ತುಮಕೂರು | ಟೊಮೆಟೊ ಕೆ.ಜಿ ₹60ಕ್ಕೆ ಏರಿಕೆ; ಸೇಬು ಕೆ.ಜಿ ₹100ಕ್ಕೆ ಇಳಿಕೆ

ತುಮಕೂರು:‌‌ ತರಕಾರಿ ಬೆಲೆ ಇಳಿಕೆಯತ್ತ ಮುಖ ಮಾಡಿದ್ದರೆ, ಟೊಮೆಟೊ ಗಗನಮುಖಿಯಾಗಿದೆ. ಸೇಬು ಹಣ್ಣು ಸಾಕಷ್ಟು ಅಗ್ಗವಾಗಿದ್ದರೆ, ಕೋಳಿ ಮೊಟ್ಟೆ ದುಬಾರಿಯಾಗಿದೆ. ಸೊಪ್ಪು ಸ್ವಲ್ಪ ಮಟ್ಟಿಗೆ ತಗ್ಗಿದ್ದು, ಬೇಳೆಕಾಳು, ಧಾನ್ಯಗಳು ತುಸು ಇಳಿಕೆಯಾಗಿವೆ.

ಒಂದು ವರ್ಷದಿಂದಲೂ ಚೇತರಿಕೆ ಕಾಣದ ಟೊಮೆಟೊ ಬೆಲೆ ಈಗ ಒಮ್ಮೆಲೆ ದುಪ್ಪಟ್ಟಾಗಿದ್ದು, ಅಂತರಸನಹಳ್ಳಿ ಮಾರುಕಟ್ಟೆಯಲ್ಲಿ ಕೆ.ಜಿ ₹50–60ಕ್ಕೆ ಜಿಗಿದಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿ ₹60–80ರ ವರೆಗೆ ಮಾರಾಟವಾಗುತ್ತಿದೆ. ಟೊಮೆಟೊ ದರ ಚೇತರಿಸುವುದೇ ಇಲ್ಲ ಎನ್ನುವ ಸಮಯದಲ್ಲಿ ಉತ್ತಮ ಸ್ಥಿತಿ ಕಂಡುಕೊಂಡಿದೆ. ಬೆಲೆ ಕುಸಿತದಿಂದ ಬೆಳೆ ಬೆಳೆಯುವುದು ಕಡಿಮೆಯಾಗಿದ್ದು, ಮಾರುಕಟ್ಟೆಯಲ್ಲಿ ಆವಕದ ಕುಸಿತದಿಂದ ಬೆಲೆ ಏರಿಕೆಯಾಗಿದೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ದುಬಾರಿ ಆಗಬಹುದು ಎಂದು ಹೇಳಲಾಗುತ್ತಿದೆ.

ತರಕಾರಿ ಧಾರಣೆಯೂ ಇಳಿಕೆಯತ್ತ ಮುಖ ಮಾಡಿದೆ. ಬೀನ್ಸ್, ಕ್ಯಾರೇಟ್, ಬೀಟ್ರೂಟ್, ಬೆಂಡೆಕಾಯಿ, ಬದನೆಕಾಯಿ, ಈರುಳ್ಳಿ, ಶುಂಠಿ ಬೆಲೆ ತಗ್ಗಿದೆ. ಉಳಿದಂತೆ ಇತರ ತರಕಾರಿಗಳ ದರ ಯಥಾಸ್ಥಿತಿಯಲ್ಲಿ ಮುಂದುವರಿದಿದೆ.

ಕೊತ್ತಂಬರಿ ಸೊಪ್ಪು ಇಳಿಕೆ: ದುಬಾರಿಯಾಗಿದ್ದ ಕೊತ್ತಂಬರಿ ಸೊಪ್ಪಿದ ಬೆಲೆ ಹಿಂದಿನ ವಾರಕ್ಕೆ ಹೋಲಿಸಿದರೆ ಅರ್ಧದಷ್ಟು ಕುಸಿತವಾಗಿದೆ. ಕೊತ್ತಂಬರಿ ಸೊಪ್ಪು ಕೆ.ಜಿ ₹30–40ಕ್ಕೆ, ಸಬ್ಬಕ್ಕಿ ಕೆ.ಜಿ ₹50–60, ಮೆಂತ್ಯ ಸೊಪ್ಪು ಕೆ.ಜಿ ₹40–50, ಪಾಲಕ್ ಸೊಪ್ಪು (ಕಟ್ಟು) ₹50ಕ್ಕೆ ಏರಿಕೆಯಾಗಿದೆ.

ಸೇಬು ಅಗ್ಗ: ಹಣ್ಣುಗಳ ದರ ಇಳಿಕೆಯತ್ತ ಮುಖಮಾಡಿದ್ದು, ಸೇಬು ಕೆ.ಜಿ ₹100ಕ್ಕೆ ಇಳಿಕೆಯಾಗಿದೆ. ಏಲಕ್ಕಿ, ಪಚ್ಚಬಾಳೆ ಅಗ್ಗವಾಗಿದ್ದರೆ, ಪಪ್ಪಾಯ ಕೆ.ಜಿ ₹15ಕ್ಕೆ ಕುಸಿದಿದೆ. ಮೂಸಂಬಿ, ಕಿತ್ತಳೆ, ಕರಬೂಜ, ದ್ರಾಕ್ಷಿ ಬೆಲೆ ತಗ್ಗಿದೆ. ಕಳೆದ ಹಲವು ತಿಂಗಳುಗಳ ನಂತರ ಹಣ್ಣು ದರ ತಗ್ಗಿದೆ.

ಅಡುಗೆ ಎಣ್ಣೆ: ಗೋಲ್ಡ್‌ವಿನ್ನರ್ ತುಸು ಏರಿಕೆಯಾಗಿದ್ದರೆ, ಕಡಲೆಕಾಯಿ ಎಣ್ಣೆ ಕೊಂಚ ಕಡಿಮೆಯಾಗಿದೆ. ಗೋಲ್ಡ್‌ವಿನ್ನರ್ ಕೆ.ಜಿ ₹152–153, ಪಾಮಾಯಿಲ್ ಕೆ.ಜಿ ₹118–120, ಕಡಲೆಕಾಯಿ ಎಣ್ಣೆ ಕೆ.ಜಿ ₹160–165ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಸಿಗುತ್ತಿದೆ.

ಉದ್ದಿನ ಬೇಳೆ ಏರಿಕೆ: ಬೇಳೆ, ಧಾನ್ಯಗಳ ಧಾರಣೆ ತುಸು ಅಗ್ಗವಾಗಿದೆ. ಕಡಲೆಬೇಳೆ, ಹೆಸರುಬೇಳೆ, ಕಡಲೆಕಾಳು, ಹೆಸರುಕಾಳು, ಅಲಸಂದೆ ಕಡಿಮೆಯಾಗಿದೆ. ಉದ್ದಿನ ಬೇಳೆ ಒಮ್ಮೆಲೆ ಕೆ.ಜಿಗೆ ₹8–15ರ ವರೆಗೆ ಏರಿಕೆ ದಾಖಲಿಸಿದೆ. ಹುರುಳಿಕಾಳು, ಬೆಲ್ಲ ಸಹ ಹೆಚ್ಚಳವಾಗಿದೆ.

ಮಸಾಲೆ ಪದಾರ್ಥ: ಜೀರಿಗೆ, ಚಕ್ಕೆ, ಲವಂಗ, ಗಸಗಸೆ, ಮೆಣಸಿನಕಾಯಿ ಬೆಲೆ ತುಸು ತೇಜಿಯಾಗಿದೆ. ಒಣಹಣ್ಣು ಕೊಂಚ ಕಡಿಮೆಯಾಗಿದೆ.

ಧನ್ಯ ಕೆ.ಜಿ ₹110–125, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿ ₹250–260, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿ ₹190–200, ಬೆಲ್ಲ ಕೆ.ಜಿ ₹50–55, ಕಾಳುಮೆಣಸು ಕೆ.ಜಿ ₹740–750, ಜೀರಿಗೆ ಕೆ.ಜಿ ₹250–260, ಚಕ್ಕೆ ಕೆ.ಜಿ ₹250–260, ಲವಂಗ ಕೆ.ಜಿ ₹800–840, ಗುಣಮಟ್ಟದ ಗಸಗಸೆ ಕೆ.ಜಿ ₹1,550–1,650, ಏಲಕ್ಕಿ ಕೆ.ಜಿ ₹3,000–3,200, ಬಾದಾಮಿ ಕೆ.ಜಿ ₹780–800, ಗೋಡಂಬಿ ಕೆ.ಜಿ ₹800–920, ಒಣದ್ರಾಕ್ಷಿ ಕೆ.ಜಿ ₹420–450ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಮೊಟ್ಟೆ ದುಬಾರಿ: ಕಾರ್ತಿಕ ಮಾಸ ಮುಗಿಯುತ್ತಿದ್ದಂತೆ ಕೋಳಿ ಮಾಂಸ, ಮೊಟ್ಟೆ ದುಬಾರಿಯಾಗಿದೆ. ಬ್ರಾಯ್ಲರ್ ಕೋಳಿ ಕೆ.ಜಿ ₹160, ರೆಡಿ ಚಿಕನ್ ಕೆ.ಜಿ ₹255, ಸ್ಕಿನ್‌ಲೆಸ್ ಕೆ.ಜಿ ₹280, ಫಾರಂ ಕೋಳಿ ಕೆ.ಜಿ ₹180ಕ್ಕೆ ಏರಿಕೆಯಾಗಿದೆ. ಮೊಟ್ಟೆ ಮತ್ತಷ್ಟು ದುಬಾರಿಯಾಗಿದ್ದು, ಒಂದು ₹6.80ಕ್ಕೆ ಜಿಗಿದಿದೆ. ಚಿಲ್ಲರೆ ಅಂಗಡಿಗಳಲ್ಲಿ ₹8ರ ವರೆಗೂ ಮಾರಾಟ ಮಾಡಲಾಗುತ್ತಿದೆ.

ಮೀನು: ಮೀನು ದರದಲ್ಲಿ ಅಲ್ಪ ಮಟ್ಟಿಗೆ ಏರಿಳಿತ ಕಂಡು ಬಂದಿದೆ. ಬಂಗುಡೆ ಕೆ.ಜಿ ₹210, ಬೂತಾಯಿ ಕೆ.ಜಿ ₹340, ಬೊಳಿಂಜರ್ ಕೆ.ಜಿ ₹220, ಅಂಜಲ್ ಕೆ.ಜಿ ₹550, ಬಿಳಿಮಾಂಜಿ ಕೆ.ಜಿ 1,150, ಕಪ್ಪುಮಾಂಜಿ ₹720, ಇಂಡಿಯನ್ ಸಾಲ್ಮನ್ ₹810, ಸೀಗಡಿ ಕೆ.ಜಿ ₹500–720ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.