ಪ್ರಭಾಸ್‌ ನಟನೆಯ ‘ಸ್ಪಿರಿಟ್‌‘ ಸಿನಿಮಾ ತಂಡದಿಂದ ಹೊರಬಂದ ದೀಪಿಕಾ ಪಡುಕೋಣೆ

ಬೆಂಗಳೂರು: ಸಂದೀಪ್ ರೆಡ್ಡಿ ವಂಗಾ ನಿರ್ದೇಶನ ಮಾಡುತ್ತಿರುವ ‘ಸ್ಪಿರಿಟ್‌‘ ಸಿನಿಮಾ ತಂಡದಿಂದ ಬಾಲಿವುಡ್‌ ನಟಿ ದೀಪಿಕಾ ಪಡುಕೋಣೆ ಹೊರ ಬಂದಿದ್ದಾರೆ.

‘ಸ್ಪಿರಿಟ್‌‘ ಸಿನಿಮಾದಲ್ಲಿ ಪ್ರಭಾಸ್‌ ನಾಯಕ ನಟನಾಗಿ, ದೀಪಿಕಾ ನಾಯಕಿಯಾಗಿ ಅಭಿನಯ ಮಾಡುತ್ತಿದ್ದಾರೆ ಎಂದು ಚಿತ್ರತಂಡ ಘೋಷಣೆ ಮಾಡಿತು. ಇದೀಗ ದೀಪಿಕಾ ಸಿನಿಮಾದಿಂದ ಹೊರಬಂದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಈಗಾಗಲೇ ‘ಸ್ಪಿರಿಟ್‌‘ ಸಿನಿಮಾದ ಕೆಲಸಗಳು ಆರಂಭವಾಗಿದ್ದು ನಿರ್ದೇಶಕ ಸಂದೀಪ್ ರೆಡ್ಡಿ ಸಂಗೀತ ಸಂಯೋಜನೆಯ ಕೆಲಸಗಳನ್ನು ಮಾಡುತ್ತಿದ್ದಾರೆ. ಈ ವೇಳೆ ದೀಪಿಕಾ ಹೊರಬಂದಿರುವುದರಿಂದ ಮತ್ತೆ ನಾಯಕಿಯನ್ನು ಹುಡುಕುವ ಕೆಲಸ ಅವರ ಹೆಗಲಿಗೆ ಬಿದ್ದಿದೆ.

ಸಂಭಾವನೆ ಮತ್ತು ಕಥೆಯ ವಿಷಯಕ್ಕೆ ನಿರ್ದೇಶಕರ ಜೊತೆಗಿನ ಭಿನ್ನಾಭಿಪ್ರಾಯಗಳಿಂದ ದೀಪಿಕಾ ಈ ಯೋಜನೆಯಿಂದ ಹೊರಬಂದಿದ್ದಾರೆ. ಈ ಹಿಂದೆ ಅವರಿಗೆ ₹ 20 ಕೋಟಿ ಸಂಭಾವನೆ ನೀಡುವುದಾಗಿ ಚಿತ್ರತಂಡ ಹೇಳಿಕೊಂಡಿತ್ತು.