ಸಿನಿಮಾ ನಿರ್ಮಾಣಕ್ಕಿಳಿದ ನಟ ಪ್ರಜ್ವಲ್‌ ದೇವರಾಜ್‌

ಸಾಕಷ್ಟು ನಟರು ಒಂದಷ್ಟು ಸಿನಿಮಾಗಳ ಬಳಿಕ ನಿರ್ದೇಶನ ಅಥವಾ ನಿರ್ಮಾಣದಲ್ಲಿ ತೊಡಗಿಸಿಕೊಳ್ಳುವುದು ಹೊಸತೇನಲ್ಲ. ನಟ ಪ್ರಜ್ವಲ್‌ ದೇವರಾಜ್‌ ಅದೇ ಹಾದಿ ಹಾಡಿದ್ದಾರೆ. ತಮ್ಮ ನೂತನ ನಿರ್ಮಾಣ ಸಂಸ್ಥೆಗೆ ಇತ್ತೀಚೆಗಷ್ಟೇ ಚಾಲನೆ ನೀಡಿದ್ದಾರೆ. ತಮ್ಮ ಸಹೋದರ ಪ್ರಣಂ ದೇವರಾಜ್‌ ಅವರ ‘S/O ಮುತ್ತಣ್ಣ’ ಸಿನಿಮಾ ನಿರ್ಮಾಣ ಮಾಡಿರುವ ಪುರಾತನ ಫಿಲ್ಮ್ಸ್‌ ಜತೆ ಕೈಜೋಡಿಸಿ ಪ್ರಜ್ವಲ್‌ ತಮ್ಮ ಮುಂದಿನ ಸಿನಿಮಾವನ್ನು ನಿರ್ಮಿಸಲಿದ್ದಾರೆ.

‘ನಮ್ಮ ಸಂಸ್ಥೆಗೆ P2 ಪ್ರೊಡಕ್ಷನ್ಸ್ ಎಂದು ಹೆಸರಿಡಲಾಗಿದೆ. ಇತ್ತೀಚೆಗಷ್ಟೇ ಪೂಜೆ ಮಾಡಿ ಸಂಸ್ಥೆಯ ಶೀರ್ಷಿಕೆ ಅನಾವರಣ ಮಾಡಿದ್ದೇವೆ. ‘S/O ಮುತ್ತಣ್ಣ’ ಕಥೆಯನ್ನು ತಂದೆ ದೇವರಾಜ್‌ ಕೇಳಿ ಅಂತಿಮ ಮಾಡಿದ್ದರು. ಅವರ ಆಪ್ತರಾಗಿರುವ ಪುರಾತನ ಫಿಲ್ಮ್ಸ್‌ನಿಂದ ಇನ್ನಷ್ಟು ಉತ್ತಮ ಸಿನಿಮಾ ನಿರ್ಮಾಣದ ಬಗ್ಗೆ ಈ ಹಿಂದೆ ಹೇಳಿದ್ದೆವು. ಅವರ ಜತೆ ಕೈಜೋಡಿಸಿ ನಮ್ಮ ಮುಂದಿನ ಸಿನಿಮಾಗಳು ನಿರ್ಮಾಣಗೊಳ್ಳಲಿವೆ. ‘S/O ಮುತ್ತಣ್ಣ’ ತಂಡದಿಂದಲೇ ಇನ್ನೊಂದು ಸಿನಿಮಾ ಮಾಡುವ ಆಲೋಚನೆಯಿದೆ’ ಎನ್ನುತ್ತಾರೆ ಪ್ರಜ್ವಲ್‌. 

ಪ್ರಜ್ವಲ್‌ ಅವರ ‘ಮಾಫಿಯಾ’ ಚಿತ್ರ ಬಿಡುಗಡೆ ಸಿದ್ಧವಿದೆ. ಅವರ ಪತ್ನಿ ರಾಗಿಣಿ ಕೂಡ ನಟನೆಯಲ್ಲಿ ಸಕ್ರಿಯರಾಗಿದ್ದಾರೆ. ಪ್ರಣಂ ಅವರ ಮುಂದಿನ ಚಿತ್ರವನ್ನು ಈ ಸಂಸ್ಥೆ ನಿರ್ಮಿಸಲಿದೆ ಎನ್ನಲಾಗಿದೆ.