ಬಣ್ಣದ ಲೋಕಕ್ಕೆ ಕಾಲಿಟ್ಟು 30 ವರ್ಷ ಪೂರೈಸಿದ ನಟಿ ರಾಣಿ ಮುಖರ್ಜಿ

1996ರಲ್ಲಿ ‘ರಾಜಾ ಕಿ ಆಯೇಗಿ ಬಾರಾತ್‌’ ಸಿನಿಮಾ ಮೂಲಕ ನಟಿ ರಾಣಿ ಮುಖರ್ಜಿ ಬಣ್ಣದ ಲೋಕಕ್ಕೆ ಕಾಲಿಟ್ಟು 30 ವರ್ಷ ಉರುಳಿದೆ.

ಯಶ್‌ ರಾಜ್‌ ಫಿಲ್ಮ್ಸ್‌ ನಿರ್ಮಾಣದ ‘ಮರ್ದಾನಿ 3’ ಸಿನಿಮಾ ಬಿಡುಗಡೆ ಹೊಸ್ತಿಲಲ್ಲಿ ಈ ಮೂವತ್ತು ವರ್ಷಗಳ ಪಯಣವನ್ನು ರಾಣಿ ಮುಖರ್ಜಿ ಒಂದು ಪತ್ರದ ಮುಖೇನ ಮೆಲುಕು ಹಾಕಿದ್ದಾರೆ. ‘ಕುತೂಹಲ, ಭಯ, ಕಥೆಯ ಕುರಿತ ಪ್ರೀತಿ ನನ್ನ ಈ ಪಯಣವನ್ನು ಆರಂಭಿಸಿತು. ಇದು ಈಗ ವೃತ್ತಿಯಾಗಿ ಬದಲಾಗಿದೆ. ಮೂರು ದಶಕಗಳು ಉರುಳಿದ್ದರೂ, ಇಂದಿಗೂ ನಾನು ಹೊಸಬಳಾಗಿಯೇ ಹೆಜ್ಜೆಗಳನ್ನು ಇಡುತ್ತಿದ್ದೇನೆ. ಹೊಸ ಸವಾಲುಗಳಿಗಾಗಿ ಎದುರು ನೋಡುತ್ತಿರುತ್ತೇನೆ. ಎಲ್ಲಿಯವರೆಗೂ ಹೇಳಲು ಕಥೆಗಳು, ಭಾವನೆಗಳು ಇರುತ್ತಾವೆಯೋ ಅಲ್ಲಿಯವರೆಗೂ ಈ ಸುಂದರವಾದ ಕಲೆಯ ವಿದ್ಯಾರ್ಥಿಯಾಗಿರುತ್ತೇನೆ’ ಎಂದಿದ್ದಾರೆ 47 ವರ್ಷದ ರಾಣಿ ಮುಖರ್ಜಿ.    

‘ಬಂಟಿ ಔರ್‌ ಬಬ್ಲಿಯಲ್ಲಿ ದೊಡ್ಡ ಕನಸನ್ನು ಹೊತ್ತ ಸಣ್ಣ ಪಟ್ಟಣದ ಹುಡುಗಿಯಾಗಿ, ‘ನೋ ಒನ್‌ ಕಿಲ್ಡ್‌ ಜೆಸ್ಸಿಕಾ’ದಲ್ಲಿ ದಿಟ್ಟ ಪತ್ರಕರ್ತೆಯಾಗಿ, ‘ಮರ್ದಾನಿ’ಯಲ್ಲಿ ಪೊಲೀಸ್‌ ಅಧಿಕಾರಿಯಾಗಿ ನಟಿಸುವಾಗ ಆ ಪಾತ್ರಗಳ ಜೊತೆಯಲ್ಲಿ ಒಂದು ದೃಢವಾದ ಸಂಬಂಧದ ಭಾವನೆ ಬಂದಿತ್ತು. ಈ ಪಾತ್ರಗಳು ಎಂದಿಗೂ ಹಿಂದಡಿ ಇಡದೆ, ಪುರುಷ ಪ್ರಧಾನ ವ್ಯವಸ್ಥೆಯನ್ನು ಒಡೆಯುವಂತೆ ಕಂಡವು. ನನ್ನ ಜೀವನದಲ್ಲಿ ಮದುವೆ, ಮಕ್ಕಳು ಎನ್ನುವುದು ಈ ಪಯಣಕ್ಕೆ ಅಡ್ಡಿಯಾಗಲೇ ಇಲ್ಲ. ಇದು ಸಿನಿಮಾ ಮೇಲಿನ ನನ್ನ ಗಮನವನ್ನು ಇನ್ನಷ್ಟು ಕೇಂದ್ರೀಕರಿಸಿತು’ ಎಂದಿದ್ದಾರೆ ರಾಣಿ.     

ರಾಣಿ ನಟನೆಯ ‘ಮರ್ದಾನಿ 3’ ಸಿನಿಮಾ ಇದೇ 30ರಂದು ತೆರೆಕಾಣುತ್ತಿದ್ದು, ಚಿತ್ರವನ್ನು ಅಭಿರಾಜ್‌ ಮಿನವಾಲ ನಿರ್ದೇಶಿಸಿದ್ದಾರೆ.