ನಾಲತವಾಡ: ಕುತೂಹಲ ಕೆರಳಿಸಿದ ಟ್ರಾಕ್ಟರ್ ರೇಸ್

ನಾಲತವಾಡ: ಪಟ್ಟಣದಲ್ಲಿ ಜೋಡಿ ದ್ಯಾಮವ್ವ ಜಾತ್ರೆ ಅಂಗವಾಗಿ ಶುಕ್ರವಾರ ಸಂಜೆ ಬಜಾರ್‌ನಲ್ಲಿ ಟ್ರ್ಯಾಕ್ಟರ್ ಡೆಡ್ಲಿ ರೇಸ್ ಸ್ಪರ್ಧೆ ಆಯೋಜಿಸಲಾಗಿತ್ತು.

ಶನಿವಾರ ಬೆಳಗಿನ ಜಾವ 2 ಗಂಟೆವರೆಗೆ ನಡೆದ ರೇಸ್‌ನಲ್ಲಿ, ಎರಡು ಟ್ರ್ಯಾಕ್ಟರ್​ಗಳನ್ನು ಹಿಂಬದಿ ಜೋಡಿಸಿ, ಇಂಜಿನ್ ಮೇಲಕ್ಕೇರಿಸುವ, ಹಿಂದಿನ ಚಕ್ರ ಕಾರ್ಬನ್ ದೂಳು ಎಬ್ಬಿಸುವ ಹಗ್ಗಜಗ್ಗಾಟದಂತೆ ಪರಸ್ಪರ ಹಿಂಬದಿಯಲ್ಲಿ ಬಂಧಿಸಲ್ಪಟ್ಟ ಎರಡು ಪರಸ್ಪರ ವಿರುದ್ಧ ದಿಕ್ಕಿನಲ್ಲಿ ಟ್ರ್ಯಾಕ್ಟರ್ ಓಡಿಸುವ ಸ್ಪರ್ಧೆ ರೋಚಕವಾಗಿತ್ತು. ಟ್ರ್ಯಾಕ್ಟರ್​ನ ಮುಂದಿನ ಗಾಲಿಗಳು ಮೇಲಕ್ಕೆ ಎದ್ದಿದ್ದರೂ ಚಾಲಕರು ​ಚಲಾಯಿಸುತ್ತಾ ಸಾಹಸ ತೋರಿದರು.

ಪಟ್ಟಣ ಸೇರಿದಂತೆ ಹೋಬಳಿಯಲ್ಲಿ ಇದೇ ಮೊದಲ ಬಾರಿಗೆ ಈ ತರಹದ ರೇಸ್ ಆಯೋಜಿಲಾಗಿದ್ದು, ರಾಯಚೂರು, ಬಾಗಲಕೋಟೆ, ವಿಜಯಪುರ, ಯಾದಗಿರಿ ಜಿಲ್ಲೆಗಳಿಂದ ಟ್ರ್ಯಾಕ್ಟರ್​​ಗಳು ಬಂದಿದ್ದವು. ರೇಸ್​​​ಗೆ ಮೊದಲ ನಾಲ್ಕು ಸ್ಥಾನ ಪಡೆದವರಿಗೆ ಬಹುಮಾನ ನೀಡಲಾಯಿತು. ಈ ರೇಸ್ ನೋಡಲು ಕಿಕ್ಕಿರಿದು ಸೇರಿದ್ದ ಜನಸ್ತೋಮ ಬಜಾರ್‌ನ ಮಹಡಿಗಳ ಮೇಲೆ, ಮರವೇರಿ, ರಸ್ತೆ ಇಕ್ಕೆಲಗಳಲ್ಲಿ ಸಾವಿರಾರು ಜನ ಸೇರಿದ್ದರು.

ಟ್ರ್ಯಾಕ್ಟರ್ ರೇಸ್​ ಕಂಡು ನೆರದಿದ್ದ ಜನರು ಶಿಳ್ಳೆ, ಕೇಕೆ ಹಾಕಿ ಸಂಭ್ರಮಿಸಿದರು. ಜಾತ್ರೆ ಪ್ರಯುಕ್ತ ನಡೆದ ರೇಸ್ ನೋಡುಗರನ್ನು ತುದಿಗಾಲ ಮೇಲೆ ನಿಲ್ಲಿಸಿತ್ತು. ಕೆಲ ಸಮಯ ಕುತೂಹಲ ಉಂಟುಮಾಡಿತು. ಆಯ್ಕೆಯಾದ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು.