ಟಾಲಿವುಡ್ ನ್ಯಾಚುರಲ್ ಸ್ಟಾರ್ ನಾನಿ ಅಭಿಯನದ ‘ವಿ’ ಸಿನಿಮಾ ಅಮೆಜಾನ್ ಪ್ರೈಮ್ನಲ್ಲಿ ಸೆಪ್ಟೆಂಬರ್ 5 ರಂದು ಬಿಡುಗಡೆಯಾಗಲಿದೆ. ಈ ಕುರಿತು ಚಿತ್ರತಂಡ ಅಧೀಕೃತ ಮಾಹಿತಿಯನ್ನು ಹೊರ ಹಾಕಿದೆ.
ಮೋಹನ್ ಕೃಷ್ಣ ಇಂದ್ರಗಂಟಿ ನಿರ್ದೇಶನದ ಸಿನಿಮಾದಲ್ಲಿ ನಿವೇತಾ ಥಾಮಸ್ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಸುಧೀರ್ ಬಾಬು, ಅದಿತಿ ರಾವ್ ಹೈದರಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಕಳೆದೆರಡು ದಿನಗಳ ಹಿಂದೆ ಸಿನಿಮಾ ಬಿಡುಗಡೆಯ ಕುರಿತು ಸಣ್ಣ ವಿಡಿಯೊವೊಂದನ್ನು ಬಿಡುಗಡೆ ಮಾಡಿತ್ತು ಚಿತ್ರತಂಡ. ಅಲ್ಲದೇ ಒಟಿಟಿಯಲ್ಲಿ ಸಿನಿಮಾ ಬಿಡುಗಡೆ ಕುರಿತು ಸುಳಿವು ನೀಡಿತ್ತು. ಒಟಿಟಿಯಲ್ಲಿ ಬಿಡುಗಡೆಯಾಗುತ್ತಿರುವ ದೊಡ್ಡ ಬಜೆಟ್ನ ಟಾಲಿವುಡ್ನ ಮೊದಲು ಸಿನಿಮಾ ‘ವಿ’.
ಆಗಸ್ಟ್ನಲ್ಲಿ ಸಿನಿಮಾ ಥಿಯೇಟರ್ಗಳು ಪುನಾರಾರಂಭಗೊಳ್ಳುವ ಭರವಸೆ ಇದ್ದ ಕಾರಣ 3 ಕೋಟಿಗೂ ಕಡಿಮೆ ಬಜೆಟ್ ಇರುವ ಚಿತ್ರಗಳಷ್ಟೇ ಒಟಿಟಿ ವೇದಿಕೆಯಲ್ಲಿ ಬಿಡುಗಡೆಗೊಂಡಿದ್ದವು. ಆದರೆ ಸದ್ಯಕ್ಕೆ ಥಿಯೇಟರ್ಗಳು ಆರಂಭವಾಗುವ ಲಕ್ಷಣ ಇಲ್ಲದ ಕಾರಣ ಯಶಸ್ವಿ ನಿರ್ಮಾಪಕ ದಿಲ್ ರಾಜು ‘ವಿ’ ಸಿನಿಮಾವನ್ನು ಡಿಜಿಟಲ್ ವೇದಿಕೆಯಲ್ಲಿ ಬಿಡುಗಡೆ ಮಾಡುವ ಯೋಚನೆ ಮಾಡಿದ್ದಾರೆ.
ಇದು ಆ್ಯಕ್ಷನ್ ಥ್ರಿಲ್ಲರ್ ಸಿನಿಮಾವಾಗಿದ್ದು ನಾನಿಯ ಅಭಿನಯದ ಇಪ್ಪತ್ತೈದನೇ ಚಿತ್ರವಾಗಿದೆ. ನಾನಿಯ ಮೊದಲ ಸಿನಿಮಾವೂ ಸೆಪ್ಟೆಂಬರ್ 5 ರಂದೇ ಬಿಡುಗಡೆಯಾಗಿದ್ದು ಮೊದಲ ಒಟಿಟಿ ಸಿನಿಮಾವೂ ಅದೇ ತಾರೀಖಿನಂದು ಬಿಡುಗಡೆಯಾಗುತ್ತಿರುವುದು ವಿಶೇಷ.
₹25 ಕೋಟಿ ಬಜೆಟ್ನ ಈ ಸಿನಿಮಾಕ್ಕೆ ದಿಲ್ ರಾಜು ಹಣ ಹೂಡಿಕೆ ಮಾಡಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.