ಹೂವಿನಹಡಗಲಿ: ದಾಖಲೆ ರಹಿತ ₹12.17 ಲಕ್ಷ ವಶ

ಹೂವಿನಹಡಗಲಿ: ಸಮೀಪದ ಎಸ್.ಆರ್.ಎಂ.ಪಿ.ಪಿ. ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಬಳಿ ದಾಖಲೆ ರಹಿತ ₹12.17 ಲಕ್ಷವನ್ನು ಪೊಲೀಸರು ಸೋಮವಾರ ವಶಪಡಿಸಿಕೊಂಡಿದ್ದಾರೆ.

‘ಹೂವಿನಹಡಗಲಿಯ ವರ್ತಕ ಜೇತುಸಿಂಗ್ (ನಾತುಸಿಂಗ್) ಎಂಬುವವರ ಕಾರು ತಪಾಸಣೆ ನಡೆಸಿದಾಗ ₹12,17,500 ನಗದು, ₹14,965 ಮೌಲ್ಯದ 50.6 ಲೀ ಮದ್ಯ, ₹2.50 ಲಕ್ಷ ಮೌಲ್ಯದ ಚಿನ್ನಾಭರಣ ಸಿಕ್ಕಿದೆ’ ಎಂದು ಸಹಾಯಕ ಚುನಾವಣಾಧಿಕಾರಿ ರಮೇಶಕುಮಾರ್ ತಿಳಿಸಿದ್ದಾರೆ.

ಹಡಗಲಿಯಿಂದ ಹರಪನಹಳ್ಳಿ ಕಡೆ ಹೊರಟಿದ್ದ ಕಾರು, ಪೊಲೀಸ್ ವಾಹನ ಕಂಡು ವೇಗ ಹೆಚ್ಚಿಸಿದ್ದರಿಂದ ಪೊಲೀಸರು ಅನುಮಾನಗೊಂಡು ಅಡ್ಡಗಟ್ಟಿ ತಪಾಸಣೆ ನಡೆಸಿದ್ದಾರೆ. ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.