ಶಾಲೆ ಮುಚ್ಚುವುದು ಸಂವಿಧಾನ ವಿರೋಧಿ: ಸಿ. ಪುಟ್ಟಸ್ವಾಮಿ

ರಾಮನಗರ: ‘ಸರ್ಕಾರಿ ಶಾಲೆಗಳನ್ನು ಮುಚ್ಚಿ ಬಡವರ ಮಕ್ಕಳ ಶಿಕ್ಷಣದ ಹಕ್ಕು ಕಸಿದುಕೊಳ್ಳುವುದು ದೇಶದ್ರೋಹದ ಜೊತೆಗೆ ಸಂವಿಧಾನ ವಿರೋಧಿ ನಡೆ. ಸರ್ಕಾರ ಜಾರಿಗೆ ತಂದಿರುವ ಕೆಪಿಎಸ್ ಮ್ಯಾಗ್ನೆಟ್ ಯೋಜನೆ ಹಿಂದೆ ಸರ್ಕಾರಿ ಶಿಕ್ಷಣ ವ್ಯವಸ್ಥೆಗೆ ಬಲವಾದ ಪೆಟ್ಟು ಕೊಡುವ ಹುನ್ನಾರವಿದೆ’ ಎಂದು ಹಿರಿಯ ರೈತ ಮುಖಂಡ ಸಿ. ಪುಟ್ಟಸ್ವಾಮಿ ಆಕ್ರೋಶ ವ್ಯಕ್ತಪಡಿಸಿದರು.

ಕೆಪಿಎಸ್ ಮ್ಯಾಗ್ನೆಟ್ ಯೋಜನೆ ವಿರೋಧಿಸಿ ನಗರದ ಹಳೆ ಬಸ್ ನಿಲ್ದಾಣ ವೃತ್ತದಲ್ಲಿ ಅಖಿಲ ಭಾರತ ಪ್ರಜಾಸತ್ತಾತ್ಮಕ ವಿದ್ಯಾರ್ಥಿ ಸಂಘಟನೆ (ಎಐಡಿಎಸ್‌ಒ) ಭಾನುವಾರ ಹಮ್ಮಿಕೊಂಡಿದ್ದ ಜಿಲ್ಲಾ ಮಟ್ಟದ ‘ನಮ್ಮೂರ ಶಾಲೆ ಉಳಿಸಿ’ ಪ್ರತಿಭಟನಾ ಸಮಾವೇಶದಲ್ಲಿ ಮಾತನಾಡಿದ ಅವರು, ‘ಬಡವರ ಶಿಕ್ಷಣಕ್ಕೆ ಆಸರೆಯಾಗಿರುವ ಹಳ್ಳಿ ಶಾಲೆಗಳನ್ನು ಮುಚ್ಚುವುದು ಅವಿವೇಕದ ಜೊತೆಗೆ ಜನ ವಿರೋಧಿಯಾಗಿದೆ’ ಎಂದರು.

‘ಕೆಪಿಎಸ್ ಶಾಲೆಗಳ ಹೆಸರಿನಲ್ಲಿ ಹಳ್ಳಿಗಳಲ್ಲಿ ಶಾಲೆ ಮುಚ್ಚುವುದು ಎಷ್ಟು ಸರಿ? ಶಾಲೆ ಮುಚ್ಚಲು ಅಧಿಕಾರ ಕೊಟ್ಟವರು ಯಾರು? ಇಂತಹ ಕೆಲಸ ಮಾಡುವವರು ಎಂದಿಗೂ ಉದ್ಧಾರವಾಗುವುದಿಲ್ಲ. ಸರ್ಕಾರಿ ಶಾಲೆ ಉಳಿಸುವ ನಿಟ್ಟಿನಲ್ಲಿ ಎಐಡಿಎಸ್ಒ ಆರಂಭಿಸಿರುವ ಹೋರಾಟ ರಾಜ್ಯ ವ್ಯಾಪಿಯಾಗಬೇಕು’ ಎಂದರು.

‌‌‌ಎಸ್‌ಡಿಎಂಸಿ ಅಧ್ಯಕ್ಷ ಶಂಭುಗೌಡ ಮಾತನಾಡಿ, ‘ಸರ್ಕಾರಿ ಶಾಲೆಗಳು‌ ಈಗಾಗಲೇ ಶಿಕ್ಷಕರ ಕೊರತೆ ಹಾಗೂ ಮೂಲಸೌಕರ್ಯವಿಲ್ಲದೆ ಬಳಲುತ್ತಿವೆ. ಅಂತಹ ಶಾಲೆಗಳಿಗೆ ಜೀವ ತುಂಬುವ ಕೆಲಸ ಮಾಡದ ಸರ್ಕಾರ, ಹೊಸ ಯೋಜನೆ ಮೂಲಕ ಶಾಲೆಗಳನ್ನು ಮುಚ್ಚುವುದು ಎಷ್ಟು ಸರಿ? ಈ ನಿರ್ಧಾರದ ಹಿಂದೆ‌ ಶಿಕ್ಷಣ ವ್ಯವಸ್ಥೆಯನ್ನು ಖಾಸಗೀಕರಣಗೊಳಿಸುವ ಹುನ್ನಾರವಿದೆ’ ಎಂದು ಶಂಕೆ ವ್ಯಕ್ತಪಡಿಸಿದರು.

ಎಐಡಿಎಸ್‌ಒ ಬೆಂಗಳೂರು ಜಿಲ್ಲಾ ಕಾರ್ಯದರ್ಶಿ ಕಲ್ಯಾಣ್ ಕುಮಾರ್ ಬಿ. ಮಾತನಾಡಿ, ‘ಶಿಕ್ಷಣದ ಚಳವಳಿಗೆ ನೂರಾರು ವರ್ಷಗಳ ಇತಿಹಾಸವಿದೆ. ಹಲವು ಮಹನೀಯರ ಹೋರಾಟದ ಫಲವಾಗಿ ಹಳ್ಳಿ ಹಳ್ಳಿಗಳಲ್ಲಿ ಸರ್ಕಾರಿ ಶಾಲೆಗಳು ತಲೆ ಎತ್ತಿವೆ. ಅಂತಹ ಶಾಲೆಗಳನ್ನು ಮುಚ್ಚಿದರೆ ತಳಮಟ್ಟದ ಜನರಿಗೂ ಶಿಕ್ಷಣ ಸಿಗಬೇಕೆಂಬ ಆಶಯ‌ ಮಣ್ಣು ಪಾಲಾಗಲಿದೆ’ ಎಂದರು.

ಸಮಾವೇಶದ ಅಧ್ಯಕ್ಷತೆ ವಹಿಸಿದ್ದ ಎಐಡಿಎಸ್‌ಒ ಜಿಲ್ಲಾ ಕಾರ್ಯದರ್ಶಿ ನವಾಜ್, ‘ಮ್ಯಾಗ್ನೆಟ್ ಯೋಜನೆ ಹಿಂದೆ ಸರ್ಕಾರಿ ಶಾಲೆಗಳಲ್ಲಿ ಖಾಲಿ ಇರುವ 60 ಸಾವಿರಕ್ಕೂ ಹೆಚ್ಚು ಶಿಕ್ಷಕರ ಹುದ್ದೆಗಳನ್ನು ತುಂಬದೆ, ಆ ಶಾಲೆಗಳನ್ನು ಮುಚ್ಚಲು ಸರ್ಕಾರ ಮುಂದಾಗಿದೆ. ಶಾಲೆ ಉಳಿವಿಗಾಗಿ ಗ್ರಾಮಮಟ್ಟದಲ್ಲಿ ಸಮಿತಿ ರಚಿಸಿ ಹೋರಾಟ ರೂಪಿಸಲಾಗುವುದು. ಬೆಂಗಳೂರಿನಲ್ಲಿ ದೊಡ್ಡ ಸಮಾವೇಶ ಹಮ್ಮಿಕೊಳ್ಳಲಾಗುವುದು’ ಎಂದು ಹೇಳಿದರು.

ಸಮಿತಿ ರಚನೆ: ಜಿಲ್ಲೆಯಲ್ಲಿ ಸಾರ್ವಜನಿಕ ಶಿಕ್ಷಣ ಉಳಿಸಿ ಸಮಿತಿ ರಚಿಸಲಾಯಿತು. ಸಲಹೆಗಾರರಾಗಿ ಸಿ. ಪುಟ್ಟಸ್ವಾಮಿ ಮತ್ತು ಶಂಭುಗೌಡ ಅವರನ್ನು, ಅಧ್ಯಕ್ಷರಾಗಿ ಮಂಜಣ್ಣ, ಕಾರ್ಯದರ್ಶಿಯಾಗಿ ರೋಹಿತ್ ಎಂ.ಆರ್, 15 ಮಂದಿ ಉಪಾಧ್ಯಕ್ಷರು ಹಾಗೂ 80 ಮಂದಿಯನ್ನು ಸದಸ್ಯರನ್ನಾಗಿ ನೇಮಿಸಲಾಯಿತು.

ಎಐಡಿವೈಒ ಜಿಲ್ಲಾ ಸಂಚಾಲಕ ರೋಹಿತ್ ಎಂ.ಆರ್, ಮುಖಂಡರಾದ ವಿನಯ್ ಸಾರಥಿ, ಮಿಥುನ್ ಕುಮಾರ್, ಪ್ರಕೃತಿ, ಎಐಎಂಎಸ್‌ಎಸ್‌ ರಾಜ್ಯ ಮಹಿಳಾ ನಾಯಕಿ ಎ. ಶಾಂತ,  ಐಯುಟಿಯುಸಿ ರಮಾ ಟಿ.ಸಿ ಹಾಗೂ ಇತರರು ಇದ್ದರು.

ಸುತ್ತೋಲೆಗೆ ಬೆಂಕಿ ಹಚ್ಚಿ ಆಕ್ರೋಶ

ವೇದಿಕೆ ಕಾರ್ಯಕ್ರಮದ ನಡುವೆಯೇ ಗಣ್ಯರು ಕೆಪಿಎಸ್ ಮ್ಯಾಗ್ನೆಟ್ ಯೋಜನೆ ಕುರಿತ ಶಿಕ್ಷಣ ಇಲಾಖೆಯ ನಡಾವಳಿ ಪ್ರತಿಗಳಿಗೆ ಬೆಂಕಿ ಹಚ್ಚುವ ಮೂಲಕ ಯೋಜನೆ ವಿರುದ್ಧ ಆಕ್ರೋಶ ಹೊರಹಾಕಿದರು. ಸಿ. ಪುಟ್ಟಸ್ವಾಮಿ ಅವರ ನೇತೃತ್ವದಲ್ಲಿ ಇತರ ಗಣ್ಯರು ವಿದ್ಯಾರ್ಥಿಗಳು ಪೋಷಕರು ಹಾಗೂ ಎಐಡಿಎಸ್‌ಒ ಪದಾಧಿಕಾರಿಗಳು ಸಹ ನಡಾವಳಿ ಪ್ರತಿಯನ್ನು ಸುಟ್ಟರು. ಸರ್ಕಾರಿ ಶಾಲೆಗಳನ್ನು ಮುಚ್ಚುವುದಕ್ಕೆ ಯಾವುದೇ ಕಾರಣಕ್ಕು ಬಿಡುವುದಿಲ್ಲ ಎಂದು ಘೋಷಣೆಗಳನ್ನು ಕೂಗಿದರು.

ನಮ್ಮೂರು ಶಾಲೆ ಮುಚ್ಚಲು ಇವರ‍್ಯಾರು?

‘ಮಳೆಗೆ ನಮ್ಮೂರ ಶಾಲೆ ಗೋಡೆ ಕುಸಿದಾಗ ದೇವಸ್ಥಾನದಲ್ಲಿ ತರಗತಿ ಆರಂಭಿಸಲು ಹಳ್ಳಿಯವರು ವ್ಯವಸ್ಥೆ ಮಾಡಿದೆವು. ಆಗ ಶಿಕ್ಷಣ ಇಲಾಖೆ ಅಧಿಕಾರಿಗಳು ನಮ್ಮೂರಿನತ್ತ ಸುಳಿಯಲಿಲ್ಲ. ಶಾಲೆ ಮತ್ತು ಮಕ್ಕಳ ಸ್ಥಿತಿಗತಿ ವಿಚಾರಿಸಲಿಲ್ಲ. ಕೆಪಿಎಸ್ ಮ್ಯಾಗ್ನೆಟ್ ಯೋಜನೆಯಡಿ ಶಾಲೆ ಮುಚ್ಚಿಸುವುದಕ್ಕೆ ಇಲಾಖೆಯ ಉಪ ನಿರ್ದೇಶಕರೇ ಊರಿಗೆ ಬಂದರು. ನಿಮ್ಮೂರ ಶಾಲೆ ಮುಚ್ಚುತ್ತಿದ್ದೇವೆ. ಪಕ್ಕದ ಹೊಂಗೂರಿನಲ್ಲಿರುವ ಸುಸಜ್ಜಿತ ಶಾಲೆಗೆ ನಿಮ್ಮ ಮಕ್ಕಳನ್ನು ಕಳಿಸಿ ಎಂದರು. ಅದಕ್ಕೆ ನಾವು ಶಾಲೆ ಮುಚ್ಚಲು ನೀವ್ಯಾರು? ಇಲ್ಲೇನು ಮಕ್ಕಳಿಲ್ಲವೆ? ಶಾಲೆ ಬಗ್ಗೆ ಪೋಷಕರು ದೂರು ಕೊಟ್ಟಿದ್ದಾರೆಯೇ? ಎಂದು ಪ್ರಶ್ನಿಸಿದಾಗ ಮುಖ ಸಿಂಡರಿಸಿಕೊಂಡು ಹೋದರು.

1954ರಲ್ಲಿ ನಮ್ಮ ಹಿರಿಯರ ಶ್ರಮದಿಂದ ಶುರುವಾದ ಶಾಲೆ ಸಾವಿರಾರು ಜನರಿಗೆ ವಿದ್ಯೆ ನೀಡಿದೆ. ಸುಮಾರು 70 ಮಕ್ಕಳಿರುವ ಸುಸಜ್ಜಿತವಾದ ನಮ್ಮೂರ ಶಾಲೆ ಮುಚ್ಚಲು ಬಿಡುವುದಿಲ್ಲ’ ಎಂದು ಸಂತೆಮೊಗೇ‌ನಹಳ್ಳಿಯ ಮಂಜಣ್ಣ ಬೇಸರ ವ್ಯಕ್ತಪಡಿಸಿದರು.