಿತ್ತು.

ನಿರಂತರ ಅಪಘಾತ ನಡೆದು ಸಾವು ನೋವುಗಳಾಗುತ್ತಿದ್ದಾಗ ತಾಲ್ಲೂಕಿನ ಜನತೆ ಸಂಸದ ಡಾ.ಸಿ.ಎನ್.ಮಂಜುನಾಥ್ ಅವರಲ್ಲಿ ಅಪಘಾತ ತಡೆಗೆ ಅಂಡರ್‌ಪಾಸ್ ನಿರ್ಮಿಸುವಂತೆ ಒತ್ತಾಯ ಮಾಡಿದ್ದರು.

ಮಂಜುನಾಥ್ ಅವರು ರಾಷ್ಟ್ರೀಯ ಹೆದ್ದಾರಿ ಅಧಿಕಾರಿಗಳ ಜತೆ ಅಪಘಾತ ನಡೆಯುತ್ತಿದ್ದ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದರು. ಹೆದ್ದಾರಿ ಹಾದು ಹೋಗಿರುವ ಬೈಪಾಸ್ ಸರ್ಕಲ್‌ಗಳಲ್ಲಿ ಅಂಡರ್‌ಪಾಸ್ ಮಾಡುವಂತೆ ಸೂಚನೆ ನೀಡಿದ್ದರು.

ರಾಷ್ಟ್ರೀಯ ಹೆದ್ದಾರಿಯವರು ಅಂಡರ್‌ಪಾಸ್ ನಿರ್ಮಾಣ ಆಗುವವರೆಗೆ ತಾತ್ಕಾಲಿಕವಾಗಿ ರಸ್ತೆ ಉಬ್ಬ ಅಳವಡಿಸಲು ಮುಂದಾದರು. ತುಂಗಣಿ ಗೇಟ್ ಬಳಿ ಹೆದ್ದಾರಿಗೆ ಉಬ್ಬನ್ನು ನಿರ್ಮಿಸಿದರು. ಆದರೆ ಉಬ್ಬು ನಿರ್ಮಿಸಿರುವ ಬಗ್ಗೆ ನಾಮಫಲಕ, ದೀಪ ಅಳವಡಿಸದೆ ಇರುವುದು ಅಪಘಾತಕ್ಕೆ ಕಾರಣವಾಯಿತು.

ಬೆಂಗಳೂರು ಕಡೆಯಿಂದ ವೇಗವಾಗಿ ಬರುವ ವಾಹನಗಳಿಗೆ ರಸ್ತೆ ಉಬ್ಬು ಅಳವಡಿಸಿರುವುದು ದೂರದಿಂದ ಕಾಣಿಸದೆ ರಸ್ತೆ ಉಬ್ಬುಗಳನ್ನು ಹಾರಿಹೋಗಿ ಡಿವೈಡರ್‌ಗೆ ಡಿಕ್ಕಿ ಹೊಡೆಯುತ್ತಾರೆ. ಇಲ್ಲವೇ ಒಮ್ಮೆಲೇ ಬ್ರೇಕ್ ಹಾಕಲುಹೋಗಿ ನಿಯಂತ್ರಣ ತಪ್ಪಿ ಅಪಘಾತ ಸಂಭವಿಸುತ್ತಿದೆ. 

ಪ್ರತಿ ರಾತ್ರಿ ಒಂದಲ್ಲ ಒಂದು ವಾಹನಗಳು ರಸ್ತೆ ಉಬ್ಬಿನಿಂದ ಅಪಘಾತಕ್ಕೆ ಈಡಾಗಿ ಸಾವು ನೋವುಗಳು ಸಂಭವಿಸುತ್ತಿವೆ. ಕಾರು, ಬೈಕು ವಾಹನಗಳು ಜಖಂಗೊಳ್ಳುತ್ತಿವೆ. 

ಇಲ್ಲಿ ಅಪಘಾತ ಆಗದಂತೆ ತಡೆಗಟ್ಟಲು ಅಂಡರ್‌ಪಾಸ್ ಮಾಡಬೇಕು. ಅಲ್ಲಿಯವರೆಗೆ ರಸ್ತೆ ಉಬ್ಬು ಅಳವಡಿಸಿರುವ ಜಾಗದಲ್ಲಿ ಬೀದಿ ದೀಪ ಅಳವಡಿಸಬೇಕು. ರಸ್ತೆ ಉಬ್ಬು ಇರುವ ಬಗ್ಗೆ ಸೂಚನಾ ಫಲಕ ಅಳವಡಿಸಬೇಕು ಎಂಬುದು ತಾಲ್ಲೂಕಿನ ಜನರ ಒತ್ತಾಯವಾಗಿದೆ.