ಕಣ್ಸನ್ನೆ ಹುಡುಗಿಗೆ ಟ್ರೋಲಿಂಗ್ ಕಾಟ!

ಪ್ರಿಯಾ ಪ್ರಕಾಶ್ ವಾರಿಯರ್ ಕಣ್ಣು ಮಿಟುಕಿಸುವ ಮೂಲಕವೇ ರಾತ್ರಿ ಬೆಳಗಾಗುವುದರಲ್ಲಿ ಭಾರತದ ಸೆನ್ಸೆಷನ್ ಹುಡುಗಿ ಎನ್ನಿಸಿಕೊಂಡವಳು. ‘ವರು ಅಡಾರ್ ಲವ್’ ಚಿತ್ರದ ‘ಮಾಣಿಕ್ಯ ಮಲರಾಯ ಪೂವಿ’ ಹಾಡಿನ ದೃಶ್ಯದಲ್ಲಿ ಆಕೆ ಕಣ್ಣು ಮಿಟುಕಿಸಿದ್ದು ಪಡ್ಡೆ ಹುಡುಗರ ಎದೆಯಲ್ಲಿ ಕಿಚ್ಚು ಹೊತ್ತಿಸಿತ್ತು. ಆ ಕಣ್ಸನ್ನೆಯೇ ದೇಶದಾದ್ಯಂತ ಆಕೆಗೆ ಅಭಿಮಾನಿ ಬಳಗ ಸೃಷ್ಟಿಯಾಗುವಂತೆ ಮಾಡಿತ್ತು.

ತನ್ನ ಕಣ್ಸನ್ನೆ ಮೂಲಕ ಬರೀ ಕೇರಳ ಮಾತ್ರವಲ್ಲ ಭಾರತದಾದ್ಯಂತ ಸಿನಿ ಅಭಿಮಾನಿಗಳನ್ನು ಮಂತ್ರಮುಗ್ಧಗೊಳಿಸಿದ ಖ್ಯಾತಿ ಆಕೆಯದ್ದು.

ಯುಟ್ಯೂಬ್‌ನಲ್ಲಿ ಈಕೆ ಕಣ್ಣು ಮಿಟುಕಿಸಿದ ದೃಶ್ಯಕ್ಕಾಗಿ ಹುಡುಕಾಡಿದ್ದು ದಾಖಲೆಯಾಗಿತ್ತು. ಆ ಮೂಲಕ ಈಕೆ ಸಾಮಾಜಿಕ ಜಾಲತಾಣಗಳಲ್ಲಿ ‘ನ್ಯಾಷನಲ್ ಸೆಲೆಬ್ರೆಟಿ’ ಎನ್ನಿಸಿಕೊಂಡಿದ್ದರು. ಅಲ್ಲದೇ, 2018ರಲ್ಲಿ ಗೂಗಲ್‌ನಲ್ಲಿ ಅತಿಹೆಚ್ಚು ಹುಡುಕಲ್ಪಟ್ಟ ಸೆಲೆಬ್ರೆಟಿ ಎಂಬ ಹಿರಿಮೆ ಹೊಂದಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಸದಾ ಸಕ್ರಿಯರಾಗಿರುತ್ತಿದ್ದ ಪ್ರಿಯಾ ವಾರಿಯರ್ ಇದ್ದಕ್ಕಿದ್ದಂತೆ ತಮ್ಮ ಇನ್‌‌ಸ್ಟಾಗ್ರಾಮ್ ಖಾತೆಯನ್ನು ನಿಷ್ಕ್ರೀಯಗೊಳಿಸಿದ್ದಾರೆ. ಈ ಖಾತೆಯಲ್ಲಿ ಅವರಿಗೆ ಬರೋಬ್ಬರಿ 7 ಮಿಲಿಯನ್ ಮಂದಿ ಪಾಲೋವರ್ಸ್ ಇದ್ದರು. ಅತಿವೇಗದಲ್ಲಿ 1 ಮಿಲಿಯನ್ ಪಾಲೋವರ್ಸ್‌ ಹೊಂದಿದ ಭಾರತೀಯ ಸೆಲೆಬ್ರೆಟಿ ಎಂಬ ಖ್ಯಾತಿಯೂ ಅವರಿಗಿತ್ತು.

ಆದರೂ, ಇದ್ದಕ್ಕಿದ್ದಂತೆ ಇನ್‌‌ಸ್ಟಾಗ್ರಾಮ್‌ನಿಂದ ಹೊರ ನಡೆದಿದ್ದೇಕೆ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿತ್ತು. ಆ ಪ್ರಶ್ನೆಗೆ ಉತ್ತರ ಹುಡುಕುತ್ತಾ ಹೊರಟರೆ ಟ್ರೋಲರ್ ಕಾಟ ಹಾಗೂ ಆನ್‌ಲೈನ್ ನಿಂದನೆಯೇ ಕಾರಣ ಎಂಬ ಉತ್ತರ ಸಿಕ್ಕಿದೆ. ಆದರೆ ಇದು ನಿಜವೇ ಎಂಬುದನ್ನು ಮಾತ್ರ ಆಕೆಯೇ ಸ್ಪಷ್ಟಪಡಿಸಬೇಕಿದೆ.

20 ವರ್ಷ ವಯಸ್ಸಿನ ಈ ಬೆಡಗಿ ಇದ್ದಕ್ಕಿದ್ದಂತೆ ಇನ್‌ಸ್ಟಾಗ್ರಾಮ್‌ ಖಾತೆಯನ್ನು ನಿಷ್ಕ್ರಿಯಗೊಳಿಸಿದ್ದು ಅಭಿಮಾನಿಗಳು ಹಾಗೂ ಪಾರ್ಲೋವರ್ಸ್‌ಗಳಿಗೆ ಅಚ್ಚರಿ ಮೂಡಿಸಿದೆ, ಜೊತೆಗೆ, ಅಭಿಮಾನಿಗಳು ಇದರಿಂದ ಬೇಸರಗೊಂಡಿದ್ದಾರಂತೆ. ಆದರೆ, ಪ್ರಿಯಾ ಫೇಸ್‌ಬುಕ್ ಹಾಗೂ ಟಿಕ್‌ಟಾಕ್‌ನ ಖಾತೆ ಹೊಂದಿದ್ದು, ಅಭಿಮಾನಿಗಳು ಕೊಂಚ ನಿರಾಳರಾಗಿದ್ದಾರೆ.