ಕಾರವಾರ: ಅಧ್ವಾನದ ಸ್ಥಿತಿಯಲ್ಲಿ ಮಕ್ಕಳ ಉದ್ಯಾನ

ಕಾರವಾರ: ಶಾಲೆಗೆ ರಜೆ ಆರಂಭಗೊಂಡಿದ್ದರಿಂದ ಆಡಿ ನಲಿಯಲು ಇಲ್ಲಿನ ಟ್ಯಾಗೋರ್ ಕಡಲತೀರದ ಮಕ್ಕಳ ಉದ್ಯಾನಕ್ಕೆ ಬಂದ ಬಾಲಕಿಯೊಬ್ಬಳು ಉದ್ಯಾನದ ದುಸ್ಥಿತಿಗೆ ಮರುಗಿ, ಸಾಮಾಜಿಕ ಮಾಧ್ಯಮಗಳ ಮೂಲಕ ಜಿಲ್ಲಾಧಿಕಾರಿ ಗಮನಸೆಳೆದಿದ್ದಳು.

ಇದು ಕೇವಲ ಒಂದು ಉದ್ಯಾನದ ವ್ಯಥೆಯಲ್ಲ. ಜಿಲ್ಲೆಯ ಬಹುತೇಕ ನಗರ, ಪಟ್ಟಣಗಳ ಉದ್ಯಾನದ ಸ್ಥಿತಿ ಇದಕ್ಕಿಂತ ಭಿನ್ನವಾಗಿಲ್ಲ. ಅನುದಾನದ ಅಲಭ್ಯತೆಯ ನೆಪವೊಡ್ಡಿ ಉದ್ಯಾನಗಳ ನಿರ್ವಹಣೆಯತ್ತ ಸ್ಥಳೀಯ ಸಂಸ್ಥೆಗಳು ಗಮನಹರಿಸುತ್ತಿಲ್ಲ ಎಂಬ ಆರೋಪವಿದೆ.

ಪ್ರವಾಸಿಗರು ಹೆಚ್ಚು ಭೇಟಿ ನೀಡುವ ಸ್ಥಳಗಳಲ್ಲಿರುವ ಉದ್ಯಾನಗಳನ್ನೂ ಸುಸ್ಥಿತಿಯಲ್ಲಿ ಇಡಲಾಗದ ಸ್ಥಿತಿ ಉಂಟಾಗಿದೆ ಎಂಬುದಕ್ಕೆ ಟ್ಯಾಗೋರ್ ಕಡಲತೀರದ ಉದ್ಯಾನದ ದುಃಸ್ಥಿತಿ ಸಾರುತ್ತಿದೆ. ಆಡಿ ನಲಿಯಲು ಬರುವ ಮಕ್ಕಳು ಒಡೆದ ಜಾರಿಬಂಡೆ, ಮುರಿದ ಜೋಕಾಲಿ ಕಂಡು ಮರಗುತ್ತಿದ್ದಾರೆ. ಬೇಸಿಗೆ ರಜೆ ಆರಂಭಗೊಳ್ಳುತ್ತಿದ್ದು, ಸಂಜೆ ಆಟವಾಡಲು ಬರುವ ಮಕ್ಕಳ ಸಂಖ್ಯೆ ಹೆಚ್ಚಲಿದೆ. ಆದರೆ, ಈವರೆಗೆ ಉದ್ಯಾನದ ನಿರ್ವಹಣೆಗೆ ಅಧಿಕಾರಿಗಳು ಗಮನಹರಿಸುತ್ತಿಲ್ಲ ಎಂಬುದು ಜನರ ದೂರು.

ಶಿರಸಿ ನಗರದ ಮಕ್ಕಳ ಉದ್ಯಾನ ರಸ್ತೆ ವಿಸ್ತರಣೆ ಕಾಮಗಾರಿ ಕಾರಣಕ್ಕೆ ಮಂಕಾಗಿದೆ. ಜೂ ಸರ್ಕಲ್ ಬಳಿ, ಅರಣ್ಯ ಇಲಾಖೆ ಕಚೇರಿ ಮುಂಭಾಗದಲ್ಲಿ ಅಂದಾಜು ಎರಡೂವರೆ ಎಕರೆ ವಿಸ್ತೀರ್ಣದಲ್ಲಿ ಮಕ್ಕಳ ಗಮನ ಸೆಳೆಯುವ ವಿವಿಧ ಆಟಿಕೆಗಳು, ವಾಯುವಿಹಾರಿಗಳಿಗೆ ಅನುಕೂಲಕರ ವಾಕಿಂಗ್ ಪಾಥ್, ಆಸನ ವ್ಯವಸ್ಥೆ ಇದ್ದವು. ರಸ್ತೆ ವಿಸ್ತರಣೆ ಕಾಮಗಾರಿಗೆ ಉದ್ಯಾನದ ಒಂದು ಪಾರ್ಶ್ವ ತೆರವುಗೊಂಡಿದೆ. ಗೋಡೆ ನಿರ್ಮಿಸಿದರೂ ಒಳಾವರಣದ ಕಾಮಗಾರಿಗಳು ಹಾಗೆಯೇ ಉಳಿದಿದೆ. ಹೀಗಾಗಿ ಇಡೀ ಉದ್ಯಾನ ಕಳೆಗುಂದಿದ್ದು, ಸಾರ್ವಜನಿಕರ ಭೇಟಿ ಕಡಿಮೆಯಾಗಿದೆ.

ಕುಮಟಾ ಪಟ್ಟಣದ ಹೆಗಡೆ ವೃತ್ತದ ಬಳಿ ಇರುವ ಪುರಸಭೆ ಮಾಲೀಕತ್ವದ ಕಿತ್ತೊರು ಚನ್ನಮ್ಮ ಉದ್ಯಾನದಲ್ಲಿ ಮಕ್ಕಳ ಆಟಿಕೆಗಳು ಹಾಳಾಗಿರುವ ದೂರುಗಳಿವೆ.

‘ಮಕ್ಕಳು ಆಟವಾಡುವ ಜಾರು ಬಂಡೆಯ ಸಣ್ಣಪುಟ್ಟ ದುರಸ್ತಿ ಆಗಬೇಕಿದೆ. ಗಿಡಗಳಿಗೆ ನೀರು ಹಾಕುವ ಪೈಪ್‍ಲೈನ್ ದುರಸ್ತಿ ಆದರೆ ಉದ್ಯಾನ ಆಕರ್ಷಣೀಯವಾಗುತ್ತದೆ’ ಎನ್ನುತ್ತಾರೆ ಪುರಸಭೆ ಉಪಾಧ್ಯಕ್ಷ ಮಹೇಶ ನಾಯ್ಕ.

ದಾಂಡೇಲಿಯ ಸಾಯಿನಗರ, ಬಸವೇಶ್ವರ ನಗರ ಸೇರಿದಂತೆ 11 ಉದ್ಯಾನಗಳಿವೆ. ಬಹುತೇಕ ಉದ್ಯಾನಗಳು ನಿರ್ವಹಣೆ ಇಲ್ಲದೆ ಹಾಳಾಗಿವೆ. ಕೆಲವು ಕಡೆಗಳಲ್ಲಿ ಆವರಣ ಗೋಡೆಯೂ ಇಲ್ಲದೆ ಗಿಡ ಮರ, ಹುಲ್ಲು ಹಾಸುಗಳ ಕಿತ್ತು ಹಾಳಾಗಿವೆ ಎನ್ನುವುದು ಸ್ಥಳೀಯರ ದೂರು.

ಉದ್ಯಾನ ನಿರ್ವಹಣೆಗೆ ಪ್ರತ್ಯೇಕ ಸಿಬ್ಬಂದಿ ನೇಮಿಸಲು ಅವಕಾಶವಿಲ್ಲ. ಪೌರಕಾರ್ಮಿಕರ ಕೊರತೆಯೂ ನಿರ್ವಹಣೆಗೆ ಸಮಸ್ಯೆಯಾಗಿದೆ. 4ನೇ ಹಂತದ ನಗರೋತ್ಥಾನ ಯೋಜನೆಯಲ್ಲಿ ಉದ್ಯಾನ ಅಭಿವೃದ್ಧಿಗೆ ಅನುದಾನಕ್ಕೆ ಬೇಡಿಕೆ ಇಡಲಾಗಿದೆ ಎಂದು ನಗರಸಭೆ ಅಧಿಕಾರಿಗಳು ತಿಳಿಸಿದ್ದಾರೆ.

‘ಸಾಯಿ ನಗರದ ಉದ್ಯಾನನ ಓಪನ್ ಜಿಮ್ ಪರಿಕರಗಳನ್ನು ಕಳವು ಮಾಡಲಾಗಿದೆ. ಹಲವು ವರ್ಷಗಳಿಂದ ಹಾಳಾಗಿದ್ದ ಬಾಂಬೆ ಚಾಳದ ಉದ್ಯಾನವನ್ನು ವಾರ್ಡ್ ಅಭಿವೃದ್ಧಿ ನಿಧಿ ಬಳಸಿ ಅಭಿವೃದ್ಧಿಪಡಿಸಲಾಗಿದೆ’ ಎನ್ನುತ್ತಾರೆ ನಗರಸಭೆ ಸದಸ್ಯ ದಶರಥ ಬಂಡಿವಡ್ಡರ.

ಸಿದ್ದಾಪುರ ಪಟ್ಟಣದ ಶಂಕರ ಮಠದ ಸಮೀಪದ ಉದ್ಯಾನವನ್ನು ಅರಣ್ಯ ಇಲಾಖೆ ನಿರ್ವಹಿಸುತ್ತಿದೆ. ಉದ್ಯಾನಕ್ಕೆ ನೀರಿನ ಕೊರತೆ ಎದುರಾಗಿಲ್ಲ. ಮಕ್ಕಳ ಆಟಿಕೆಗಳನ್ನೂ ಅಳವಡಿಸಿದ್ದು, ಹೆಚ್ಚು ಜನರು ಬರುತ್ತಿದ್ದಾರೆ ಎಂದು ಆರ್‌ಎಫ್‌ಒ ಅಜಯ್ ಕುಮಾರ ಹೇಳಿದರು.

ಹಳಿಯಾಳ ಪಟ್ಟಣದ ಮರಡಿಗುಡ್ಡ ನಿಸರ್ಗಧಾಮದಲ್ಲಿ ನೀರಿನ ಕೊರತೆಯಿಂದ ಗಿಡಮರಗಳು ಒಣಗಿವೆ. ಉದ್ಯಾನದಲ್ಲಿರುವ ನೀರಿನ ಗುಂಡಿಯಲ್ಲಿ ನೀರು ಸಂಪೂರ್ಣ ಬತ್ತಿದೆ. ಇಲ್ಲಿ ಹಾಳಾಗಿದ್ದ ಆಟಿಕೆ ಸಾಮಗ್ರಿಗಳನ್ನು ಬದಲಿಸಿ, ಹೊಸ ಸಾಮಗ್ರಿ ಅಳವಡಿಸಲಾಗಿದೆ. ಲಕ್ಷಾಂತರ ರೂಪಾಯಿ ವೆಚ್ಚದಿಂದ ನಿರ್ಮಿಸಿದ್ದ ಕಾರಂಜಿ ಮತ್ತು ಅದರ ಬಳಿಯ ಪ್ರತಿಮೆಗಳು ಹಾಳಾಗಿವೆ. ಉದ್ಯಾನದಲ್ಲಿರುವ ಕಬ್ಬಿಣದ ವೀಕ್ಷಣಾ ಗೋಪುರಕ್ಕೂ ತುಕ್ಕು ಹಿಡಿದಿದೆ.

‘ಪಟ್ಟಣದಲ್ಲಿ ಬಡಾವಣೆ ನಿರ್ಮಿಸುವವರು ನಿಯಮದ ಪ್ರಕಾರ ಉದ್ಯಾನ ನಿರ್ಮಾಣಕ್ಕೆ ಜಾಗ ಮೀಸಲಿಡಬೇಕು. ಪಟ್ಟಣದಲ್ಲಿ ಉದ್ಯಾನಕ್ಕೆ ಮೀಸಲಿಟ್ಟ ಜಾಗದಲ್ಲಿ ಈವರೆಗೆ ಯಾವೊಂದೂ ಉದ್ಯಾನ ನಿರ್ಮಾಣ ಆಗಿಲ್ಲ’ ಎಂಬುದು ಹಿರಿಯ ನಾಗರಿಕರ ದೂರು.

ಯಲ್ಲಾಪುರ ಪಟ್ಟಣದ ಐಬಿ ರಸ್ತೆಯಲ್ಲಿರುವ ಜೋಡುಕೆರೆ ಮಕ್ಕಳ ಉದ್ಯಾನ ನಿರ್ವಹಣೆ ಇಲ್ಲದೆ ಪಾಳು ಬಿದ್ದಿದೆ. ಅರಣ್ಯ ಇಲಾಖೆಯ ಉದ್ಯಾನ ಬಹಳಷ್ಟು ಸಲ ಮುಚ್ಚಿರುತ್ತದೆ. ಅದು ಉಪಯೋಗಕ್ಕೆ ಲಭ್ಯವಿರುವುದೇ ಅಪರೂಪ ಎಂಬುದು ಜನರ ಆರೋಪ.

ಪೂರಕ ಮಾಹಿತಿ: ರಾಜೇಂದ್ರ ಹೆಗಡೆ, ಎಂ.ಜಿ.ನಾಯ್ಕ, ಸಂತೋಷಕುಮಾರ ಹಬ್ಬು, ಶಾಂತೇಶ ಬೆನಕನಕೊಪ್ಪ, ಎಂ.ಜಿ.ಹೆಗಡೆ, ಸುಜಯ್ ಭಟ್, ಪ್ರವೀಣಕುಮಾರ ಸುಲಾಖೆ, ವಿಶ್ವೇಶ್ವರ ಗಾಂವ್ಕರ.