ಶಿರಸಿ | ಬಳಕೆಗೆ ಬಾರದ ಬಾವಿ: ಆತಂಕ

ಶಿರಸಿ: ನೀರಿನ ಕೊರತೆ ನಡುವೆಯೇ ಇಲ್ಲಿನ ಪ್ರಗತಿ ನಗರದಲ್ಲಿ 30ಕ್ಕೂ ಹೆಚ್ಚು ತೆರೆದ ಬಾವಿಗಳ ನೀರು ದುರ್ನಾತ ಬೀರುತ್ತಿದ್ದು, ಬಳಕೆಗೆ ಬಾರದಂತಾಗಿದೆ. 

ಪ್ರಗತಿ ನಗರ ವ್ಯಾಪ್ತಿಯ 8, 9, 10 ಹಾಗೂ 11ನೇ ಅಡ್ಡ ರಸ್ತೆಯ ನಿವಾಸಿಗಳಿಗೆ ಸೇರಿದ ಬಾವಿಗಳ ನೀರು ಹಾಳಾಗಿದೆ. ಬೇಸಿಗೆ ಕಳೆಯುವಷ್ಟು ನೀರಿದ್ದರೂ ಬಳಸಲು ಬಾರದಂತಾಗಿರುವುದು ನಿವಾಸಿಗಳಲ್ಲಿ ಬೇಸರ ಮೂಡಿಸಿದೆ. ಇದೇ ಕಾರಣಕ್ಕೆ ಕುಡಿಯುವ ನೀರಿಗೆ ನಗರಸಭೆ ವಿತರಿಸುವ ನೀರನ್ನು ಆಶ್ರಯಿಸುವಂತಾಗಿದೆ. 

'ಪ್ರಗತಿನಗರ ವ್ಯಾಪ್ತಿಯಲ್ಲಿ ನಗರಸಭೆಯ ವತಿಯಿಂದ ನಿರ್ಮಿಸುವ ಚರಂಡಿಗಳ ಕೊರತೆಯಿದೆ. ಬಹುತೇಕ ಮನೆ ಮಾಲೀಕರು ತಮ್ಮ ಮನೆಗಳೆದುರು ಸ್ವಂತ ಖರ್ಚಿನಲ್ಲಿ ಕಾಂಕ್ರಿಟ್ ಕಾಲುವೆ ನಿರ್ಮಿಸಿಕೊಂಡಿದ್ದಾರೆ. ಖಾಲಿ ನಿವೇಶನಗಳಿರುವೆಡೆ ಚರಂಡಿ ವ್ಯವಸ್ಥೆಯೇ ಇಲ್ಲ. ಹೀಗಾಗಿ ಚರಂಡಿ ನೀರು ಸಾಗಲು ಸಮರ್ಪಕ ವ್ಯವಸ್ಥೆ ಇಲ್ಲದಂತಾಗಿದೆ. ಚರಂಡಿ ನಿರ್ಮಿಸುವಂತೆ ಸಾಕಷ್ಟು ಬಾರಿ ನಗರಸಭೆ ಗಮನ ಸೆಳೆದರೂ ಪ್ರಯೋಜನವಾಗಿಲ್ಲ. ಹೀಗಾಗಿ ಕಾಲುವೆಯ ತ್ಯಾಜ್ಯ ನೀರು ಭೂಮಿಗೆ ಇಂಗಿ ಬಾವಿಗಳ ನೀರು ಹಾಳಾಗಿರುವ ಸಾಧ್ಯತೆಯಿದೆ' ಎಂಬುದು ಇಲ್ಲಿನ ನಿವಾಸಿಗಳ ಅಭಿಪ್ರಾಯವಾಗಿದೆ.