ಯಶ್‌ ಆರ್ಭಟಕ್ಕೆ ದಾಖಲೆಗಳು ದೂಳಿಪಟ: ಮೊದಲ ದಿನ ₹134 ಕೋಟಿ ಬಾಚಿದ K.G.F-2
ಯಶ್‌ ನಟನೆಯ, ಪ್ರಶಾಂತ್‌ ನೀಲ್‌ ನಿರ್ದೇಶನದ ಪ್ಯಾನ್‌ ಇಂಡಿಯಾ ಸಿನಿಮಾ ಕೆ.ಜಿ.ಎಫ್‌ ಚಾಪ್ಟರ್‌–2 ಮೊದಲ ದಿನವೇ ಬಾಕ್ಸ್‌ ಆಫೀಸ್‌ನಲ್ಲಿ ದೂಳೆಬ್ಬಿಸಿದೆ.
ಭಾರತದಲ್ಲೇ ಕೆ.ಜಿ.ಎಫ್‌–2 ಒಟ್ಟು ಗಳಿಕೆ ₹134.5 ಕೋಟಿ ದಾಟಿದೆ ಎಂದು ಹೊಂಬಾಳೆ ಫಿಲ್ಮ್ಸ್‌ ತನ್ನ ಟ್ವಿಟರ್‌ ಖಾತೆಯಲ್ಲಿ ಶುಕ್ರವಾರ ಅಧಿಕೃತವಾಗಿ ತಿಳಿಸಿದೆ.
ಸಿನಿಮಾದಲ್ಲಿ ಬರುವ ಡೈಲಾಗ್‌, ‘ದಿಸ್‌ ಈಸ್‌ ದಿ ಬಿಗ್ಗೆಸ್ಟ್‌ ನ್ಯಾಷನಲ್‌ ಇಷ್ಯು ನೌ’ ಉಲ್ಲೇಖಿಸಿ ಹೊಂಬಾಳೆ ಫಿಲ್ಮ್ಸ್‌ ಟ್ವೀಟ್‌ ಮಾಡಿದೆ. ಹೀಗೆ, ನಿರೀಕ್ಷೆಯಂತೇ ಮೊದಲ ದಿನವೇ ಕೆ.ಜಿ.ಎಫ್‌–2 ನೂರು ಕೋಟಿ ಕ್ಲಬ್‌ ಸೇರಿದೆ.
ಅಮೆರಿಕದಲ್ಲೇ ಮೊದಲ ದಿನದ ಕಲೆಕ್ಷನ್‌ ₹8 ಕೋಟಿ ದಾಟಿದೆ ಎಂದು ಗುರುವಾರ ರಾತ್ರಿ ಹೊಂಬಾಳೆ ಫಿಲ್ಮ್ಸ್‌ ತಿಳಿಸಿತ್ತು. ಒಟ್ಟಾರೆ ಮೊದಲ ದಿನದ ಒಟ್ಟು ಗಳಿಕೆ ₹150 ಕೋಟಿ ದಾಟಿದೆ ಎಂದು ಅಂದಾಜಿಸಲಾಗಿದೆ.
ಭಾರತ ಸೇರಿದಂತೆ ಅಮೆರಿಕ, ರಷ್ಯಾ, ಫ್ರಾನ್ಸ್‌, ನ್ಯೂಜಿಲೆಂಡ್‌ ಸೇರಿ ವಿಶ್ವದೆಲ್ಲೆಡೆ ಒಟ್ಟಾರೆ 10 ಸಾವಿರಕ್ಕೂ ಹೆಚ್ಚು ಸ್ಕ್ರೀನ್‌ಗಳಲ್ಲಿ 25 ಸಾವಿರಕ್ಕೂ ಅಧಿಕ ಶೋಗಳು ಮೊದಲ ದಿನ ನಡೆದಿತ್ತು.
ಕನ್ನಡ, ತೆಲುಗು, ತಮಿಳು, ಹಿಂದಿ ಹಾಗೂ ಮಲಯಾಳಂನಲ್ಲಿ ಚಿತ್ರ ಬಿಡುಗಡೆಯಾಗಿತ್ತು. ದಕ್ಷಿಣ ಭಾರತಕ್ಕಿಂತ ಉತ್ತರ ಭಾರತದಲ್ಲೇ ಕೆ.ಜಿ.ಎಫ್‌–2 ಹವಾ ಅಧಿಕವಾಗಿತ್ತು. ಸಿನಿಮಾ ಟಿಕೆಟ್‌ ಮಾರಾಟ ಆ್ಯಪ್ ಕಂಪನಿ ಬುಕ್‌ಮೈ ಶೋದಲ್ಲೇ ಮೊದಲ ದಿನ 29 ಲಕ್ಷ ಟಿಕೆಟ್‌ಗಳು ಬಿಕರಿಯಾಗಿದ್ದವು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.